كۇنتاي ىرزقان ۇلى 23 جولاۋشىنى قۇتقارۋ جولىندا ءوز ءومىرىن ارنادى

اليبابا الەۋمەتتىك يگىلىك نىسانى وڭ ەنەرگيا سيلىعىن تابىستادى

2015.06.19 15:31   كەلۋ قاينارى : حالىق تورابى

　　39 جاستاعى شوفەر كۇنتاي ىرزقان ۇلى قاتىناس شىرعالاڭىنا ۇشىراعان قىسىلتاياڭ ساتتە دە رولدان قولىن بوساتپاي، اۆتوبۋزداعى 23 جولاۋشىنىڭ اماندىعى ءۇشىن جانىن پيدا ەتتى، بۇل ءىس حابارلانعاننان كەيىن، اليبابا الەۋمەتتىك يگىلىك نىسانىنىڭ «كۇن سايىن وڭ ەنەرگيا» قيمىلىن ۇيىمداستىرۋشىلاردىڭ نازارىن اۋدارىپ، كۇنتايعا اليبابا وڭ ەنەرگيالى ادام قيمىلىنىڭ 97 – كەزەگىنىڭ 1 – دارەجەلى سيلىعىن بەرىپ، ونىڭ وتباسىنا 10 مىڭ يۋان اقشالاي سيلىقتى تابىستادى.

　　كۇنتاي ىرزقان ۇلى ىلە قازاق اۆتونوميالى وبلىسى كۇنەس اۋدانى ارالتوبە قالاشىعىنداعى قاراپايىم شوفەر، 7 – ماۋسىم تۇنگى ساعات بىردەن 19 مينۋت وتكەندە، ول جۇرگىزگەن جولاۋشىلار اۆتوبۋزى G30 ليانيۇنگاڭ – قورعاس جوعارى قارقىندى تاس جولىنىڭ گاۋچۋاننان 10 كيلومەتر قاشىقتىقتاعى ورنىندا داربىز تاسىعان جۇك اۆتوموبيلىمەن سوعىلىسقان. شىرعالاڭ تۋىلعان كەزدە ول اۆتوبۋزداعى 23 جولاۋشىنىڭ اماندىعىن ەسىنەن شىعارماي، اۆتوبۋز توقتاعانعا دەيىن رولدان قولىن بوساتپاعان.

　　كۇنتاي ىرزقان ۇلى قاتىناس شىرعالاڭى تۋىلعاننان ەكى ساعات وتكەننەن كەيىن ومىرمەن قوشتاستى، ونىڭ ارتىندا جان جارى، شيەتتەي ەكى بالاسى، قارت اكەسى قالدى.

　　اليبابا الەۋمەتتىك يگىلىك «كۇن سايىن وڭ ەنەرگيا» نىسانى گرۋپپاسى قىزمەتكەرى بىلاي دەدى: كۇنتاي ىرزقان ۇلى باسىنا قاتەر تونگەندە سالماقتىلىقپەن توتەپ بەرىپ، ادال نيەتتى، ارداقتى ادامگەرشىلىگىن جانە اسا جوعارى كاسىپتىك ونەگەسىن كورسەتتى، 23 ادامنىڭ ءومىرىن قۇتقارعان ەرلىگىنىڭ قاسىندا 10 مىڭ يۋاندىق اقشالاي سيلىق تۇككە دە تۇرمايدى. الايدا ءبىز وسىنداي سيلىق تاراتۋ فورماسى ارقىلى قوعامداعى وڭ ەنەرگيانى ادامدار جۇرەگىنە ۇيالاتۋدى ماقسات ەتتىك. ءبىز وسى ءتاسىل ارقىلى كۇنتايدىڭ وتباسىنداعىلارعا كۇنتاي ارامىزدان كەتسە دە ونىڭ وسكەلەڭ رۋحىنىڭ ماڭگى جادىمىزدا جاتتالاتىنىن بىلدىرمەكپىز، - دەدى.

　　كەلۋ قاينارى: حالىق تورابى