بۇكىل ەلدەگى ەڭ ىستىق ون قالانىڭ ءبار شينجياڭدا!

شينجياڭداعى ءار دارەجەلى اۋا رايى ستانسيالارى قاپىرىق ىستىققا قاتىستى 25 ساقتىق سەگنالىن جاريالادى

2015.07.16 14:32   كەلۋ قاينارى : حالىق تورابى

　　حالىق تورابى، 16 – شىلدە، بەيجيڭ. جۋىردا شينجياڭدا قاپىرىق ىستىق اۋا رايى جالعاسۋدا، شينجياڭداعى ءار دارەجەلى اۋا رايى ستانسيالارى قاپىرىق ىستىققا قاتىستى 25 ساقتىق سەگنالىن جاريالادى. جۇڭگو اۋا رايى ستانسياسىنىڭ ساناعىنا قاراعاندا، 15 – شىلدە كۇنى ساعات 18گە دەيىن بۇكىل ەلدەگى ەڭ ىستىق 10 قالانىڭ بارلىعى شينجياڭدا! تۇرپان قالاسىنىڭ ەڭ جوعارى اۋا تەمپەراتۋراسى ℃44قا جەتىپ، بۇكىل ەلىمىز بويىنشا ءبىرىنشى ورىندا تۇرعان.

　　تۇرپاننان سىرت، بۇكىل ەلدەگى ەڭ ىستىق ون قالانىڭ ىشىندە تاعى توقسۇن، الاتاۋ ساعاسى، ءپىشان، بۇراتالا، قارامايلى، جىڭ، لوپ، ءپايزاۋات، ورتا تاكلاماكان قاتارلى 9 ورىن بار.

　　اۆتونوميالى رايوندىق اۋا رايى ستانسياسىنىڭ حابارلاۋىنشا، الداعى ەكى كۇندە شينجياڭدا اۋا تەمپەراتۋراسى ℃35تان جوعارى بولادى. مۇندا ىلە اڭعارىندا، بۇراتالادا، سولتۇستىك شينجياڭداعى ءتاڭىرتاۋ بەلدەۋىندە، وڭتۇستىك شينجياڭدا، شىعىس شينجياڭدا ەڭ جوعارى اۋا تەمپەراتۋراسى ℃37تان اسادى، تۇرپان – ءپىشان – توقسۇن ويپاتىندا، وڭتۇستىك شينجياڭداعى ءىشىنارا ويپاتتى وڭىرلەردە ەڭ جوعارى اۋا تەمپەراتۋراسى ℃40تان اسادى.

　　كەلۋ قاينارى: حالىق تورابى