شي جينپيڭ مالايزيانىڭ زۇڭليى انۋارمەن كەزدەستى

11 - ايدىڭ 7 - كۇنى تۇستەن كەيىن مەملەكەت ءتوراعاسى شي جينپيڭ بەيجيڭدەگى حالىق سارايىندا جۇڭگوعا ساپارلاي كەلگەن مالايزيانىڭ زۇڭليى انۋارمەن كەزدەستى.

شي جينپيڭ بىلاي دەپ اتاپ كورسەتتى: جۇڭگو مەن مالايزيا اراسىن تەڭىز ءبولىپ جاتقان جاقسى كورشىلەر عانا ەمەس، مۇراتتاس جاقسى دوستار، قول ۇستاسا دامىعان جاقسى سەرىكتەر. بىلتىر 3 - ايدا ءسىز زۇڭلي بولعاننان كەيىن جۇڭگودا تۇڭعىش رەت ساپاردا بولدىڭىز، ءبىز جۇڭگو - مالايزيا تاعدىرلاس ورتاق تۇلعاسىن بىرگە قۇرۋ جونىندە ماڭىزدى ورتاق تانىمعا كەلدىك. ءبىر جىلدان استام ۋاقىتتان بەرى ەكى جاق ءار جىكتەگىلەردىڭ تىعىز بارىس - كەلىسىن، ىقپالداستىعىن ساقتاپ، ءار سالاداعى ءوزارا ءتيىمدى سەلبەستىكتى جوعارى ساپامەن ىلگەرىلەتىپ، ەكى ەل حالىقتارىنا ناقتى پايدا جەتكىزدى. قازىر جۇڭگو مەن مالايزيا ەكى ەل ءوز ەلدەرىنىڭ دامۋىنىڭ، گۇلدەنۋىنىڭ شەشۋشى كەزەڭىندە تۇر، ەكى جاق جۇڭگو مەن مالايزيانىڭ ديپلوماتيالىق قارىم - قاتىناس ورناتقاندىعىنىڭ 50 جىلدىعىن قۇتتىقتاۋدى جانە ”جۇڭگو - مالايزيا دوستىق جىلىن“ وراي ەتىپ، جۇڭگو - مالايزيا تاعدىرلاس ورتاق تۇلعاسى قۇرىلىسىنىڭ تەرەڭدەۋىن، ناقتىلانۋىن قول ۇستاسا ىلگەرىلەتىپ، وزدەرىنىڭ دامۋ نىسانالارىنىڭ جۇزەگە اسۋىنا دەم بەرىپ، ءوڭىردىڭ گۇلدەنۋى مەن ورنىقتىلىعىنا تىڭ دا اناعۇرلىم زور ۇلەس قوسۋى كەرەك.

شي جينپيڭ بىلاي دەپ باسا دارىپتەدى: ەكى جاق جوعارى دەڭگەيلى ستراتەگيالىق سەرىكتەستىك قارىم - قاتىناستى دامىتىپ، جوعارى جىكتەگىلەردىڭ ءجيى بارىس - كەلىسىن ۇزدىكسىز ساقتاپ، ەل باسقارۋ تاجىريبەلەرى جونىندە اۋىس - كۇيىس جاساۋدى كۇشەيتىپ، ساياسي ءوزارا سەنىمدىلىكتى نىعايتىپ، ءبىر - ءبىرىنىڭ وزەكتى مۇددەسى مەن ءجىتى قاداعالاپ وتىرعان كەلەلى ىستەرىن باتىل قولداۋى كەرەك. جۇڭگو جاق مالايزيا جاقتىڭ ستراتەگيالىق دەربەستىككە تاباندى بولىپ، ءوز مەملەكەت جاعدايىنا ۇيلەسەتىن دامۋ جولىن تاڭداۋىن قولدايدى. ەكى جاق دامۋ ستراتەگياسىن ۇشتاستىرۋدى كۇشەيتىپ، جان - جاقتى، ءوزارا ءتيىمدى سەلبەستىكتى تەرەڭدەتىپ، ”ءبىر بەلدەۋ، ءبىر جولدى“ بىرگە قۇرۋدى جوعارى ساپامەن ۇزدىكسىز ىلگەرىلەتىپ، ”ەكى ەل، ەكى باقشا“ سياقتى جەتەكشى نىسانداردى بىرگە ويداعىداي اتقارىپ، سيفرلى ەكونوميكا، جاساندى زەردە، جاڭا ەنەرگيا سياقتى سەلبەستىكتىڭ جاڭا ارتۋ تۇيىندەرىن قالىپتاستىرىپ، كەدەيلىكتى ازايتۋداعى اۋىس - كۇيىس، سەلبەستىك مەحانيزمىن ورناتۋدى اقىلداسۋى كەرەك. مالايزيا جاقتىڭ جۇڭگو حالىقارالىق يمپورت كورمەسى تۇعىرىنان ويداعىداي پايدالانىپ، مالايزيانىڭ اناعۇرلىم كوپ ساپالى، ەرەكشە ونىمدەرىن جۇڭگوعا جەتكىزۋىن قارسى الامىز. جۇڭگو جاق مالايزيا جاقپەن جوعارى دارەجەلى وقۋ - اعارتۋ، مادەنيەت، ساياحات، جاستار، جەرگىلىكتى ورىندار سياقتى اۋىس - كۇيىستى، سەلبەستىكتى تەرەڭدەتىپ، جۇڭگو، مالايزيا دوستىعىنىڭ حالىق تىلەگى دانەكەرىن نىعايتۋدى قالايدى. وركەنيەتتىڭ كوپ نەگىزدى، بىرگە ءومىر ءسۇرۋىن، جاراسىمدى، سيىسىمدى بولۋىن دارىپتەپ، بەيبىتشىلىكتى، سەلبەستىكتى، سيىسىمدىلىقتى، توعىسۋدى وزەك ەتكەن ازيا قۇن كوزقاراسىن امالياتتا ايگىلەپ، جۇڭحۋا وركەنيەتى مەن ءىسلام وركەنيەتىنىڭ ءوزارا ۇيرەنۋ، ءوزارا ۇلگى الۋ بارىسىندا بىرگە دامۋىن ىلگەرىلەتۋ كەرەك.

شي جينپيڭ بىلاي دەپ اتاپ كورسەتتى: قازىرگى دۇنيە الماعايىپ وزگەرىپ، جاڭا اۋمالى - توكپەلى وزگەرىس مەزگىلىنە ءوتتى. ازياداعى وركەندەپ كەلە جاتقان ەلدەردىڭ جانە جاڭادان گۇلدەنگەن ەكونوميكالىق تۇلعالاردىڭ ماڭىزدى ۋاكىلى رەتىندە، جۇڭگو مەن مالايزيا حالىقارالىق جانە وڭىرلىك ماسەلەلەردە تىلدەسۋدى، سايكەسۋدى كۇشەيتىپ، ءوزارا تاباندىلىقپەن قولداۋ كورسەتىپ، قورعانىمپازدىققا بىرگە قارسى تۇرىپ، ساۋدا مەن قارجى قوسۋدىڭ ەركىن، قولايلى بولۋىن جەبەپ، دۇنيە ءجۇزىنىڭ بارابار، ءتارتىپتى كوپ ۇيەكتەنۋىن، ەكونوميكانىڭ جالپىعا ءتيىمدى، سيىسىمدى جاھاندانۋىن دارىپتەپ، دۇنيە جۇزىلىك باسقارۋ جۇيەسىنىڭ وزگەرۋىن، كەمەلدەنۋىن ىلگەرىلەتىپ، حالىقارالىق ادىلدىك پەن ادىلەتتىلىكتى جانە وركەندەپ كەلە جاتقان ەلدەردىڭ ورتاق مۇددەسىن قورعاۋى كەرەك. جۇڭگو كەلەر جىلى مالايزيانىڭ شىعىس وڭتۇستىك ازيا ەلدەرى وداعىنىڭ كەزەكتى ءتوراعا ەلى بولۋ قىزمەتىن قولدايدى، شىعىس وڭتۇستىك ازيا ەلدەرى وداعىنىڭ وزەكتى ورنى مەن ستراتەگيالىق دەربەستىگىن قولدايدى، وڭىرلىك دامۋ سەلبەستىگىنىڭ نەگىزگى اعىمىن ويداعىداي قورعايدى.

ءانۋار مىنالاردى ءبىلدىردى: ءتوراعا شي جينپيڭ ادامزاتتىڭ تاعدىرلاس ورتاق تۇلعاسىن قۇرۋ سياقتى ماڭىزدى ۇستانىمداردى العا قويىپ، تۇرلىشە وركەنيەتتەردىڭ سيىسىمدى بولۋىن، ءوزارا ۇلگى الۋىن دارىپتەدى ءارى ”بريكس+“ سەلبەستىگىن ىلگەرىلەتۋگە جەتەكشىلىك ەتۋ جونىندە بيىكتە تۇرىپ پىكىر - ۇسىنىس قويدى، بۇل ادامزات وركەنيەتىنىڭ العا باسۋى جانە حالىقتىڭ مۇددەسى، باقىتى جونىندەگى تەرەڭ سۇيىسپەنشىلىگى مەن اقىل - پاراساتتىق جاۋاپكەرشىلىگىن ايگىلەپ، دۇنيە ءجۇزىنىڭ وڭتۇستىگىنىڭ ورتاق ارمان - تىلەگى مەن جۇرەك ۇنىنە ۋاكىلدىك ەتتى. مالايزيا جاق ءتوراعا شي جينپيڭنىڭ كورەگەندىگى مەن دارىپتەمەسىن القايدى جانە قولدايدى. مالايزيا ۇكىمەتى جۇڭگومەن جالپى بەتتىك ستراتەگيالىق سەرىكتەستىك قارىم - قاتىناستى ونان ارى تەرەڭدەتىپ، ينفورماتسيا تەحنيكاسى، سيفرلى ەكونوميكا، ەنەرگيا سياقتى جاقتارداعى سەلبەستىكتى كۇشەيتۋگە كۇش سالادى. مالايزيا جاق جۇڭگونىڭ كەدەيلەردى ازايتۋ سالاسىندا قول جەتكىزگەن ادامدى سۇيىندىرەتىن تابىستارىنا ءتانتى بولىپ وتىر، جۇڭگونىڭ ەل باسقارۋ تاجىريبەلەرىن ۇيرەنۋدى، اينا ەتۋدى ءۇمىت ەتەدى. مالايزيا مەن جۇڭگونىڭ كوپتەگەن كەلەلى حالىقارالىق، وڭىرلىك ماسەلەلەردە ۇستانىمى بىردەي، تۇرعىسى قارايلاس، مالايزيا جاق ستراتەگيالىق دەربەستىككە تاباندى بولادى، جۇڭگومەن كوپ جاقتى سەلبەستىكتى جيىلەتىپ، ءوڭىردىڭ بەيبىتشىلىگىن، ورنىقتىلىعىن جانە دامۋىن، گۇلدەنۋىن قورعاۋدى قالايدى.

ۋاڭ ي كەزدەسۋدە بىرگە بولدى.

كەلۋ قاينارى: حالىق تورابى