شي جينپيڭ فرانسيانىڭ زۇڭتۇڭى ماكرونمەن كەزدەستى

سول جەر ۋاقىتى 11 - ايدىڭ 19 - كۇنى تۇستەن بۇرىن مەملەكەت ءتوراعاسى شي جينپيڭ ريو - دە - جانەيرودا 20 ەل توبى باسشىلارىنىڭ باسشىلار ماجىلىسىنە قاتىناسۋ كەزىندە فرانسيانىڭ زۇڭتۇڭى ماكرونمەن كەزدەستى.

سۋرەتتى شينحۋا اگەنتتىگىنىڭ ءتىلشىسى شىن حۇڭ تۇسىرگەن

«حالىق گازەتى»، 11 - ايدىڭ 19 - كۇنى، ريو - دە - جانەيرو (تىلشىلەر حوۋ لۋلۋ، جاڭ جى - ۋىن). سول جەر ۋاقىتى 11 - ايدىڭ 19 - كۇنى تۇستەن بۇرىن مەملەكەت ءتوراعاسى شي جينپيڭ ريو - دە - جانەيرودا 20 ەل توبى باسشىلارىنىڭ باسشىلار ماجىلىسىنە قاتىناسۋ كەزىندە فرانسيانىڭ زۇڭتۇڭى ماكرونمەن كەزدەستى.

شي جينپيڭ بىلاي دەپ اتاپ كورسەتتى: جۇڭگو مەن فرانسيا − دەربەس، تولىسقان، جاۋاپكەرشىلىك ارقالايتىن ءىرى ەلدەر، ەكى ەل قارىم - قاتىناسى ەرەكشە ستراتەگيالىق قۇنعا جانە دۇنيە جۇزىلىك مانگە يە. بيىل 5 - ايدا ءبىز جۇڭگو - فرانسيا قارىم - قاتىناسىنىڭ ”جاڭا جۇلگەسىنە“ نازار اۋداردىق ءارى دۇنيە جۇزىلىك سىن - سايىس پەن قولامتالى ماسەلەلەر جونىندە بىرگە ءۇن قاتىپ، حالىقارادا كەڭ كولەمدى، بەلسەندى ىقپال تۋدىردىق. قازىر حالىقارالىق جاعدايدا كوپتەگەن جاڭا وزگەرىس تۋىلۋدا، حالىقارالىق قوعامدى دۇنيە جۇزىلىك سايىستارعا ىنتىماقتاسا توتەپ بەرۋگە جەتەكتەۋ − جۇڭگو مەن فرانسيا بىرگە ارقالاعان ءىرى ەلدىك جاۋاپكەرشىلىك. ەكى جاق ستراتەگيالىق قارىم - قاتىناستى تەرەڭدەتىپ، ءوزارا قولداۋدى كۇشەيتىپ، جۇڭگو - فرانسيا قارىم - قاتىناسىنىڭ ورنىقتى، بەلسەندى دامۋ بەتالىسىن ساقتاپ، جۇڭگو - ەۆروپا قارىم - قاتىناسىنىڭ ءتيىمدى دامۋى مەن دۇنيە ءجۇزىنىڭ بەيبىتشىلىگىنە، ورنىقتىلىعىنا اناعۇرلىم زور ۇلەس قوسۋى كەرەك.

شي جينپيڭ بىلاي دەپ باسا دارىپتەدى: جۇڭگو جاق فرانسيا جاقپەن جوعارى جىكتەگىلەردىڭ بارىس - كەلىسىن ۇزدىكسىز جيىلەتىپ، مادەنيەت، وقۋ - اعارتۋ، جەرگىلىكتى ورىندار، جاستار سياقتى گۋمانيتارلىق سالالارداعى اۋىس - كۇيىستى، سەلبەستىكتى ۇزدىكسىز تەرەڭدەتىپ، جۇڭگو مەن فرانسيانىڭ حالىق تىلەگىنىڭ توعىسۋىن جەبەۋدى قالايدى. جۇڭگو كوممۋنيستىك پارتياسى 20 - كەزەكتى ورتالىق كوميتەتىنىڭ ءۇشىنشى جالپى ءماجىلىسى جۇڭگونىڭ جاڭا كەزەكتى رەفورما جاساپ، ەسىك اشۋ اياق الىسىن باستاپ، جۇڭگو - فرانسيا سەلبەستىگىنە جاڭا وراي ازىرلەدى، ەكى جاقتىڭ ناقتى سەلبەستىگىنىڭ بولاشاعى نۇرلى. ەكى جاقتىڭ جوعارى دارەجەلى ەكونوميكا - قازىنا سۇحباتى، ەكونوميكا - ساۋدا ارالاس كوميتەتى سياقتى مەحانيزمدەردەن ويداعىداي پايدالانىپ، سەلبەستىك كومەسكى كۇشىن ىشكەرىلەي اشىپ، ابزالدىقتار ارقىلى ءبىرىن - ءبىرى تولىقتاۋدى كۇشەيتىپ، الاۋىزدىقتاردى ۇيلەسىمدى شەشىپ، ءوزارا پايدا جەتكىزىپ، تەڭ يگىلىككە كەنەلۋدى جۇزەگە اسىرۋىن ءۇمىت ەتەمىن.

ماكرون مىنالاردى ءبىلدىردى: بيىل 5 - ايدا ءتوراعا شي جينپيڭ فرانسيادا ءساتتى ساپاردا بولدى، ءبىز فرانسيا مەن جۇڭگونىڭ ديپلوماتيالىق قارىم - قاتىناس ورناتقاندىعىنىڭ 60 جىلدىعىن بىرگە سالتاناتپەن قۇتتىقتادىق. بۇگىنگى دۇنيە ءجۇزى ءتۇرلى ورنىقسىز، تۇراقسىز فاكتورلارعا تولى. فرانسيا جاق جۇڭگو جاقپەن بىرگە ەكى ەل مەملەكەت باسشىلارى كەلىسكەن ورتاق تانىمدى مۇقيات تياناقتاندىرىپ، جوعارى جىكتەگىلەردىڭ بارىس - كەلىسىن ۇزدىكسىز جيىلەتىپ، گۋمانيتارلىق اۋىس - كۇيىستى كۇشەيتىپ، ءداستۇرلى دوستىقتى جالعاستىرىپ، جاڭاشا مەملەكەت پەن مەملەكەت قاتىناسىن قالىپتاستىرۋدى قالايدى. فرانسيا ستراتەگيالىق دەربەستىككە تاباندى بولادى، ءوزارا قۇرمەت ەتۋ رۋحىن ۇستانىپ، جۇڭگو جاقپەن پىكىرلەسۋدى، سەلبەسۋدى ورىستەتىپ، ەكونوميكا - ساۋدا داۋ - شارىن ۇيلەسىمدى ءبىر جاقتى ەتىپ، ەكى جاقتىڭ ەكونوميكا - ساۋدا قارىم - قاتىناسىنىڭ اقاۋسىز، ورنىقتى دامۋىن قورعاپ، كليمات وزگەرىسىنە توتەپ بەرۋ، جاساندى زەردەنى دۇنيە جۇزىلىك باسقارۋ سياقتى سالالارداعى سەلبەستىكتى كۇشەيتۋدى قالايدى.

ەكى جاق ۋكراينا داعدارىسى جونىندە پىكىر اۋىستىردى. شي جينپيڭ بىلاي دەپ اتاپ كورسەتتى: جۇڭگو جاقتىڭ ۋكراينا داعدارىسى ماسەلەسىندەگى تۇرعىسى دايەكتى، قاقتىعىس جاعدايىنىڭ باسەڭدەۋىن ءۇمىت ەتەدى، داعدارىستىڭ سىرتقا ۇلعايۋىن، سوعىستىڭ اسقىنۋىن كورگىسى كەلمەيدى، ءوز ءتاسىلى ارقىلى سوعىستى توقتاتۋدا ۇزدىكسىز سىندارلى رول اتقارادى.

ساي چي، ۋاڭ ي قاتارلىلار كەزدەسۋگە قاتىناستى.

كەلۋ قاينارى: حالىق تورابى