شي جينپيڭ بوليۆيانىڭ زۇڭتۇڭى ارسەمەن كەزدەستى

سول جەر ۋاقىتى 11 - ايدىڭ 19 - كۇنى تۇستەن بۇرىن مەملەكەت ءتوراعاسى شي جينپيڭ - دە - جانەيرودا 20 ەل توبى باسشىلارىنىڭ باسشىلار ماجىلىسىنە قاتىناسۋ كەزىندە بوليۆيانىڭ زۇڭتۇڭى ارسەمەن كەزدەستى.

سۋرەتتى شينحۋا اگەنتتىگىنىڭ ءتىلشىسى ديڭ حايتاۋ تۇسىرگەن

«حالىق گازەتى»، 11 - ايدىڭ 19 - كۇنى، ريو - دە - جانەيرو (تىلشىلەر چىن ي - ميڭ، لي بوۋىن). سول جەر ۋاقىتى 11 - ايدىڭ 19 - كۇنى تۇستەن بۇرىن مەملەكەت ءتوراعاسى شي جينپيڭ ريو - دە - جانەيرودا 20 ەل توبى باسشىلارىنىڭ باسشىلار ماجىلىسىنە قاتىناسۋ كەزىندە بوليۆيانىڭ زۇڭتۇڭى ارسەمەن كەزدەستى.

شي جينپيڭ بىلاي دەپ اتاپ كورسەتتى: جۇڭگو مەن بوليۆيا − جاقسى دوستار، جاقسى باۋىرلاستار. تاياۋ جىلداردان بەرى ەكى ەل قارىم - قاتىناسى تاماشا دامۋ بەتالىسىن ساقتادى، ەكى جاق ءبىر - ءبىرىنىڭ وزەكتى مۇددەسىنە جانە ءجىتى قاداعالاپ وتىرعان كەلەلى ىستەرىنە ساياتىن ماسەلەلەردە ءبىرىن - ءبىرى باتىل قولداپ، ”ءبىر بەلدەۋ، ءبىر جولدى“ بىرگە قۇرۋدىڭ تابىسى مول بولىپ، ەكى ەل حالقىنا ناقتى پايدا جەتكىزدى. جۇڭگو جاق بوليۆيا جاقتىڭ ءوز ەلىنىڭ مەملەكەت جاعدايىنا ۇيلەسەتىن دامۋ جولىن دەربەس، ءوز - وزىنە قوجايىن بولا وتىرىپ قاراستىرۋىن قولدايدى، كەلەر جىلى جۇڭگو مەن بوليۆيانىڭ ديپلوماتيالىق قارىم - قاتىناس ورناتقاندىعىنىڭ 40 جىلدىعىن وراي ەتىپ، بوليۆيامەن ءداستۇرلى دوستىقتى ساۋلەلەندىرىپ، ستراتەگيالىق ءوزارا سەنىمدىلىكتى تەرەڭدەتىپ، ءوزارا ءتيىمدى سەلبەستىكتى كەڭەيتىپ، جۇڭگو - بوليۆيا ستراتەگيالىق سەرىكتەستىك قارىم - قاتىناسىنىڭ تىڭ ساتىعا كوتەرىلۋىنە جەتەكشىلىك ەتۋدى قالايدى.

شي جينپيڭ بىلاي دەپ باسا دارىپتەدى: ەكى جاق ۇكىمەتتەردىڭ، زاڭ شىعارۋ قۇرىلىمدارىنىڭ، ساياسي پارتيالاردىڭ، جەرگىلىكتى ورىنداردىڭ بارىس - كەلىسىن كۇشەيتىپ، ەل باسقارۋ تاجىريبەلەرىن اۋىستىرۋدى ىشكەرىلەي ورىستەتىپ، ”ءبىر بەلدەۋ، ءبىر جولدى“ بىرگە قۇرۋ باستاماسىن بوليۆيانىڭ 2025 - جىلعى دامۋ جوباسىمەن ۇشتاستىرىپ، نەگىزدىك قۇرىلعى قۇرىلىسى، ءۇستىرت اۋىل شارۋاشىلىعى، جاسىل دامۋ، سيفرلى ەكونوميكا سياقتى سالالارداعى سەلبەستىكتى كەڭەيتىپ، بىرلەسكەن مەملەكەتتەر ۇيىمى، بريكس ەلدەرى سياقتى كوپ جاقتى مەحانيزمدەگى سەلبەستىكتى تەرەڭدەتىپ، دۇنيە جۇزىندەگى وڭتۇستىك ەلدەرىنىڭ ىنتىماقتاسۋىن، ءوزىن الۋەتتەندىرۋىن جانە بىرگە دامۋىن ىلگەرىلەتۋى كەرەك. جۇڭگو جاق لاتىن امەريكاسى ءوڭىرىنىڭ ءبىر تۇلعالانۋ قۇرىلىسىن قولدايدى، بوليۆيامەن بىرگە جۇڭگو - لاتىن امەريكاسى تالقى مىنبەرى مەحانيزمى قۇرىلىسىن كۇشەيتۋدى قالايدى.

ارسە مىنالاردى ءبىلدىردى: بوليۆيا مەن جۇڭگونىڭ باۋىرلاستىق سۇيىسپەنشىلىگى تەرەڭ، جۇڭگو جاقتىڭ بوليۆيانىڭ جاڭا تيپتى ايدارشا ۆيرۋس وكپە قابىنۋ ىندەتىن جەڭۋىنە كومەكتەسىپ، بوليۆيانىڭ ەكونوميكالىق، قوعامدىق دامۋىن جەبەگەنىنە العىس ايتامىن. ءتوراعا شي جينپيڭنىڭ باسشىلىعىندا، جۇڭگو ۇلگىسىندەگى وسىزامانداندىرۋدا وراسان زور تابىستارعا قول جەتىپ، بوليۆيا سياقتى ەلدەردىڭ دامۋىنا ماڭىزدى ۇلگى جانە جەتەكشىلىك ازىرلەدى. ءتوراعا شي جينپيڭنىڭ بىرنەشە كۇننىڭ الدىندا پەرۋدەگى چيانكاي پورتىن اشقانىن قۇتتىقتايمىن. بوليۆيا جاق جۇڭگو جاقپەن بىرگە كەلەر جىلى ديپلوماتيالىق قارىم - قاتىناس ورناتۋدىڭ 40 جىلدىعىن قۇتتىقتاپ، ستراتەگيالىق سەرىكتەستىك قارىم - قاتىناستى ونان ارى تەرەڭدەتىپ، نەگىزدىك قۇرىلعىلاردى ۇلاستىرۋ - تۇتاستىرۋ سياقتى سالالارداعى سەلبەستىكتى كۇشەيتىپ، بوليۆيا ەلىنىڭ دامۋىنا دەم بەرىپ، حالىقتىڭ ىرىس - قۇتىن ارتتىرۋدى قالايدى. بوليۆيا جاق جۇڭگو جاقپەن بريكس ەلدەرى، جۇڭگو - لاتىن امەريكاسى تالقى مىنبەرى سياقتى كوپ جاقتى مەحانيزمدەگى سەلبەستىكتى كۇشەيتۋدى قالايدى.

ساي چي، ۋاڭ ي قاتارلىلار كەزدەسۋگە قاتىناستى.

كەلۋ قاينارى: حالىق تورابى