شي جينپيڭ ارگەنتينانىڭ زۇڭتۇڭى ميلەيمەن كەزدەستى

سول جەر ۋاقىتى 11 - ايدىڭ 19 - كۇنى تۇستەن بۇرىن مەملەكەت ءتوراعاسى شي جينپيڭ ريو - دە - جانەيرودا 20 ەل توبى باسشىلارىنىڭ باسشىلار ماجىلىسىنە قاتىناسۋ كەزىندە ارگەنتينانىڭ زۇڭتۇڭى ميلەيمەن كەزدەستى.

سۋرەتتى شينحۋا اگەنتتىگىنىڭ ءتىلشىسى جاڭ ليڭ تۇسىرگەن

«حالىق گازەتى»، 11 - ايدىڭ 19 - كۇنى، ريو - دە - جانەيرو (تىلشىلەر ليۋ شاۋحۋا، ساۋ شى - يۇن). سول جەر ۋاقىتى 11 - ايدىڭ 19 - كۇنى تۇستەن بۇرىن مەملەكەت ءتوراعاسى شي جينپيڭ ريو - دە - جانەيرودا 20 ەل توبى باسشىلارىنىڭ باسشىلار ماجىلىسىنە قاتىناسۋ كەزىندە ارگەنتينانىڭ زۇڭتۇڭى ميلەيمەن كەزدەستى.

شي جينپيڭ بىلاي دەپ اتاپ كورسەتتى: جۇڭگو مەن ارگەنتينا ديپلوماتيالىق قارىم - قاتىناس ورناتقان جارتى عاسىردان استام ۋاقىتتان بەرى ەكى جاق ءوزارا قۇرمەت ەتۋگە، تەڭ تۇرعىدا مامىلە جاساۋعا، ءوزارا پايدا جەتكىزىپ، تەڭ يگىلىككە كەنەلۋگە تاباندى بولدى. جۇڭگونىڭ ارگەنتيناعا قاراتقان ساياساتى باستان - اياق ارگەنتيناداعى جالپى حالىققا باعىتتالدى، جۇڭگو - ارگەنتينا سەلبەستىگى دە جالپى حالىققا باقىت جاراتتى. بيىل − جۇڭگو مەن ارگەنتينانىڭ جالپى بەتتىك ستراتەگيالىق سەرىكتەستىك قارىم - قاتىناس ورناتقاندىعىنىڭ 10 جىلدىعى، ەكى ەل قارىم - قاتىناسى بۇرىنعىعا مۇراگەر بولىپ، كەيىنگىگە جول اشۋدىڭ ماڭىزدى ساتىندە تۇر. جۇڭگو جاق ەكى ەل حالقىنىڭ ءداستۇرلى دوستىعىن قاستەرلەيدى، ارگەنتينانىڭ رەفورما ارقىلى ءوز ەلىنىڭ مەملەكەت جاعدايىنا ۇيلەسەتىن دامۋ جولىن قاراستىرۋىن قولدايدى، ارگەنتينامەن بىرگە جۇڭگو مەن ارگەنتينانىڭ جالپى بەتتىك ستراتەگيالىق سەرىكتەستىك قارىم - قاتىناسىنىڭ ۇزاق ۋاقىت ورنىقتى دامۋىن ىلگەرىلەتىپ، ءوز ەلدەرىنىڭ دامۋىنا اناعۇرلىم ويداعىداي دەم بەرۋدى قالايدى.

شي جينپيڭ بىلاي دەپ باسا دارىپتەدى: قازىر دۇنيە ءجۇزىنىڭ جاعدايىندا تەرەڭ وزگەرىستەر تۋىلۋدا، جۇڭگو مەن ارگەنتينا ءبىر - ءبىرىنىڭ وزەكتى مۇددەسى مەن ءجىتى قاداعالاپ وتىرعان كەلەلى ىستەرىن ۇزدىكسىز باتىل قولداپ، ءار دارەجەلى، ءار سالاداعى بارىس - كەلىستى جيىلەتىپ، گۋمانيتارلىق اۋىس - كۇيىستى، سەلبەستىكتى جەبەپ، جۇڭگو مەن ارگەنتينانىڭ دوستىعىن جۇرت جۇرەگىنە اناعۇرلىم تەرەڭ ۇيالاتۋى كەرەك. جۇڭگو مەن ارگەنتينانىڭ ەكونوميكا - ساۋدا قۇرىلىمى جوعارى دارەجەدە ءبىرىن - ءبىرى تولىقتايدى، سەلبەستىك بولاشاعى كەڭ، ارگەنتينا جاقتىڭ جۇڭگونىڭ جوعارى دەڭگەيدەگى سىرتقا ەسىك اشۋى الا كەلگەن ماڭىزدى ورايدى مىقتى يگەرىپ، جۇڭگوداعى بازار ۇلەسىن ونان ارى كەڭەيتۋىن قارسى الامىز. جۇڭگو جاق ارگەنتينا جاقپەن ”ءبىر بەلدەۋ، ءبىر جولدى“ جوعارى ساپامەن بىرگە قۇرۋدى ۇزدىكسىز ىلگەرىلەتىپ، ەنەرگيا، كەن كاسىبى، نەگىزدىك قۇرىلعى، اۋىل شارۋاشىلىعى، عىلىم - تەحنيكادا جاڭالىق اشۋ، سيفرلى ەكونوميكا سياقتى سالالارداعى سەلبەستىكتى تەرەڭدەتۋدى قالايدى. جۇڭگو جاق سونداي - اق ارگەنتينا جاقپەن فينانس سەلبەستىگىن ۇزدىكسىز ورىستەتىپ، ارگەنتينا جاقتىڭ ەكونوميكا، فينانس ورنىقتىلىعىن قورعاۋىنا دەم بەرۋدى قالايدى.

ميلەي مىنالاردى ءبىلدىردى: ءتوراعا شي جينپيڭمەن دوستىق قاتىناس ورناتقانىما توتەنشە قۋانىشتامىن. جۇڭگو جاقتىڭ ارگەنتينانىڭ ەل ىشىندەگى ەكونوميكا، فينانس جاعدايىن ورنىقتىرۋىنا كورسەتكەن قاستەرلى كومەگىنە العىس ايتامىن. ارگەنتينا مەن جۇڭگونىڭ ءداستۇرلى دوستىعى تەرەڭ. ارگەنتينا جۇڭگونىڭ سەنىمدى جانە ورنىقتى سەلبەستىك سەرىگى بولۋدى ءۇمىت ەتەدى. ارگەنتينا جاق جۇڭگونىڭ تايۋان ماسەلەسىندەگى تۇرعىسىن باتىل قولدايدى، ءبىر جۇڭگو پرينسيبىن باتىل ۇستانادى. ارگەنتينا جاق جۇڭگو جاقپەن ەكونوميكا - ساۋدا، ەنەرگيا، كەن ونىمدەرى، فينانس سياقتى سالالارداعى سەلبەستىكتى اناعۇرلىم جيىلەتۋدى ءۇمىت ەتەدى، ءتىپتى دە كوپ جۇڭگو كاسىپورىندارىنىڭ ارگەنتيناعا بارىپ قارجى قوسىپ، سەلبەستىك جاساۋىن قارسى الادى، ارگەنتينادا قارجى قوسقان كاسىپورىندارعا تاماشا شارۋاشىلىق - ساۋدا ورتاسىن ازىرلەپ، كاسىپورىنداردىڭ ورىندى ۇقىق - مۇددەسىن زاڭ بويىنشا قامتاماسىز ەتۋدى قالايدى. ارگەنتينا جاق ءتوراعا شي جينپيڭنىڭ 20 ەل توبى باسشىلارىنىڭ باسشىلار ماجىلىسىندە دۇنيە جۇزىلىك باسقارۋ جونىندە بايىمداعان ەگجەي - تەگجەيلى باستاماسىن ايرىقشا القايدى، جۇڭگومەن قارىم - قاتىناستى، سەلبەستىكتى كۇشەيتۋدى قالايدى. ارگەنتينا جاق جۇڭگو - لاتىن امەريكاسى تالقى مىنبەرىن ونان ارى ويداعىداي وتكىزۋدى قولدايدى، لاتىن امەريكاسى مەن جۇڭگونىڭ قارىم - قاتىناسىنىڭ دامۋىن جەبەۋدە بەلسەندى رول اتقارۋدى قالايدى.

ساي چي، ۋاڭ ي قاتارلىلار كەزدەسۋگە قاتىناستى.

كەلۋ قاينارى: حالىق تورابى