شي جينپيڭ گەرمانيانىڭ زۇڭليى شولتسپەن كەزدەستى

سول جەر ۋاقىتى 11 - ايدىڭ 19 - كۇنى تۇستەن بۇرىن مەملەكەت ءتوراعاسى شي جينپيڭ ريو - دە - جانەيرودا 20 ەل توبى باسشىلارىنىڭ باسشىلار ماجىلىسىنە قاتىناسۋ كەزىندە گەرمانيانىڭ زۇڭليى شولتسپەن كەزدەستى.

سۋرەتتى شينحۋا اگەنتتىگىنىڭ ءتىلشىسى شيە حۋانچى تۇسىرگەن

«حالىق گازەتى»، 11 - ايدىڭ 19 - كۇنى، ريو - دە - جانەيرو (تىلشىلەر ما فەي، شۇي فاڭ). سول جەر ۋاقىتى 11 - ايدىڭ 19 - كۇنى تۇستەن بۇرىن مەملەكەت ءتوراعاسى شي جينپيڭ ريو - دە - جانەيرودا 20 ەل توبى باسشىلارىنىڭ باسشىلار ماجىلىسىنە قاتىناسۋ كەزىندە گەرمانيانىڭ زۇڭليى شولتسپەن كەزدەستى.

شي جينپيڭ بىلاي دەپ اتاپ كورسەتتى: بيىل 4 - ايدا ءسىز جۇڭگودا ساپاردا بولدىڭىز، ءبىز بۇكپەسىز، ىشكەرىلەي، ناتيجەلى اۋىس - كۇيىس جاسادىق. جارتى جىلدان استام ۋاقىتتان بەرى ەكى ەل جاسىل دامۋ، باياندى قاتىناس، افريكا اۋىل شارۋاشىلىق سەلبەستىگى سياقتى سالالارداعى سەلبەستىكتە ماڭىزدى تابىستارعا قول جەتكىزدى، جۇڭگو - گەرمانيا قارىم - قاتىناسى تىڭ تىرشىلىك تىنىسى مەن ومىرشەڭدىك كۇشىن ۇزدىكسىز تاسقىنداتتى. قازىر دۇنيە ءجۇزىنىڭ 100 جىلدىق وزگەرىس جاعدايى جەدەل قۇبىلىپ، دۇنيە ءجۇزىنىڭ دامۋى شەشۋشى جول ايىرىعىندا تۇر. جۇڭگو مەن گەرمانيا دۇنيە جۇزىندەگى ەكىنشى، ءۇشىنشى ۇلكەن ەكونوميكالىق تۇلعا جانە ماڭىزدى ىقپالعا يە ءىرى ەل رەتىندە، ۇزاق بولاشاقتىق جانە ستراتەگيالىق تۇرعىدان جۇڭگو مەن گەرمانيانىڭ جان - جاقتى ستراتەگيالىق سەرىكتەستىك قارىم - قاتىناسىن بەكەمدەۋگە تاباندى بولىپ، ءوزارا تابىسقا جەتۋ سەلبەستىك حيكايالارىن ۇزدىكسىز جازۋى كەرەك.

شي جينپيڭ بىلاي دەپ باسا دارىپتەدى: جۇڭگو جاق گەرمانياعا قاراتقان ساياساتىنىڭ وسكەلەڭ ورنىقتىلىعى مەن ۇلاسپالىلىعىن ساقتايدى، گەرمانيا جاقپەن بىرگە ءبىر - ءبىرىنىڭ وزەكتى مۇددەسى مەن ءجىتى قاداعالاپ وتىرعان كەلەلى ىستەرىنە قۇرمەت ەتۋگە تاباندى بولۋدى، پارىقتاردى ساقتاپ، ورتاقتىققا ۇمتىلۋعا، اۋىس - كۇيىس جاساپ، ءوزارا ۇلگى الۋعا تاباندى بولۋدى قالايدى. جۇڭگو مەن گەرمانيانىڭ ەكونوميكالىق مۇددەسى بارىنشا توعىستى، جۇڭگو مەن گەرمانيانىڭ سەلبەستىگى − دامۋدى بىرگە جەبەۋدىڭ، بولاشاقتى بىرگە جاراتۋدىڭ ورايى. جۇڭگو جاق گەرمانيانى جۇڭگو ۇلگىسىندەگى وسىزامانداندىرۋدى ىلگەرىلەتۋدەگى ماڭىزدى سەلبەستىك سەرىگى دەپ قاراپ، گەرمانيا كاسىپورىندارىنا ۇزدىكسىز كەڭ بازار ورايىن ازىرلەيدى. ەكى جاق سيفرلاندىرۋدى، زەردەلىلەندىرۋدى، تومەن كومىرتەكتى بولۋدى ارقاۋ ەتىپ، سەلبەستىكتىڭ ساپاسىن جوعارىلاتىپ، دارەجەسىن جوعارىلاتۋدى ىلگەرىلەتىپ، قول ۇستاسا بازار اشىپ، سەلبەسىپ تەڭ يگىلىككە كەنەلۋدى جۇزەگە اسىرۋى كەرەك. جۇڭگو جاق ەۆروپا − كوپ ۇيەكتەنگەن دۇنيە ءجۇزىنىڭ ماڭىزدى ۇيەگى دەپ قارايدى، ەۆروپامەن سەلبەستىك ورىستەتۋگە كۇش سالىپ، سىن - سايىسقا قول ۇستاسا توتەپ بەرىپ، جۇڭگو - ەۆروپا قارىم - قاتىناسىنىڭ باياندى، ورنىقتى، اقاۋسىز دامۋىن ىلگەرىلەتەدى. ەۆروپا وداعىنىڭ جۇڭگونىڭ ەلەكترلى اۆتوموبيلىنەن كەدەن سالىعىن ۇستەمەلەپ الۋى بۇكىل دۇنيە ءجۇزىنىڭ نازارىن اۋداردى. جۇڭگو الاۋىزدىقتاردى پىكىرلەسۋ، كەڭەسۋ ارقىلى شەشۋگە باستان - اياق تاباندى بولادى، گەرمانيانىڭ وسى ءۇشىن ۇزدىكسىز ماڭىزدى رول اتقارۋىن ءۇمىت ەتەدى.

شولتس مىنالاردى ءبىلدىردى: مەن الدىڭعى جولى جۇڭگوعا ساپارلاي كەلگەننەن بەرى گەرمانيا - جۇڭگو قارىم - قاتىناسى بەلسەندى دامۋعا قول جەتكىزدى. قازىرگى كۇردەلى حالىقارالىق جاعدايدا گەرمانيا مەن جۇڭگونىڭ قارىم - قاتىناستى، سەلبەستىكتى كۇشەيتۋى توتەنشە ماڭىزدى. گەرمانيا جاق جۇڭگو جاقپەن جان - جاقتى ستراتەگيالىق سەرىكتەستىك قارىم - قاتىناستى ونان ارى دامىتىپ، تەڭدىك، ادالدىق جانە ءوزارا قۇرمەت ەتۋ رۋحى بويىنشا ەكى جاقتى، كوپ جاقتى پىكىرلەسۋ مەن سەلبەستىكتى كۇشەيتىپ، الاۋىزدىقتاردى ۇيلەسىمدى شەشىپ، ءوزارا پايدا جەتكىزىپ، تەڭ يگىلىككە كەنەلۋدى جۇزەگە اسىرىپ، دۇنيە ءجۇزى ەكونوميكاسىنىڭ قالپىنا كەلۋىنە، ارتۋىنا جانە بىرگە گۇلدەنۋىنە ۇلەس قوسۋدى ءۇمىت ەتەدى. ەۆروپا مەن جۇڭگونىڭ ەلەكترلى اۆتوموبيل ماسەلەسىن پىكىرلەسۋ، كەلىسسوز وتكىزۋ ارقىلى تەز ارادا شەشۋىن ءۇمىت ەتەمىن، گەرمانيا جاق وسى ءۇشىن بەلسەندى قۇلشىنىس جاساۋدى قالايدى.

ەكى جاق تاعى ۋكراينا داعدارىسى، ورتا شىعىس جاعدايى سياقتى قولامتالى ماسەلەلەر جونىندە پىكىر اۋىستىردى.

ساي چي، ۋاڭ ي قاتارلىلار كەزدەسۋگە قاتىناستى.

كەلۋ قاينارى: حالىق تورابى