بەس تاراۋ بىرلەسىپ قۇجات تاراتىپ، مەكتەپ اۋلاسىنداعى ازىق - تۇلىك حاۋىپسىزدىگى قىزمەتىن كۇشەيتەدى

شينحۋا اگەنتتىگىنىڭ ءتىلشىسى جاۋ ۋىنجۇن 1 – ايدىڭ 14 – كۇنى بەيجيڭنەن حابارلايدى. ءتىلشىنىڭ 1 - ايدىڭ 14 – كۇنى بازاردى باقىلاۋ – باسقارۋ باس مەڭگەرمەسىنەن ۇعىسۋىنشا، مەملەكەتتىك كەڭەستىڭ ازىق – تۇلىك حاۋىپسىزدىگى كوميتەتى كەڭسەسى وقۋ – اعارتۋ مينيسترلىگى، قوعام حاۋىپسىزدىگى مينيسترلىگى، مەملەكەتتىك دەنساۋلىق ساقتاۋ – سالاماتتىق كوميتەتى، بازاردى باقىلاۋ – باسقارۋ باس مەڭگەرمەسى قاتارلى ورىندارمەن بىرگە بىرنەشە كۇننىڭ الدىندا «مەكتەپ اۋلاسىنداعى ازىق - تۇلىك حاۋىپسىزدىگى قىزمەتىن اناعۇرلىم كۇشەيتۋ جونىندەگى حابارلاندىرۋدى» باسىپ تاراتىپ، نازاردى مەكتەپ اۋلاسىنداعى ازىق - تۇلىك حاۋىپسىزدىگىنە قاتىستى تۇلعالىق جاۋاپكەرشىلىككە، باسقارۋ جاۋاپكەرشىلىگىنە جانە وسىزاماندانعان جونگە سالۋ ورەسىنە شوعىرلاندىرىپ، جەر - جەردىڭ مەكتەپ اۋلاسىنداعى ازىق - تۇلىك حاۋىپسىزدىگىنىڭ تۇتاس تىزبەگىندەگى حاۋىپ - قاتەردەن ساقتانۋ جانە ونى تىزگىندەۋ جاعىنداعى تۇزىمدىك مەحانيزمدى اناعۇرلىم اقاۋسىزداندىرۋى، مەكتەپ اۋلاسىنداعى ازىق-تۇلىك حاۋىپسىزدىگىنە كەپىلدىك ەتۋدى كۇشەيتۋى جونىندە ورنالاستىرۋ جاساعان.

ۇقتىرۋدا مىنالار تالاپ ەتىلگەن: مەكتەپ باستىعى (بالالار باقشاسىنىڭ باستىعى) ءبىرىنشى جاۋاپتى ادامنىڭ جاۋاپكەرشىلىگىن شىنايى اتقارۋى كەرەك. مەكتەپتەر اۋرۋ الا جۇرەتىن ورگانيزمدەرىنەن ساقتانۋدى كۇشەيتىپ، قايتالاپ پايدالانىلاتىن ىدىس - اياقتاردى جۋىپ دەزينفەكسيالاۋ، كوپ مولشەردەگى ازىق - تۇلىك ماتەريالدارىن ساتىپ الۋ جانە زات ەنگىزۋ ءتۇزىمىن تياناقتاندىرۋدى ارناعا ءتۇسىرۋى كەرەك. كوتەرمەگە الىپ تيجارات جۇرگىزگەن جاعدايدا، مەردىگەر شاقىرۋ ءتارتىبى بويىنشا مەردىگەر شاقىرۋدى قاتاڭ ۇيىمداستىرىپ، اسحانانى كوتەرمەگە الىپ تيجارات جۇرگىزۋدى باسقارۋ ءتۇزىمىن ورناتۋى؛ مەكتەپ تاماقتى سىرتتان قامداعان جاعدايدا، كوللەكتيۆ تاماقتاندىرۋ، تاماق جەتكىزىپ بەرۋ تولىمدىلىعىنا يە مەكتەپ سىرتىندا تاماقپەن قامداۋشى ورىنداردى تاڭداپ، باعالاۋ جانە قاتاردان قالدىرۋ مەحانيزمىن قاتاڭ اتقارۋى كەرەك.

ۇقتىرۋدا مىنالار باسا دارىپتەلدى: جەرگىلىكتى ءار دارەجەلى پارتكوم مەن ۇكىمەتتىڭ باستى جاۋاپتىلارى سول جەردەگى مەكتەپ اۋلاسىنداعى ازىق ـ تۇلىك حاۋىپسىزدىگى قىزمەتىنە باسشىلىقتى جاپپاي كۇشەيتۋى كەرەك. جەر – جەردەگى ازىق تۇلىك حاۋىپسىزدىگى كوميتەتى كەڭسەلەرى، وقۋ – اعارتۋدى اكىمشىلىك جاقتان باسقارۋ تاراۋلارى، دەنساۋلىق ساقتاۋ – سالاماتتىق تاراۋلارى، قوعام حاۋىپسىزدىگى ورگاندارى، بازاردى باقىلاۋ – باسقارۋ تاراۋلارى مەكتەپ اۋلاسىنداعى ازىق ـ تۇلىك حاۋىپسىزدىگى قىزمەتىن مىندەت ـ جاۋاپكەرشىلىگى بويىنشا كۇشەيتىپ، تاراۋلار ارا سەلبەستىكتى كۇشەيتىپ، حاۋىپ ـ قاتەرگە قاتىستى اۋىس ـ كۇيىس جاساۋدى، كەڭەسۋدى مەرزىم بويىنشا ۇيىمداستىرىپ جانە ورىستەتىپ، مەكتەپ اۋلاسىنداعى ازىق ـ تۇلىك حاۋىپسىزدىگىن بىرگە يگەرىپ، بىرگە باسقاراتىن قىزمەت مەحانيزمىن اقاۋسىزداندىرۋى كەرەك.

ۇقتىرۋدا مىنالار اتاپ كورسەتىلدى: مەكتەپ اۋلاسىنداعى ازىق – تۇلىك حاۋىپسىزدىگىن وسىزاماندانعان جونگە سالۋ ورەسىن ۇزدىكسىز جوعارىلاتىپ، «ينتەرنەت +» زەردەلى باقىلاپ – باسقارۋدان پايدالانۋدى جولعا قويىپ، ازىق – تۇلىك حاۋىپسىزدىگى جاعىنداعى ارىز – شاعىمدى ءبىر جاقتى ەتۋ مەحانيزمى مەن قوعام ات سالىساتىن باقىلاۋ مەحانيزمىن كەمەلدەندىرۋ كەرەك.

كەلۋ قاينارى: حالىق تورابى