شي جينپيڭ ەۆروپا القالار كەڭەسىنىڭ ءتوراعاسى كوستامەن تەلەفوندا سويلەستى

شينحۋا اگەنتتىگى، 1 - ايدىڭ 14 - كۇنى، بەيجيڭ. 1 - ايدىڭ 14 - كۇنى تۇستەن كەيىن مەملەكەت ءتوراعاسى شي جينپيڭ ۋادە بويىنشا ەۆروپا القالار كەڭەسىنىڭ ءتوراعاسى كوستامەن تەلەفوندا سويلەستى.

شي جينپيڭ كوستانىڭ ەۆروپا القالار كەڭەسىنىڭ ءتوراعاسى بولىپ تاعايىندالعاندىعىن تاعى ءبىر رەت قۇتتىقتاپ، بىلاي دەپ اتاپ كورسەتتى: بيىل − جۇڭگونىڭ ەۆروپا وداعىمەن ديپلوماتيالىق قارىم - قاتىناس ورناتقاندىعىنىڭ 50 جىلدىعى، الدىڭعىعا مۇراگەر بولىپ، كەيىنگىگە جول اشۋدىڭ ماڭىزدى ءتۇيىنى. جۇڭگو - ەۆروپا قارىم - قاتىناسىنىڭ دامۋ بارىسى ەكى جاق ءوزارا قۇرمەت ەتىپ، تەڭ تۇرعىدا مامىلە جاساپ، بۇكپەسىز پىكىرلەسسە بولعانى، سەلبەستىكتى ىلگەرىلەتىپ، ءىرى ىستەردى ىستەۋگە بولاتىندىعىن كورسەتتى. مۇراتتاس بولۋ − سەرىك بولعاندىق، پارىقتاردى قويا تۇرىپ، ورتاقتىققا ۇمتىلۋ دا − سەرىك بولعاندىق. تەتىك ءوز حالقى تاڭداعان قوعامدىق ءتۇزىم مەن دامۋ جولىنا، ءبىر - ءبىرىنىڭ وزەكتى مۇددەسى مەن كوڭىل ءبولىپ وتىرعان كەلەلى ماسەلەلەرىنە قۇرمەت ەتۋدە. جۇڭگو جاق باستان - اياق ەۆروپانى كوپ ۇيەكتى دۇنيە جۇزىندەگى ماڭىزدى ۇيەك دەپ قاراپ، ەۆروپانىڭ ءبىر تۇلعالانۋىن جانە ەۆروپا وداعىنىڭ ستراتەگيالىق دەربەستىگىن قولداپ كەلەدى. ەكى جاق جۇڭگو - ەۆروپا قارىم - قاتىناسىنىڭ دامۋ تاجىريبەلەرىن قورىتىندىلاپ، ونان ماڭىزدى شابىت الىپ، جۇڭگو - ەۆروپا قارىم - قاتىناسىنىڭ ساياسي نەگىزىن بىرگە ويداعىداي قورعاپ، جۇڭگو - ەۆروپا قارىم - قاتىناسىنىڭ جاقسارۋىن، العا دامۋىن ىلگەرىلەتىپ، جۇڭگو - ەۆروپا حالقىنا اناعۇرلىم زور باقىت جاراتىپ، اۋمالى - توكپەلى حالىقارالىق جاعدايعا اناعۇرلىم كوپ ورنىقتىلىق جانە تۇراقتىلىق ۇستەۋى كەرەك.

شي جينپيڭ بىلاي دەپ باسا دارىپتەدى: جۇڭگو مەن ەۆروپا وداعىندا ءتۇبىرلى مۇددە قاقتىعىسى جوق، وڭىرلىك ساياسي قايشىلىق تا جوق، ءوزارا تابىسقا جەتكەن سەرىكتەر. 50 جىلدان بەرى جۇڭگو - ەۆروپا قارىم - قاتىناسى وزدەرىنىڭ دامۋىنا دەم بەرىپ قانا قالماستان، دۇنيە ءجۇزىنىڭ بەيبىتشىلىگى مەن گۇلدەنۋىنە دە ماڭىزدى ۇلەس قوستى. حالىقارالىق جاعداي نەعۇرلىم قاتاڭ، كۇردەلى بولعان سايىن، جۇڭگو مەن ەۆروپا وداعى ديپلوماتيالىق قارىم - قاتىناس ورناتۋداعى اۋەلگى ماقساتتان جازباي، ستراتەگيالىق بايلانىستى كۇشەيتىپ، ستراتەگيالىق ءوزارا سەنىمدىلىكتى ارتتىرىپ، سەرىكتەستىك قارىم - قاتىناستىڭ ورنىنا تاباندى بولۋى كەرەك. جۇڭگو ەۆروپا وداعىنا سەنىممەن قارايدى، ەۆروپا وداعىنىڭ دا جۇڭگو جاقتىڭ سەنىم ارتاتىن سەلبەستىك سەرىگى بولۋىن ءۇمىت ەتەدى. جۇڭگو مەن ەۆروپانىڭ ەكونوميكا - ساۋدا سەلبەستىگى باسىمدىقتار ارقىلى ءبىرىن - ءبىرى تولىقتاپ، ءوزارا پايدا جەتكىزىپ، تەڭ يگىلىككە كەنەلتەدى، ەكى جاق تا − كوپ جاقتى ساۋدا ءتۇزىلىسىنىڭ قورعاۋشىسى، ەكونوميكالىق جاقتا بىرگە جاساۋدىڭ قۋاتتى قارىم - قاتىناسىن قالىپتاستىردى. جۇڭگو جوعارى ساپالى دامۋعا تاباندى بولىپ، جوعارى دەڭگەيدەگى سىرتقا ەسىك اشۋدى كەڭەيتىپ، جۇڭگو - ەۆروپا سەلبەستىگىنە تىڭ وراي اكەلەدى. جۇڭگو مەن ەۆروپا ەسىك اشۋدى ءوزارا كەڭەيتىپ، قازىرگى سەلبەستىك مەحانيزمىن بەكەمدەپ، سەلبەستىكتىڭ جاڭا ارتۋ تۇيىندەرىن قالىپتاستىرۋى كەرەك. ەكى جاق ديپلوماتيالىق قارىم - قاتىناس ورناتۋدىڭ 50 جىلدىعىن قۇتتىقتاۋ قيمىلىن ويداعىداي وتكىزىپ، گۋمانيتارلىق اۋىس - كۇيىس پەن ادامداردىڭ بارىس - كەلىسىن جيىلەتىپ، جۇڭگو - ەۆروپا بۇقاراسىن قوس باعىتتا اتتانۋعا شابىتتاندىرىپ، جەرگىلىكتى ورىنداردىڭ بارىس - كەلىسى مەن وقۋ - اعارتۋ سەلبەستىگىن قولداپ، جۇڭگو - ەۆروپا دوستىعىنىڭ حالىق رايى نەگىزىن بەكەمدەۋى كەرەك.

كوستا مىنالاردى ءبىلدىردى: 2025 - جىل − ەۆروپا - جۇڭگو قارىم - قاتىناسىنىڭ ماڭىزدى جىلى. ەۆروپا جاق جۇڭگو جاقپەن بىرگە ديپلوماتيالىق قارىم - قاتىناس ورناتۋدىڭ 50 جىلدىعىن بىرگە قۇتتىقتاپ، تىلدەسۋدى، بايلانىستى كۇشەيتىپ، ستراتەگيالىق ءوزارا سەنىمدىلىكتى ارتتىرىپ، سەرىكتەستىك قارىم - قاتىناستى كۇشەيتىپ، ەۆروپا - جۇڭگو قارىم - قاتىناسىنىڭ اناعۇرلىم جاقسى داميتىن كەلەشەگىن اشۋدى قالايدى. ەۆروپا جاق جۇڭگو جاقپەن تىلدەسۋ، كەڭەسۋ ارقىلى ەكونوميكا - ساۋدا الاۋىزدىقتارىن ۇيلەسىمدى ءبىر جاقتى ەتۋدى قالايدى. ەۆروپا مەن جۇڭگو دا بىرلەسكەن مەملەكەتتەر ۇيىمى ۋستاۆىنىڭ نەگىزگى ماقساتىنا قۇرمەت ەتەدى، كوپ جاقتىلىققا تاباندى بولادى، ەركىن ساۋدانى قورعايدى، توپ قۇرىپ قارسىلاسۋعا قارسى تۇرادى، ەكى جاق باسەكەلەسپەۋى، قايتا سەلبەستىك جاساۋى كەرەك. بۇگىنگى ءداۋىر سىن - سايىسقا تولى، دۇنيە ءجۇزى ەۆروپا مەن جۇڭگونىڭ اناعۇرلىم تىعىز سەلبەسىپ، كليمات وزگەرىسى سياقتى دۇنيە جۇزىلىك سىن - سايىسقا بىرگە توتەپ بەرىپ، دۇنيە ءجۇزىنىڭ بەيبىتشىلىگى، ورنىقتىلىعى، دامۋى ءۇشىن بىرگە بەلسەندى ۇلەس قوسۋىن قاجەت ەتەدى.

ەكى جاق تاعى ۋكراينا سياقتى ماسەلەلەر جونىندە كوزقاراس اۋىستىردى، شي جينپيڭ جۇڭگو جاقتىڭ تاتۋلاستىرۋدى، كەڭەسۋدى جەبەيتىن پرينسيپتىك تۇرعىسىن باياندادى.

كەلۋ قاينارى: حالىق تورابى