لي چياڭ، جاۋ لىجي شريلانكانىڭ زۇڭتۇڭى ديساناياكپەن جەكە - جەكە كەزدەستى

شينحۋا اگەنتتىگى، 1 ـ ايدىڭ 16 ـ كۇنى، بەيجيڭ. 1 ـ ايدىڭ 16 ـ كۇنى تۇستەن كەيىن مەملەكەتتىك كەڭەستىڭ زۇڭليى لي چياڭ حالىق سارايىندا جۇڭگوعا مەملەكەتتىك ساپارمەن كەلگەن شريلانكانىڭ زۇڭتۇڭى ديساناياكپەن كەزدەستى.

لي چياڭ مىنالاردى ءبىلدىردى: جۇڭگو مەن شريلانكانىڭ ءداستۇرلى دوستىعى مىڭ جىلدان استى. ديپلوماتيالىق قارىم - قاتىناس ورناتقان 68 جىلدان بەرى ەكى ەل قارىم - قاتىناسى حالىقارالىق اۋمالى - توكپەلى وزگەرىستەردىڭ سىنىنان ءوتىپ، باستان - اياق اقاۋسىز، ورنىقتى دامىدى. كەشە ءتوراعا شي جينپيڭ زۇڭتۇڭ مىرزامەن كەڭەس وتكىزىپ، جۇڭگو ـ شريلانكا قارىم - قاتىناسىنىڭ دامۋى مەن سەلبەستىگىن تەرەڭدەتۋ جونىندە جاڭا جوبا جاسادى. جۇڭگو جاق شريلانكا جاقپەن بىرگە ەكى ەل مەملەكەت باسشىلارىنىڭ ستراتەگيالىق ورتاق تانىمىن تياناقتاندىرىپ، ءداستۇرلى دوستىقتى جالعاستىرىپ، ساياسي ءوزارا سەنىمدىلىكتى تەرەڭدەتىپ، ناقتى سەلبەستىكتى كەڭەيتىپ، جۇڭگو مەن شريلانكانىڭ شىنايى، ءوزارا كومەكتەسەتىن، ۇرپاقتان ـ ۇرپاققا جالعاسقان دوستىق ستراتەگيالىق سەلبەستىك سەرىكتەستىك قارىم ـ قاتىناسىنىڭ ۇزدىكسىز العا دامۋىن ىلگەرىلەتىپ، جۇڭگو مەن شريلانكانىڭ تاعدىرلاس ورتاق تۇلعاسىن بىرگە قۇرۋدى قالايدى.

لي چياڭ بىلاي دەپ اتاپ كورسەتتى: جۇڭگو جاق شريلانكا جاقپەن دامۋ ستراتەگياسىن ۇشتاستىرۋدى كۇشەيتىپ، ”ءبىر بەلدەۋ، ءبىر جولدى“ جوعارى ساپامەن بىرگە قۇرىپ، كولومبو پورت قالاسى جانە حانبانتوتا جالپىلىق اشۋ ءوڭىرى سياقتى سەلبەستىك نىساندارىن ىلگەرىلەتىپ، جاسىل دامۋ، سيفرلى ەكونوميكا، اۋىل شارۋاشىلىعى، تەڭىز ـ مۇحيت سياقتى سالالارداعى سەلبەستىكتى كەڭەيتىپ، ەكونوميكا ـ ساۋدا بارىس ـ كەلىسىن ۇزدىكسىز كەڭەيتىپ، اناعۇرلىم مول تابىستارعا قول جەتكىزۋدى قالايدى. جۇڭگو جاق شريلانكا جاقتىڭ اناعۇرلىم كوپ ساپالى ونىمدەرىن يمپورت ەتۋدى قالايدى، قۋاتتى جۇڭگو كاسىپورىندارىن شريلانكاعا بارىپ قارجى قوسۋعا شابىتتاندىرادى، شريلانكا جاقتىڭ شارۋاشىلىق ـ ساۋدا ورتاسىن ۇزدىكسىز جاقسارتىپ، جۇڭگو جاقتىڭ كاسىپورىندارىنا اناعۇرلىم كوپ قولايلىلىق جاراتۋىن جانە حاۋىپسىزدىك كەپىلدىگىن ازىرلەۋىن ءۇمىت ەتەدى. ەكى جاق مادەنيەت، ساياحات، جاستار، دەنە تاربيە، اقپارات قۇرالدارى، جەرگىلىكتى ورىندار سياقتى جاقتارداعى اۋىس ـ كۇيىستى، سەلبەستىكتى ۇزدىكسىز تەرەڭدەتۋى كەرەك. جۇڭگو جاق شريلانكا سياقتى ازياداعى ءار ەلمەن بىرگە ناعىز كوپ جاقتىلىقتى امالياتتا ايگىلەپ، ورتاق مۇددەنى قورعاۋدى قالايدى.

ديساناياك مىنالاردى ءبىلدىردى: جۇڭگو ۇكىمەتى حالىقتىڭ باقىتىنا ايرىقشا ءمان بەرەدى، ەكونوميكالىق، قوعامدىق دامۋدا دۇنيە ءجۇزىن جالت قاراتقان تابىستارعا قول جەتكىزدى، سونىمەن بىرگە، ءوزارا قۇرمەت ەتۋ، ءوزارا پايدا جەتكىزۋ سەلبەستىك ۇستانىمىنان جازباي، مەملەكەت پەن مەملەكەت قارىم - قاتىناسىن دامىتىپ، دۇنيە ءجۇزىنىڭ بەيبىت دامۋىنا ماڭىزدى ۇلەس قوستى، شريلانكا بۇعان سۇيىنەدى. شريلانكا مەن جۇڭگونىڭ دوستىعى باياندى، بەرىك، شريلانكا جاق جۇڭگو جاقتىڭ شريلانكانىڭ ۇلتتىق تاۋەلسىزدىگى مەن ەكونوميكالىق، قوعامدىق دامۋىن جۇزەگە اسىرۋىنا قاستەرلى كومەك كورسەتكەنىنە العىس ايتادى. شريلانكا ۇكىمەتى جۇڭگومەن قارىم ـ قاتىناسقا ايرىقشا ءمان بەرەدى، ءبىر جۇڭگو پرينسيبىنە باستان ـ اياق تاباندى بولادى، ءتوراعا شي جينپيڭ العا قويعان ءۇش ۇلكەن دۇنيە جۇزىلىك باستامانى القايدى جانە قولدايدى. شريلانكا جاق جۇڭگو جاقتىڭ كەدەيلىكتى ازايتۋ، كاسىپ سالاسىن دامىتۋ سياقتى تاجىريبەلەرىنەن ۇيرەنىپ، ۇلگى الىپ، ەكى ەلدىڭ ەكونوميكا - ساۋدا، قارجى قوسۋ، ەنەرگيا، عىلىم - تەحنيكا، نەگىزدىك قۇرىلعى قۇرىلىسى سياقتى سالالارداعى ناقتى سەلبەستىگىندە اناعۇرلىم كوپ ناقتى جەتىستىكتەرگە قول جەتكىزۋىن ىلگەرىلەتىپ، حالىقارالىق كوپ جاقتى ىستەردەگى كەڭەسۋدى، سەلبەسۋدى كۇشەيتىپ، شريلانكا - جۇڭگو قارىم - قاتىناسىنىڭ جاڭا تاراۋىن جازۋدى قالايدى.

ۋ جىڭلۇڭ كەزدەسۋدە بىرگە بولدى.

شينحۋا اگەنتتىگى، 1 - ايدىڭ 16 ـ كۇنى، بەيجيڭ. مەملەكەتتىك حالىق قۇرىلتايى تۇراقتى كوميتەتىنىڭ باستىعى جاۋ لىجي 1 - ايدىڭ 16 ـ كۇنى بەيجيڭدە شريلانكانىڭ زۇڭتۇڭى ديساناياكپەن كەزدەستى.

جاۋ لىجي مىنالاردى ءبىلدىردى: كەشە ءتوراعا شي جينپيڭ زۇڭتۇڭ مىرزامەن اسا تابىستى كەڭەس وتكىزىپ، ەكى ەل قارىم - قاتىناسىنىڭ دامۋىنا جاڭا ستراتەگيالىق جەتەكشىلىك جاسادى. جۇڭگو جاق شريلانكا جاقپەن بىرگە قۇلشىنىپ، ەكى ەل مەملەكەت باسشىلارى كەلىسكەن ماڭىزدى ورتاق تانىمدى تياناقتاندىرىپ، جۇڭگو مەن شريلانكانىڭ تاعدىرلاس ورتاق تۇلعاسىن قۇرۋدى نەگىزگى جەلى ەتىپ، ەكى ەلدىڭ شىنايى ءوزارا كومەكتەسەتىن، ۇرپاقتان ـ ۇرپاققا جالعاسقان دوستىق ستراتەگيالىق سەلبەستىك سەرىكتەستىك قارىم - قاتىناسىن ۇزدىكسىز تەرەڭدەتۋدى قالايدى. جۇڭگو مەملەكەتتىك حالىق قۇرىلتايى شريلانكا پارلامەنتىنىڭ جۇڭگو مەن شريلانكانىڭ دوستىق سەلبەستىگىن بەلسەنە قولداعاندىعىن القايدى، ەكى ەلدىڭ زاڭ شىعارۋ قۇرىلىمدارىنىڭ ءار دارەجەلى بارىس ـ كەلىسىن ۇزدىكسىز تەرەڭدەتىپ، زاڭ شىعارۋ، باقىلاۋ سياقتى جاقتارداعى تاجىريبە اۋىس ـ كۇيىسىن كۇشەيتىپ، ءوز ەلدەرىنىڭ دامۋ قۇرىلىسى مەن ەكى ەلدىڭ ناقتى سەلبەستىگىنە دەم بەرۋدى قالايدى.

ديساناياك مىنانى ءبىلدىردى: شريلانكا مەن جۇڭگونىڭ دوستىعى ارىدان باستاۋ الادى. شريلانكا جاق جۇڭگو جاقپەن ەكونوميكا، مادەنيەت، وقۋ ـ اعارتۋ، ساياحات سياقتى سالالارداعى ناقتى سەلبەستىكتى تەرەڭدەتىپ، زاڭ شىعارۋ قۇرىلىمدارىنىڭ اۋىس ـ كۇيىسىن كۇشەيتىپ، شريلانكا ـ جۇڭگو قارىم - قاتىناسىن تىڭ دەڭگەيگە كوتەرۋدى قالايدى.

ۋاڭ دۇڭميڭ كەزدەسۋدە بىرگە بولدى.

كەلۋ قاينارى: حالىق تورابى