جۇڭگو ازاماتتارىنىڭ الدانىپ شەكارا سىرتىنا بارىپ، زاڭسىز قاماۋعا الىنۋى دەلوسىنداعى باستى قىلمىس كۇماندىسى يان X لەي تەرگەۋگە الىندى 

شينحۋا اگەنتتىگىنىڭ ءتىلشىسى شيۇڭ فىڭ 1 – ايدىڭ 26 – كۇنى بەيجيڭنەن حابارلايدى. جۋىردا جۇڭگو ازاماتتارىنىڭ تايلاند – بيرما شەكاراسىنا الدانىپ بارعاننان كەيىن زاڭسىز قاماۋعا الىنۋى، تەلەكوم مەن ينتەرنەتتەن پايدالانىپ الدامكوستىكپەن شۇعىلدانۋى قاتارلى دەلولار قوعامنىڭ نازارىن اۋداردى. قوعام حاۋىپسىزدىگى مينيسترلىگى قاتىستى جەرگىلىكتى ورىندارداعى قوعام حاۋىپسىزدىگى ورگاندارىن ادامداردى قۇتقارۋ جانە دەلونى بارلاۋ، تەكسەرۋ قىزمەتىن كۇش سالا ورىستەتۋگە جەدەل ورنالاستىردى، سونىمەن بىرگە، قىزمەت گرۋپپاسىن شەتەلگە جىبەرىپ قىزمەت ورىستەتتى. ءتىلشىنىڭ 1 – ايدىڭ 26 – كۇنى قوعام حاۋىپسىزدىگى مينيسترلىگىنەن ۇعىسۋىنشا، قوعام حاۋىپسىزدىگى مينيسترلىگى جىبەرگەن قىزمەت گرۋپپاسى مەن ەلىمىزدىڭ تايلاندتا تۇراتىن ەلشىلىگى كۇش سالا قىزمەت ىستەۋ ارقىلى، تايلاندتىڭ زاڭ اتقارۋشى تاراۋلارىنىڭ سەلبەسۋىندە، قاتىستى دەلوداعى ماڭىزدى قىلمىس كۇماندىسى يان X لەيدى (ينتەرنەتتەگى لاقاپ اتى ”يانشىليۋ“) قولعا تۇسىرگەن ءارى 1 – ايدىڭ 25 - كۇنى كەشتە ەلىمىزگە قايتارىپ اكەلگەن. قازىر قوعام حاۋىپسىزدىگى ورگاندارى دەلونى تەكسەرۋ قىزمەتىن كۇش سالا ورىستەتۋدە.

قوعام حاۋىپسىزدىگى مينيسترلىگىنىڭ قاتىستى جاۋاپتىسى بىلاي دەدى: قوعام حاۋىپسىزدىگى ورگاندارى الدا اناعۇرلىم زور بەكىممەن جانە تەبىنمەن قاتاڭ سوققى بەرۋدىڭ سۇراپىل جورىعىن ۇزدىكسىز قوزعاپ، زاڭ اتقارۋ جاعىنداعى حالىقارالىق سەلبەستىكتى ۇزدىكسىز تەرەڭدەتىپ، قاتىستى ەلدەرمەن سايكەسۋدى، سەلبەسۋدى كۇشەيتىپ، زاڭعا قايشىلىق جاساعان قىلمىس كۇماندىلارىن كۇش سالا تۇتقىنداپ، قامالىپ قالعانداردى قۇتقارۋعا كۇش سالا سايكەسىپ، شەكارا اتتاعان قىلمىسكەرلەردىڭ ءومىر ءسۇرۋ، دامۋ كەڭىستىگىن مۇمكىندىكتىڭ بارىنشا ازايتىپ، ەلىمىز ازاماتتارىنىڭ باس اماندىعى مەن مال ـ مۇلكىنىڭ حاۋىپسىزدىگىن باتىل قورعايمىز. قوعام حاۋىپسىزدىگى ورگاندارى بارشا جۇرتشىلىققا، ءسوز جوق، قىراعىلىقتى ارتتىرىپ، ساقتىقتى كۇشەيتىپ، شەكارا سىرتىندا جوعارى ەڭبەكاقىمەن قىزمەتكەر قابىلداۋ، جۇمىسكەر قابىلداۋ دەيتىن ينفورماتسيالارعا سەنە كەتپەۋدى، زاڭعا قايشى قىلمىس وتكىزۋدەن ساقتانۋدى ەسكەرتتى.

كەلۋ قاينارى: حالىق تورابى