حان جىڭ حالىقارالىق وليمپيادا كوميتەتىنىڭ ءتوراعاسى باحپەن كەزدەستى

شينحۋا اگەنتتىگى، 2 - ايدىڭ 18 - كۇنى بەيجيڭنەن بەرگەن حابارى: 2 - ايدىڭ 18 - كۇنى مەملەكەت ءتوراعاسىنىڭ ورىنباسارى حان جىڭ بەيجيڭدە حالىقارالىق وليمپيادا كوميتەتىنىڭ ءتوراعاسى باحپەن كەزدەستى.

حان جىڭ مىنالاردى ءبىلدىردى: جۇڭگو جاق ءتوراعا باحتىڭ حالىقارالىق وليمپيادا كوميتەتى مەن جۇڭگو اراسىنداعى سەلبەستىكتى جەبەۋگە قوسقان ماڭىزدى ۇلەسىن ايرىقشا القايدى، ءتوراعا شي جينپيڭ ءتوراعا باح پەن حالىقارالىق وليمپيادا كوميتەتىنىڭ قىزمەتىن ايرىقشا تۇراقتاندىردى. حاربين ازيا قىسقى وليمپيادا جينالىسى ەندى عانا تابىسپەن اياقتاپ، دۇنيە جۇزىنە ”جۇڭگوشا ەرەكشەلىككە يە، ازيا كەلبەتىن ايگىلەگەن، تارتىمدى دا تاماشا“ جوعارى دەڭگەيلى قار - مۇز سپورتى سالتاناتىن كورسەتتى. جۇڭگو جاق دەنە تاربيە ىستەرىن دامىتۋعا باستان - اياق ءمان بەرىپ، حالىقارالىق وليمپيادا ىستەرىنە بەلسەنە ات سالىسادى، اناعۇرلىم كوپ سالادا حالىقارالىق وليمپيادا كوميتەتىمەن سەلبەستىكتى تەرەڭدەتىپ، وليمپيادا سپورتىنىڭ دامۋىن بىرگە ىلگەرىلەتىپ، دۇنيە ءجۇزىنىڭ بەيبىتشىلىگىن، ىنتىماعىن جانە العا باسۋىن جەبەۋگە تىڭ ۇلەس قوسۋدى قالايدى.

باح حاربين ازيا قىسقى سپورت جارىسىنىڭ تابىستى بولعاندىعىن قۇتتىقتادى، جۇڭگونىڭ حالىقارالىق وليمپيادا كوميتەتىن ۇزاق ۋاقىت قولداعاندىعىنا العىس ايتتى، حالىقارالىق وليمپيادا كوميتەتىنىڭ جۇڭگومەن سەلبەستىكتى كۇشەيتىپ، كوپ جاقتىلىقتى بىرگە قورعاپ، وليمپيادا ىستەرىنىڭ اناعۇرلىم زور تابىستارعا قول جەتكىزۋىن ىلگەرىلەتۋدى قالايتىندىعىن ءبىلدىردى.

كەلۋ قاينارى: حالىق تورابى