حيلۇڭجياڭ ولكەسى استىقتىڭ كولەمدى بىرلىك ءونىمىن كۇش سالا جوعارىلاتتى (سەنىمدى بەكەمدەپ، رەفورمانىڭ، دامۋدىڭ تىڭ ءورىسىن اشايىق)

حيلۇڭجياڭ ولكەسى جيامۋس قالاسى تاڭيۋان اۋدانىندا تاڭۋاڭ وزەنىنەن سۋ باستاۋ سۋارمالى رايونىن جالعاستى سالۋ جانە وسىزامانداندىرىپ جاڭالاۋ نىسانىنىڭ قۇرىلىسى باستالدى.

”مەجەگە قاراعاندا جاڭادان كوبەيتىلگەن سۋارۋ كولەمى 202 مىڭ 400 مۋ بولىپ، سۋارۋ رايونىنىڭ مۋ باسىندىق بىرلىك ءونىمى 500 كيلوگرامنان 580 كيلوگرامعا جوعارىلايدى“ دەدى تاڭيۋان اۋداندىق سۋ ىستەرى مەكەمەسىنىڭ باستىعى مىڭ لي ۇمىتپەن.

وتكەن جىلى حيلۇڭجياڭ ولكەسىنىڭ استىق جالپى ءونىم مولشەرى 160 ميلليارد جىڭدىق وتكەلدەن ءوتىپ، ءۇرتىس 15 جىل مەملەكەت بويىنشا الدىڭعى ورىندى يەلەدى، استىق داقىلدارىنىڭ ورتاشا بىرلىك ءونىمى %2.7 جوعارىلاپ، تاريحي رەكورد جاڭالاندى.

2023 - جىلى 9 - ايدا باس شۋجي شي جينپيڭ حيلۇڭجياڭدا قىزمەت تەكسەرگەندە بىلاي دەپ باسا دارىپتەدى: ”حيلۇڭجياڭ مەملەكەتتىڭ استىق حاۋىپسىزدىگىندەگى ’ورنىقتىرعىش‘ بولۋى كەرەك“. بيىلعى مەملەكەتتىك ەكى ماجىلىستە باس شۋجي شي جينپيڭ جياڭسۋ ۋاكىلدەر ۇيىرمەسىنىڭ باياندامانى قاراۋىنا قاتىناسقاندا: ”ەگىستىك جەردىڭ قىزىل سىزىعىن بەرىك ساقتاپ، استىق حاۋىپسىزدىگىن قامتاماسىز ەتۋ كەرەك“دەپ باسا دارىپتەدى.

سورتتى داقىلدى كوپ ەگۋدى، جاقسى استىق ەگۋدى ماڭداي الدى ءىرى ءىس ەتۋگە تاباندى بولعان حيلۇڭجياڭ ولكەسى 10 ميلليون توننا استىق ءوندىرىس قۋاتىن جوعارىلاتۋ جوسپارىن ىشكەرىلەي اتقارىپ، كەڭ كولەمدى بىرلىك ءونىمدى جوعارىلاتۋعا كۇش سالىپ، استىق جالپى ءونىم مولشەرىنىڭ تاعى دا تىڭ ساتىعا كوتەرىلۋىنە نەگىز قالادى.

قورعالاتىن قارا توپىراق كولەمىن كەڭەيتىپ، ءونىمى جوعارى، ورنىقتى وسىزاماندانعان قۇنارلى اتىز قۇرۋ −

”اتىز بولەكتەرى ۇلكەيىپ، توپىراق قۇنارلانىپ، ءار مۋ جەردىڭ بىرلىك ءونىمى 30 جىڭ ارتتى“. حۋاچۋان اۋدانى ياۋلينزى قىستاعىندا 8000 مۋدان استام كۇرىش اتىزى جوعارى ولشەمدى ەگىس اتىزىنا اينالىپ، ءونىم مولشەرىنىڭ پايداسىن كورگەن قىستاق تۇرعىنى ۋاڭ ليانيۇڭنىڭ قايراتى تاسقىندادى.

قازىر حيلۇڭجياڭ ولكەسىنىڭ جوعارى ولشەمدى ەگىس اتىزى 120 ميلليون مۋعا تايادى، جاسىل ورگانيكالىق ازىق - تۇلىك بازاسىنىڭ اۋدانى 100 ميلليون مۋدان اسىپ، بۇكىل ەل بويىنشا الدىڭعى قاتارعا ءوتتى. بيىل حيلۇڭجياڭ ولكەسى جوعارى ساپامەن 11 ميلليون 690 مىڭ مۋ جوعارى ولشەمدى اتىز سالادى.

تۇقىم قاينارىنىڭ شەشۋشى، وزەكتى تەحنيكالارىنان قامال الىپ، ساپالى تۇقىم جەتىلدىرۋدە جاڭالىق اشۋ جۇيەسىن جەدەل قالىپتاستىردى −

بەيداحۋاڭ تىڭ يگەرۋى فىڭجۇڭ تۇقىم شارۋاشىلىعى شەكتى جارنا سەرىكتەستىگىنىڭ تاجىريبەحاناسىندا قىزمەتكەرلەر گەن تۇعىرىنان پايدالانىپ، سويا بۇرشاقتىڭ ساپالى تۇقىم بايلىعىنىڭ گەن تيپىن دالمە - ءدال ساراپتاۋدا. ”تۇقىم − اۋىل شارۋاشىلىعىنىڭ ’چيپى‘، ءبىز ’بيولوگيالىق تەحنيكا + ءىرى ساندى مالىمەتتى‘ زەردەلى جوبالاپ، ساپالى تۇقىم جەتىلدىرۋگە جورىق جاسايمىز“ دەدى سەرىكتەستىك سويا بۇرشاق زەرتتەۋ ورنىنىڭ باستىعى حۋ شيپيڭ.

”استىقتى تەحنيكاعا سۇيەنىپ ەكتى، بۇكىل ولكەدەگى نەگىزگى ەگىس داقىلدارىندا سورتتى تۇقىممەن نەگىزىنەن جاپپاي قامتۋ جۇزەگە اسىرىلدى“. حيلۇڭجياڭ ولكەلىك اۋىل شارۋاشىلىعى، اۋىل - قىستاق مەڭگەرمەسى باستىعىنىڭ ورىنباسارى ۋاڭ دي بىلاي دەدى: بيىلعى «ۇكىمەت قىزمەتىنەن باياندامادا» ورتاعا قويىلعان ”تۇقىم شارۋاشىلىعىن گۇلدەندىرۋ ارەكەتىن ىشكەرىلەي اتقارۋ“ تالابىن ويداعىداي تياناقتاندىرۋ ءۇشىن، بيىل بۇكىل ولكە وسى زامانعى تۇقىم شارۋاشىلىعىن جوعارىلاتۋ ينجەنەرياسىن ىشكەرىلەي اتقارادى.

اۋىل شارۋاشىلىعىنىڭ عىلىم - تەحنيكالىق جانە جابدىقتاۋ تىرەگىن كۇشەيتىپ، زەردەلى اۋىل شارۋاشىلىعىن زور كۇشپەن دامىتتى −

”ءبىز جۇمىستىڭ ساندى مالىمەتىنە دەر كەزىندە تالداۋ جاساپ، اۋىل شارۋاشىلىعىنداعى دەرت - دەربەز، زياندى جاندىك اپاتىن ءونىمدى تىزگىندەۋگە قۇلشىنىپ، استىق ءونىمىن ارتتىرۋعا كەپىلدىك ەتتىك“. حايلۇن قالاسى دۇڭشيڭ وسى زامانعى اۋىل شارۋاشىلىق ماشينالارى شارۋالار كاسىپتىك سەلبەستىك كووپەراتيۆىنىڭ جاۋاپتىسى ليۋ چۇنشىڭ ۇشقىشسىز ۇشاقپەن اۋىل شارۋاشىلىق داقىلدارىن قورعاۋ ۇلكەن اترەتىن باستاماشىلدىقپەن قۇرىپ، 45 ۇشقىشسىز ۇشاقتى ىسكە قوستى.

بىلتىر حيلۇڭجياڭ ەگىس داقىلدارىن ەگۋ، ورۋ جۇمىستارىنىڭ جالپىلىق ماشينالانۋ شاماسىن %99 تەن اسىرىپ، اۋىل شارۋاشىلىق عىلىم - تەحنيكا العاباسارلىعىنىڭ ۇلەس شاماسىن %70.8 كە جەتكىزدى. بيىلعى «ۇكىمەت قىزمەتىنەن باياندامادا» وزىق، قولدانىلمالى اۋىل شارۋاشىلىق ماشينا - جابدىقتارىن زەرتتەپ اشۋدى، قولدانۋدى جانە اۋىل شارۋاشىلىق عىلىم - تەحنيكا جەتىستىكتەرىن كەڭ كولەمدە جالپىلاستىرۋدى جەدەلدەتۋ ورتاعا قويىلدى. حيلۇڭجياڭ ولكەسى بۇكىل ولكەنىڭ ءبىر تۇتاس زەردەلى اۋىل شارۋاشىلىق تۇعىرىن قۇرۋعا كۇش سالىپ، 100 دەن استام وسى زامانعى اۋىل شارۋاشىلىق عىلىم - تەحنيكاسىنان ۇلگى كورسەتۋ بازاسىن، 20 ادامسىز زەردەلى ەگىس الاڭىن قۇرادى.

وسىزاماندانعان ءىرى اۋىل شارۋاشىلىعىن جەدەل دامىتۋدا حيلۇڭجياڭ اۋىل شارۋاشىلىعىن وسىزامانداندىرۋ قۇرىلىسىنىڭ سەركەسى بولۋعا قۇلشىنىپ، مەملەكەتتىڭ ماڭىزدى تاۋار استىق ءوندىرىس بازاسىن ويداعىداي قۇرىپ، كۇشەيتىپ، ”جۇڭگونىڭ اس كەسەسىن“ ورنىقتى ۇستاۋعا تىڭ ۇلەس قوسۋ ءۇشىن قۇلشىنۋدا.