14 - كەزەكتى مەملەكەتتىك ساياسي كەڭەستىڭ بۇرىنعى تۇراقتى مۇشەسى، مادەنيەت، مادەنيەت تاريحى جانە ۇيرەنۋ كوميتەتىنىڭ بۇرىنعى مەڭگەرۋشىسى ۋ يىڭجيەنىڭ پارا الۋ دەلوسىنا ءبىرىنشى سوت اشىلدى

شينحۋا اگەنتتىگىنىڭ 3 ـ ايدىڭ 20 ـ كۇنى بەيجيڭنەن بەرگەن حابارى. 3 ـ ايدىڭ 20 ـ كۇنى بەيجيڭ قالالىق 3 ـ ورتا دارەجەلى حالىق سوت مەكەمەسى 14 ـ كەزەكتى مەملەكەتتىك ساياسي كەڭەستىڭ بۇرىنعى تۇراقتى مۇشەسى، مادەنيەت، مادەنيەت تاريحى جانە ۇيرەنۋ كوميتەتىنىڭ بۇرىنعى مەڭگەرۋشىسى ۋ يىڭجيەنىڭ پارا الۋ دەلوسىنا ءبىرىنشى سوتتا اشىق سوت اشتى.

بەيجيڭ قالالىق حالىق پروكۋراتۋراسىنىڭ 3 - بولىمشە پروكۋراتۋراسى بىلاي دەپ ايىپتادى: 2006 – جىلى 6 – ايدان 2021 – جىلى 2 – ايعا دەيىن، ايىپكەر ۋ يىڭجيە شيزاڭ اۆتونوميالى رايوندىق پارتكومنىڭ تۇراقتى مۇشەسى، ۇگىت ءبولىمىنىڭ باستىعى، ۇكىمەتتىڭ ورىنباسار ءتوراعاسى، اۆتونوميالى رايوندىق پارتكومنىڭ تۇراقتى مۇشەسى، ۇكىمەتتىڭ ۇنەمىلىك ىستەرگە جاۋاپتى ورىنباسار ءتوراعاسى، اۆتونوميالى رايوندىق پارتكومنىڭ ورىنباسار شۋجيى، پارتكوم شۋجيى قاتارلى قىزمەت قولايلىلىعىنان پايدالانىپ، قاتىستى ورىندار مەن جەكەلەرگە، قۇرىلىستى كوتەرىپ الۋ جانە كاسىپورىن تيجاراتى قاتارلى ىستەردە كومەك كورسەتىپ، باسقالاردىڭ مال - مۇلكىن زاڭسىز قابىلداعان، جالپى حالىق اقشاسىنا سىندىرعاندا 343 ميلليون يۋاننان اسقان. پروكۋراتۋرا ورگاندارى پارا الۋ قىلمىسى بويىنشا ۋ يىڭجيەنىڭ قىلمىستىق ىستەر جاۋاپكەرشىلىگىن قۋزاستىرۋدى ۇسىنىس ەتتى.

سوتتا پروكۋراتۋرا ورگاندارى قاتىستى دالەل - سىپاتتاردى كورسەتتى، ايىپكەر ۋ يىڭجيە جانە ونىڭ اقتاۋشىلارى فاكت كورسەتتى، شاعىم ايتۋشى مەن اقتاۋشى ەكى جاق سوتتىڭ باسقارۋىندا تولىق پىكىر ايتتى، ۋ يىڭجيە ەڭ سوڭعى ءسوزىن سويلەدى ءارى سوت ۇستىندە قىلمىسىن تانىپ، وكىنەتىندىگىن ءبىلدىردى.

ەڭ سوڭىندا سوت ءۇزىلىس جاساعانىن، ۇكىمىن ارتىنان جاريالايتىندىعىن ايتتى. حالىق قۇرىلتايى ۋاكىلدەرىنەن، ساياسي كەڭەس مۇشەلەرىنەن جانە ءار سالا بۇقاراسىنان 50 دەن استام ادام سوت تەرگەۋىن سىرتتاي تىڭدادى.

كەلۋ قاينارى: حالىق تورابى