ديڭ شۋەشياڭ بو ـ اۋ ازيا تالقى مىنبەرىنىڭ 2025 ـ جىلعى جىلدىق ماجىلىسىنە قاتىناسقان ءبىر ءبولىم ەلدەردىڭ ساياسي قايراتكەرلەرىمەن جەكە ـ جەكە كەزدەستى

«حالىق گازەتى»، 3 - ايدىڭ 26 – كۇنى، حاينان بو - اۋ (تىلشىلەر چياڭ ۋەي، ليۋ ليڭليڭ). جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ تۇراقتى مۇشەسى، مەملەكەتتىك كەڭەس زۇڭليىنىڭ ورىنباسارى ديڭ شۋەشياڭ 3 - ايدىڭ 26 - كۇنى حاينان بو - اۋ قالاسىندا بو - اۋ ازيا تالقى مىنبەرىنىڭ 2025 - جىلعى جىلدىق ماجىلىسىنە قاتىناسۋ ءۇشىن جۇڭگوعا كەلگەن لاوستىڭ زۇڭليى سۇڭساي، ميكرونەزيا فەدەراتسياسى زۇڭتۇڭىنىڭ ورىنباسارى پاليك، موڭعۇليا زۇڭليىنىڭ ءبىرىنشى ورىنباسارى، قوسىمشا ەكونوميكالىق دامۋ مينيسترى گاڭتۋمۋر، قازاقستان زۇڭليىنىڭ ءبىرىنشى ورىنباسارى سكليار، يندونەزيانىڭ نەگىزدىك قۇرىلعىلارى جانە وڭىرلىك دامۋدى ءبىر تۇتاس جوسپارلاۋ مينيسترى اگۋس، پورتۋگاليانىڭ مەملەكەت ىستەرى مينيسترى، قوسىمشا سىرتقى ىستەر مينيسترى لانلەرمەن جەكە – جەكە كەزدەستى.

سۇڭسايمەن كەزدەسكەندە ديڭ شۋەشياڭ مىنالاردى ءبىلدىردى: باس شۋجي، مەملەكەت ءتوراعاسى شي جينپيڭ مەن باس شۋجي، مەملەكەت ءتوراعاسى تۇڭلۇننىڭ ستراتەگيالىق جەتەكشىلىگىندە، جۇڭگو ـ لاوس تاعدىرلاس ورتاق تۇلعاسى قۇرىلىسى ۇزدىكسىز تەرەڭدەدى، ناقتىلاندى. جۇڭگو جاق لاوس جاقپەن بىرگە ەكى پارتيانىڭ، ەكى ەلدىڭ ەڭ جوعارى باسشىلارىنىڭ ماڭىزدى ورتاق تانىمىن نەگىز ەتىپ، ءبىر ـ ءبىرىنىڭ وزەكتى مۇددەسىن ءوزارا قولداپ، ءار سالاداعى سەلبەستىكتە اناعۇرلىم كوپ ناقتى تابىستارعا قول جەتكىزۋدى ىلگەرىلەتىپ، ەكى ەل مەن ەكى ەل حالقىنىڭ ىرىس - قۇتىن ارتتىرۋدى قالايدى.

سۇڭساي مىنانى ءبىلدىردى: لاوس جاق جۇڭگو جاقتىڭ ءوزىنىڭ وزەكتى مۇددەسىن قورعاۋىن باتىل قولدايدى، دۇنيە جۇزىلىك حاۋىپسىزدىك باستاماسىن بەلسەنە تياناقتاندىرىپ، لاوس ـ جۇڭگو تاعدىرلاس ورتاق تۇلعاسى قۇرىلىسىنىڭ ۇزدىكسىز تىڭ دامۋعا قول جەتكىزۋىن ىلگەرىلەتۋدى قالايدى.

پاليكپەن كەزدەسكەندە ديڭ شۋەشياڭ مىنالاردى ءبىلدىردى: بىلتىر ءتوراعا شي جينپيڭ سيمينا زۇڭتۇڭمەن كەڭەس وتكىزىپ، ماڭىزدى ورتاق تانىمعا كەلىپ، جۇڭگو - ميكرونەزيا قارىم - قاتىناسىنىڭ دامۋىنا ايقىن باعدار كورسەتتى. ەكى جاق ساياسي سەنىمدىلىكتى تەرەڭدەتىپ، ءبىر ـ ءبىرىنىڭ وزەكتى مۇددەسى مەن ءجىتى قاداعالاپ وتىرعان كەلەلى ىستەرىن باتىل قولداپ، ساۋدا، قارجى قوسۋ، نەگىزدىك قۇرىلعى، تەڭىز ـ مۇحيت ەكونوميكاسى سياقتى ءتۇيىندى سالالارداعى سەلبەستىكتى بەلسەنە كەڭەيتىپ، كليمات وزگەرىسىنە قول ۇستاسا توتەپ بەرىپ، جۇڭگو مەن ميكرونەزيانىڭ جالپى بەتتىك ستراتەگيالىق سەرىكتەستىك قارىم - قاتىناسىنىڭ ۇزدىكسىز العا دامۋىن ىلگەرىلەتۋى كەرەك.

پاليك مىنالاردى ءبىلدىردى: ميكرونەزيا جاق ءتوراعا شي جينپيڭ العا قويعان دۇنيە جۇزىلىك دامۋ باستاماسىن، دۇنيە جۇزىلىك حاۋىپسىزدىك باستاماسىن، دۇنيە جۇزىلىك وركەنيەت باستاماسىن ايرىقشا القايدى، ءبىر جۇڭگو پرينسيبىنە تاباندى بولادى، جۇڭگو جاقتىڭ تايۋانعا، شياڭگاڭعا، شينجياڭعا ساياتىن ىستەر، نانحاي تەڭىزى سياقتى وزەكتى مۇددە ماسەلەلەرىندەگى تۇرعىسىن باتىل قولدايدى، جۇڭگو جاقپەن سەلبەستىكتى تەرەڭدەتىپ، كليمات وزگەرىسىنە بىرگە توتەپ بەرەدى.

گاڭتۋمۋرمەن كەزدەسكەندە ديڭ شۋەشياڭ مىنالاردى ءبىلدىردى: جۇڭگو مەن موڭعۇليا − تاۋ ـ وزەنى جالعاسقان كورشىلەر، ۇزاق ۋاقىتتىق تاتۋ كورشىلىك، دوستىق قاتىناستى دامىتۋ ەكى ەل حالقىنىڭ ءتۇبىرلى مۇددەسىنە بۇكىلدەي ۇيلەسەدى. جۇڭگو جاق موڭعۇليا جاقپەن بىرگە ەكى ەل مەملەكەت باسشىلارىنىڭ ماڭىزدى ورتاق تانىمىن ويداعىداي تياناقتاندىرىپ، بەيبىت قاتار تۇراتىن، ءبىر ـ بىرىنە قارايلاساتىن، سەلبەسىپ تەڭ يگىلىككە كەنەلەتىن جۇڭگو ـ موڭعۇليا تاعدىرلاس ورتاق تۇلعاسىن بىرگە قۇرۋدى جەتەكشى ەتىپ، ساياسي سەنىمدىلىكتى بەكەمدەپ، سەلبەستىكتى ۇزدىكسىز كەڭەيتىپ، جۇڭگو ـ موڭعۇليا قارىم -قاتىناسىنىڭ ۇزدىكسىز العا باسۋىن ىلگەرىلەتۋدى قالايدى.

گاڭتۋمۋر مىنانى ءبىلدىردى: موڭعۇليا جاق ءبىر جۇڭگو پرينسيبىنە تاباندى بولادى، جۇڭگومەن ۇلاستىرۋ - تۇتاستىرۋ، ەنەرگيا، كەن ونىمدەرى، جوعارى، جاڭا تەحنيكا سياقتى سالالارداعى سەلبەستىكتى ىلگەرىلەتىپ، ەكى ەل حالقىن بىرگە يگىلىككە كەنەلتۋدى قالايدى.

سكليارمەن كەزدەسكەندە ديڭ شۋەشياڭ مىنانى ءبىلدىردى: وتكەن اپتادا ءبىز جۇڭگو ـ قازاقستان سەلبەستىك كوميتەتىنىڭ 12 ـ رەتكى ءماجىلىسىن باسقارىپ اشتىق، ەكى جاق بىرگە قۇلشىنىپ، ءماجىلىس جەتىستىكتەرىنىڭ تياناقتانۋىن جەدەلدەتۋى كەرەك.

سكليار مىنانى ءبىلدىردى: قازاقستان جاق جۇڭگو جاقپەن ءبىر نيەتپەن سەلبەسىپ، قازاقستان ـ جۇڭگو قارىم - قاتىناسىن تىڭ ساتىعا كوتەرۋدى قالايدى.

اگۋسپەن كەزدەسكەندە ديڭ شۋەشياڭ مىنالاردى ءبىلدىردى: بىلتىر ءتوراعا شي جينپيڭ پرابوۆو زۇڭتۇڭمەن ەكى رەت كەڭەس وتكىزىپ، ەكى جاقتى قارىم - قاتىناستىڭ تىڭ ساتىعا كوتەرىلۋىنە جەتەكشىلىك ەتتى. بيىل − جۇڭگو مەن يندونەزيانىڭ ديپلوماتيالىق قارىم - قاتىناس ورناتقاندىعىنىڭ 75 جىلدىعى. ەكى جاق ەكى ەل مەملەكەت باسشىلارى كەلىسكەن ماڭىزدى ورتاق تانىمعا ساي، دامۋ ستراتەگياسىن ۇشتاستىرۋدى كۇشەيتىپ، ناقتى سەلبەستىكتىڭ جاڭا كورىنەۋ تۇيىندەرىن بەلسەنە قالىپتاستىرىپ، جۇڭگو مەن يندونەزيانىڭ تاعدىرلاس ورتاق تۇلعاسى قۇرىلىسىنىڭ اناعۇرلىم زور دامۋعا قول جەتكىزۋىن ىلگەرىلەتۋى كەرەك.

اگۋس مىنالاردى ءبىلدىردى: يندونەزيا ەكى ەلدىڭ ديپلوماتيالىق قارىم - قاتىناس ورناتقاندىعىنىڭ 75 جىلدىعىن وراي ەتىپ، ەكى ەلدىڭ جالپى بەتتىك ستراتەگيالىق سەرىكتەستىك قارىم - قاتىناسىن ونان ارى تەرەڭدەتىپ، نەگىزدىك قۇرىلعى، ەنەرگيادا تيپكە بۇرىلىس جاساۋ، سيفرلى ەكونوميكا سياقتى سالالارداعى سەلبەستىكتىڭ تەرەڭدەۋىن، ناقتىلانۋىن ىلگەرىلەتۋدى قالايدى.

لانلەرمەن كەزدەسكەندە ديڭ شۋەشياڭ مىنالاردى ءبىلدىردى: بىلتىر جۇڭگو مەن پورتۋگاليانىڭ ديپلوماتيالىق قارىم - قاتىناس ورناتقاندىعىنىڭ 45 جىلدىعى قارساڭىندا، ءتوراعا شي جينپيڭ دەسوۋسا زۇڭتۇڭمەن ءوزارا قۇتتىقتاۋ تەلەگرامماسىن جولداپ، ەكى ەل قارىم - قاتىناسىنىڭ دامۋىنا تياناق ازىرلەدى. بيىل − جۇڭگو مەن پورتۋگاليانىڭ جالپى بەتتىك ستراتەگيالىق سەرىكتەستىك قارىم - قاتىناس ورناتقاندىعىنىڭ 20 جىلدىعى. جۇڭگو جاق پورتۋگاليا جاقپەن بىرگە ەكى ەل مەملەكەت باسشىلارىنىڭ ستراتەگيالىق جەتەكشىلىگىندە، ءوزارا قۇرمەت ەتۋگە، ءوزارا سەنىم ارتۋعا تاباندى بولىپ، ءوزارا ءتيىمدى سەلبەستىكتى كەڭەيتىپ، ەسىك اشۋدى، اۋىس ـ كۇيىستى تەرەڭدەتىپ، ەكى ەل قارىم - قاتىناسىنىڭ ۇزدىكسىز تىڭ دەڭگەيگە كوتەرىلۋىن ىلگەرىلەتۋدى قالايدى.

لانلەر مىنالاردى ءبىلدىردى: پورتۋگاليا جاق اۋمىننىڭ جۇڭگوعا ورالعاننان كەيىن گۇلدەنۋدى، ورنىقتى دامۋدى جۇزەگە اسىرعاندىعىن جوعارى باعالايدى، ناقتى سەلبەستىكتى اناعۇرلىم كۇشەيتىپ، پورتۋگاليا ـ جۇڭگو قارىم ـ قاتىناسىنا تىڭ ومىرشەڭدىك كۇش ۇستەپ، ەۆروپا ـ جۇڭگو سەلبەستىگىن جيىلەتۋدە بەلسەندى رول اتقارۋدى قالايدى.

كەلۋ قاينارى: حالىق تورابى