شينجياڭنان ءبىر ادام، ەكى كوللەكتيۆ جۇڭگو جاستار 4 ـ مامىر مەدالىنا يە بولدى

شينجياڭ گازەتىنىڭ حابارى. 4 ـ ايدىڭ 30 ـ كۇنى، 4 ـ مامىر جاستار مەرەكەسى كەلۋ قارساڭىندا كوممۋنيستىك جاستار وداعى ورتالىق كوميتەتى، مەملەكەتتىك جاستار بىرلەستىگى 29 ـ كەزەكتى جۇڭگو جاستار 4 ـ مامىر مەدالىن تاراتتى، شينجياڭنان ءبىر ادام، ەكى كوللەكتيۆ سيلاندى؛ 677 جولداسقا 2025 ـ جىلعى جاڭا داۋىردەگى جاس اۆانگارد سيلىعى بەرىلدى، شينجياڭنان 24 ادام سيلاندى.

جۇڭگو جاستار 4 ـ مامىر مەدالىنىڭ يەگەرلەرى جەكە ـ جەكە مىنالار: شينجياڭ شەكارادان كىرۋ ـ شىعۋ شەكارالىق قورعانىس تەكسەرۋ باس پۋنكتى بۇراتالا موڭعۇل اۆتونوميالى وبلىستىق شەكارا باسقارۋ تارماق اترەتى دولانتى شەكارا ساقشى بولىمشەسىنىڭ ورىنباسار باستىعى اسىلبەك، مەملەكەتتىك باجى باس مەكەمەسى تاسقورعان تاجىك اۆتونوميالى اۋداندىق باجى مەكەمەسىنىڭ جاستار كوللەكتيۆى، اتۇش قالاسى قاراجول اۋىلى شەيت باستاۋىش مەكتەبى شەكارانى قورعاۋ، وقۋ ـ اعارتۋعا كومەكتەسۋ بويىنشا باتىس بولىك جوسپارى ەرىكتىلەر قىزمەت وتەۋ اترەتى.

اسىلبەك 11 جىلدى ءبىر كۇنگىدەي وتكىزىپ، تەڭىز دەڭگەيىنەن ورتاشا بيىكتىگى 3000 مەتر، جىلدىق ورتاشا تەمپەراتۋراسى نولدەن تومەن 10 سەلتسي گرادۋس كەلەتىن قازان وزەنى شەكارا ساقشى ىستەرى پۋنكتىندە تاباندىلىقپەن ىستەدى. 11 جىلدا شەكارا لەنياسىنىڭ ساي - سالاسىنىڭ، بەل - بەلەسىنىڭ بارلىق جەرىندە ونىڭ ءىزى قالدى، 26 پار جاتتىعۋ اياق كيىمىن جانە سوعىس ەتىگىن توزدىردى، شارلاعان جولى 120 نەشە مىڭ كيلومەترگە جەتىپ، ىستىق قانىمەن جانە ادالدىعىمەن شەكارادا اسۋ بەرمەس قورعانىس شەبىن ورناتتى. اسىلبەك مىنانى ءبىلدىردى: ”بۇل داڭق تەك ماعان عانا ءتان ەمەس، ونان دا ماڭىزدىسى، وتاننىڭ شەكارا ءبىرىنشى شەبىندە ءۇنسىز ساۋلە شاشقان سانسىزداعان شەكارا كۇزەتكەن جاستارعا ءتان. جاڭا داۋىردەگى جاس حالىق ساقشىسى رەتىندە، مەن ’ومىرىمدە تەك ءبىر عانا ءىستى ىستەپ، وتان ءۇشىن شەكارا قورعايمىن‘ دەگەن ۋادەنى تاباندىلىقپەن امالياتتا ايگىلەپ، وتانىمىزدىڭ شەكارا ءوڭىرىن ىستىق قانىممەن قورعايمىن“.

شينجياڭدا 24 ادام جاڭا داۋىردەگى جاس اۆانگارد سيلىعىنا يە بولدى، شينجياڭ گازەتى مەكەمەسى (توبى) اعىمدىق اقپارات ءبولىمى ءتۇيىندى حابارلاۋ گرۋپپاسىنىڭ جاۋاپتىسى، اعا ءتىلشىسى لي ياڭ سيلىققا يە بولدى.

ماداقتالىپ ـ سيلانعان جاستار جانە جاستار كوللەكتيۆى جاڭا داۋىردەگى ءار ۇلت، ءار سالا جاستارىنىڭ كورنەكتى ۋاكىلدەرى جانە اۆانگارد كۇشى، ولار پارتيانىڭ ۇندەۋىنە بەلسەنە ءۇن قوسىپ، عىلىم ـ تەحنولوگيادا جاڭالىق اشۋ، اۋىل ـ قىستاقتى گۇلدەندىرۋ، جاسىل دامۋ، قوعامدىق قىزمەت وتەۋ، وتاندى قورعاپ شەكارانى كۇزەتۋ سياقتى ءار سالادا، ءار جاقتا كوشباسشى جانە جالىندى قوسىن بولۋعا قۇلشىنىپ، ءىس جۇزىندىك ارەكەتتەرى ارقىلى ”پارتيا الاڭسىز بولسىن، قۇدىرەتتى مەملەكەت قۇرۋدا مەن بارمىن“ دەگەن جاستىق سەرتىن امالياتتا ايگىلەپ، جۇڭگو ۇلگىسىندەگى وسىزامانداندىرۋدا كوكىرەك كەرە جاۋاپكەرشىلىك ارقالايتىن جاستىق كوكتەم تاراۋىن قۇلشىنا جازدى.

كەلۋ قاينارى: حالىق تورابى