شي جينپيڭ ەكونوميكا يدەياسىن ىشكەرىلەي ۇيرەنىپ، دايەكتىلەندىرىپ، پارتيا ورتالىق كوميتەتىنىڭ ەكونوميكالىق قىزمەتكە ورتالىقتانعان ءبىر تۇتاس باسشىلىعىن كۇشەيتۋ كەرەك

شينحۋا اگەنتتىگى، 5 - ايدىڭ 6 - كۇنى، بەيجيڭ. «شي جينپيڭ ەكونوميكا ماقالالارىنان تاڭدامالىلاردىڭ» 1 - تومىن ۇيرەنۋ ارناۋلى تاقىرىپتىق زەرتتەۋ - تالقى كۋرسى 5 - ايدىڭ 6 - كۇنى تۇستەن بۇرىن ساباق باستادى، جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ تۇراقتى مۇشەسى، مەملەكەتتىك كەڭەس زۇڭليىنىڭ ورىنباسارى ديڭ شۋەشياڭ قاتىناستى ءارى ساباق باستاۋ بايانداماسىن جاسادى.

ديڭ شۋەشياڭ بىلاي دەپ اتاپ كورسەتتى: پارتيا 18 - قۇرىلتايىنان بەرى قاتاڭ دا كۇردەلى حالىقارالىق ورتا جانە ەل ىشىندەگى جاپالى دا اۋىر رەفورما، دامۋ، ورنىقتىلىق مىندەتى الدىندا، شي جينپيڭ جولداستى ۇيىتقى ەتكەن پارتيا ورتالىق كوميتەتى ەكونوميكالىق قىزمەتكە ورتالىقتانعان ءبىر تۇتاس باسشىلىقتى كۇشەيتىپ، ءبىرقىدىرۋ جاڭا ۇستانىم، جاڭا يدەيا، جاڭا ستراتەگيالاردى العا قويىپ، شي جينپيڭ ەكونوميكا يدەياسىن قالىپتاستىرىپ، ماركسيزمدىك ساياسي - ەكونوميانىڭ جاڭا ءورىسىن ءساتتى اشتى. پارتيانىڭ عىلمي نازارياسى مەن ۇلى امالياتى قاتار ىلگەرىلەپ، ەلىمىزدىڭ ەكونوميكالىق دامۋىندا تاريحي تابىستارعا قول جەتكىزۋگە، تاريحي وزگەرىستەر تۋدىرۋعا جەتەكشىلىك ەتىپ، شي جينپيڭ ەكونوميكا يدەياسىنىڭ كەلەلى نازاريالىق ءمانىن، امالياتتىق ءمانىن، دۇنيە جۇزىلىك ءمانىن تولىق ايگىلەدى.

ديڭ شۋەشياڭ مىنالاردى ءبىلدىردى: شي جينپيڭ ەكونوميكا يدەياسىنىڭ وزەكتى مازمۇنى مەن امالياتتىق تالابىن ىشكەرىلەي يگەرىپ، جوعارى ساپالى دامۋ ارقىلى جۇڭگو ۇلگىسىندەگى وسىزامانداندىرۋدى جاپپاي ىلگەرىلەتۋ كەرەك. حالىقتى وزەك ەتۋگە تاباندى بولىپ، حالىق تىلەگىنىڭ ەڭ ۇلكەن ساياسي ەكەنىن ەستە بەرىك ساقتاپ، جالپى حالىقتى دامۋ جەتىستىكتەرىنەن اناعۇرلىم كوپ، اناعۇرلىم ءادىل يگىلىكتەندىرۋ كەرەك. جاڭا دامۋ ۇستانىمىن تولىق، دۇرىس، جاپپاي دايەكتىلەندىرۋگە تاباندى بولىپ، جاڭا دامۋ جاعدايىن جەدەل ورناتىپ، رەفورمانى جاپپاي تەرەڭدەتىپ، جەرگىلىكتى جاعدايعا قاراي جاڭاشا وندىرگىش كۇشتەردى دامىتىپ، ەكونوميكانىڭ ساپاسىنىڭ ءونىمدى جوعارىلاۋى مەن مولشەرىنىڭ ۇيلەسىمدى ارتۋىن ىلگەرىلەتۋ كەرەك. عىلمي يدەيالىق ءادىس پەن قىزمەت ادىسىنە تاباندى بولىپ، ستراتەگيالىق تۇراقتىلىقتى ساقتاپ، ورنىقتىلىق بارىسىندا ىلگەرىلەۋگە تاباندى بولىپ، جۇيە كوزقاراسىن كۇشەيتىپ، دامۋ مەن حاۋىپسىزدىكتى اناعۇرلىم ويداعىداي ءبىر تۇتاس جوسپارلاۋ كەرەك.

ديڭ شۋەشياڭ بىلاي دەپ باسا دارىپتەدى: شي جينپيڭ جولداستى ۇيىتقى ەتكەن پارتيا ورتالىق كوميتەتىنىڭ ورتالىقتانعان ءبىر تۇتاس باسشىلىعى − ەلىمىز ەكونوميكاسى كەمەسىنىڭ تولقىن جارا العا ىلگەرىلەپ، ورنىقتى قاداممەن الىسقا جەتۋىنىڭ ءتۇبىرلى كەپىلى. ءار دارەجەلى باسشى كادرلار جاڭا ءداۋىردىڭ شۇعىلالى بارىسىنان ”ەكىنى تۇراقتاندىرۋدىڭ“ شەشۋشى ءمانى جونىندەگى تانىمدى ۇزدىكسىز تەرەڭدەتىپ، ”ءتورت تانىمدى“ كۇشەيتىپ، ”ءتورت سەنىمدى“ بەكەمدەپ، ”ەكىنى قورعاۋدى“ ورىنداۋى كەرەك. ەكونوميكالىق قىزمەتتى ساياسيدى دارىپتەۋ تۇرعىسىنان ىستەۋگە اناعۇرلىم ءمان بەرىپ، قابىلەت پەن دەڭگەيدى ۇزدىكسىز جوعارىلاتىپ، قىزمەت ستيلىن جاقسارتىپ، پارتيا ورتالىق كوميتەتىنىڭ شەشىمدەرىنىڭ، ورنالاستىرۋلارىنىڭ تياناقتانۋىنا كەپىلدىك ەتۋ كەرەك.

جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ مۇشەسى، ورتالىق كوميتەت ۇيىمداستىرۋ ءبولىمىنىڭ باستىعى شى تايفىڭ ءماجىلىستى باسقاردى، ورتالىق پارتيا مەكتەبىنىڭ (مەملەكەتتىك اكىمشىلىك شۋەيۋانى) مەڭگەرۋشىسى (شۋەيۋان باستىعى) چىن شي ماجىلىسكە قاتىناستى. ءارقايسى ولكەلەردىڭ، اۆتونوميالى رايونداردىڭ، قالالاردىڭ جانە شينجياڭ ءوندىرىس - قۇرىلىس بيڭتۋانىنىڭ، ورتالىق پەن مەملەكەت ورگاندارىنىڭ قاتىستى تاراۋلارىنىڭ، قاتىستى حالىقتىق ۇيىمداردىڭ، ورتالىقتىڭ باسقارۋىنداعى فينانس قۇرىلىمدارىنىڭ، كاسىپورىنداردىڭ، جوعارى مەكتەپتەردىڭ قاتىستى جاۋاپتى جولداستارى قاتارلىلار قاتىناستى.

«شي جينپيڭ ەكونوميكا ماقالالارىنان تاڭدامالىلاردىڭ» 1 - تومىن ۇيرەنۋ ارناۋلى تاقىرىپتىق زەرتتەۋ - تالقى كۋرسىن ورتالىق كوميتەت ۇيىمداستىرۋ ءبولىمى، ورتالىق پارتيا مەكتەبى (مەملەكەتتىك اكىمشىلىك شۋەيۋانى) قاتىستى تاراۋلارمەن بىرلەسىپ وتكىزدى، مۇنداعى ماقسات قالىڭ كادرلار مەن بۇقارانىڭ شي جينپيڭ ەكونوميكا يدەياسىن ىشكەرىلەي ۇيرەنۋىن، دايەكتىلەندىرۋىن ىلگەرىلەتىپ، شي جينپيڭ ەكونوميكا يدەياسىمەن اناعۇرلىم سانالى تۇردە وي - سانانى قارۋلاندىرۋ، امالياتقا جەتەكشىلىك ەتۋ، قىزمەتتەردى ىلگەرىلەتۋ بولىپ تابىلادى.

كەلۋ قاينارى: حالىق تورابى