وقۋ – اعارتۋ مينيسترلىگى ”2025 – جىلعى جوعارى مەكتەپ ەمتيحانىنا قورعاۋشى بولۋ قيمىلىن“ ورىستەتۋ جونىندە ورنالاستىرۋ جاسادى 

جۋىردا وقۋ – اعارتۋ مينيسترلىگى ۇقتىرۋ باسىپ تاراتىپ، جەر – جەردەگى وقۋ – اعارتۋ تاراۋلارى مەن وقۋشى قابىلداۋ - ەمتيحان قۇرىلىمدارىنىڭ ۇگىت، ينتەرنەت ينفورماتسياسى، قوعام حاۋىپسىزدىگى قاتارلى جاقتارداعى كوپتەگەن تاراۋلارمەن بىرگە ”2025 – جىلعى جوعارى مەكتەپ ەمتيحانىنا قورعاۋشى بولۋ قيمىلىن“ ىشكەرىلەي ورىستەتىپ، ەمتيحانعا قاتىستى قىزمەت وتەۋ جانە قامتاماسىزداندىرۋ قىزمەتىن ونان ارى جاقسارتۋى، دۇرىس باعىتتاعى ۇگىت پەن جەتەكشىلىك ەتۋ قىزمەتىن كۇشەيتۋى، جوعارى مەكتەپ ەمتيحانىنىڭ حاۋىپسىز دە ورنىقتى وتكىزىلۋىنە جانە ەمتيحان بەرەتىن وقۋشىلاردىڭ ەمتيحانعا ءساتتى قاتىناسۋىنا كەپىلدىك ەتۋى جونىندە ورنالاستىرۋ جاساعان.

ۇقتىرۋداعى تالاپتارعا ساي، 2025 – جىلعى جوعارى مەكتەپ ەمتيحانى مەزگىلىندە، جەر – جەردەگى وقۋ – اعارتۋ تاراۋلارى جانە وقۋشى قابىلداۋ – ەمتيحان قۇرىلىمدارى قاتىستى تاراۋلارمەن بىرگە قىزمەت وتەۋ شارالارىن اناعۇرلىم كۇشەيتىپ، ەمتيحان بەرەتىن وقۋشىلارعا اماندىعىن قورعاۋ، ءجۇرىس – تۇرىس، ازىق – تۇلىك جانە جاتىن ورىن، ەمدەۋ – دەنساۋلىق ساقتاۋ، شۋىلدى جونگە سالۋ قاتارلى جاقتاردا جان – جاقتى قىزمەت وتەيدى جانە قامتاماسىزداندىرۋ شارالارىن اتقارادى. ەمتيحان بەرەتىن وقۋشىلارعا قامقورلىق جاساۋدى كۇشەيتىپ، ەمتيحانعا دايىندالۋ جانە ەمتيحان الاڭىنا بارۋ بارىسىنداعى ءىس جۇزىندىك قيىنشىلىقتارىنا نازاردى شوعىرلاندىرىپ، ەمتيحان بەرەتىن وقۋشىلارعا ارنالعان قول تەلەفون، سومكا قاتارلى زاتتاردى ساقتايتىن ورىنداردى مۇقيات ورنالاستىرادى، مۇگەدەكتەر قاتارلى ەرەكشە قيىنشىلىعى بار توپتاردىڭ ەمتيحانعا قاتىناسۋىنا ۇيلەسىمدى قولايلىلىق جاراتادى. ”ەمتيحان الاڭىنىڭ ماڭىنداعى ورتانى تازارتۋ“ قاتارلى ارناۋلى ارەكەتتەردى ۇزدىكسىز ورىستەتىپ، ەمتيحانعا قاتىستى شىنشىلدىق تاربيەسىن ىشكەرىلەي ورىستەتىپ، ەمتيحانعا قاتىستى جالعان اقپارات تاراتۋ، الجاستىرۋ جانە الداۋ قاتارلى زاڭ – تۇزىمگە قايشى ارەكەتتەرگە باتىل سوققى بەرىپ، اقپارات جاريالاۋ، ساياساتتى ءتۇسىندىرۋ، ىقىلاستى ەسكەرتپە جاريالاۋ، وسەك – اياڭ تۋرالى دابىل قاعۋ قاتارلى قىزمەتتەردى ويداعىداي ىستەپ، جۇيەلى دە ءتارتىپتى، ىقىلاستى دا جاراسىمدى ەمتيحان ورتاسىن بەلسەندى تۇردە جاراتادى.

جوعارى مەكتەپ ەمتيحانى اياقتاعان سوڭ، جەر – جەر ەمتيحان بەرگەن وقۋشىلارعا تالاپ كەستەسىن تولتىرۋ جاعىندا جالعاستى تۇردە تەگىن دە ساپالى، قولايلى دا وڭاي قىزمەت وتەپ، جەرگىلىكتى جاعدايعا قاراي وتىرىپ، ءتۇرلى ۇگىت – ءتۇسىندىرۋ جيىندارىن، كەڭەس بەرۋ جيىندارىن اشىپ، ەمتيحان بەرگەن وقۋشىلارعا، اتا – انالارعا مەكتەپتىڭ جاۋاپتىلارىمەن ”بەتپە – بەت“ اڭگىمەلەسەتىن ارنالاردى دايىنداپ، تەلەفون ارقىلى كەڭەس سۇراۋ، ينتەرنەت ارقىلى كەڭەس سۇراۋ، ينتەرنەتتىك تىكە تاراتىلىم قاتارلى تاسىلدەرمەن كەڭەس سۇراۋ جاعىندا قىزمەت وتەۋدىڭ قامتيتىن كولەمىن كەڭەيتەدى.

كەلۋ قاينارى: حالىق تورابى