ەلىمىزدىڭ جاساندى زەردە پاتەنت سانى دۇنيە ءجۇزى جالپى مولشەرىنىڭ %60 تىن يەلەدى

گازەتىمىزدىڭ 8 - ايدىڭ 14 - كۇنى بەيجيڭنەن بەرگەن حابارى. ءتىلشىنىڭ 8 - ايدىڭ 14 - كۇنى مەملەكەتتىك ساناق مەكەمەسىنەن ۇعىسۋىنشا، كوپ جىلدان بەرى ۇزدىكسىز قامال الۋ ارقىلى سيفرلى سالادا ءبىر توپ شەشۋشى، وزەكتى تەحنيكالاردان قامال الىنعان. ەلىمىزدىڭ جاساندى زەردەنىڭ جالپىلىق قۋاتى تۇتاس تۇلعالىق، جۇيەلى سەكىرۋدى جۇزەگە اسىرعان، جاساندى زەردە پاتەنتىنىڭ سانى بۇكىل جەرشارى جالپى مولشەرىنىڭ %60 تىن ۇستاعان، ادام ءتارىزدى قۇلتەمىر، زەردەلى تەرمينال سىندى سالالاردا ۇزدىكسىز تىڭ تابىستارعا قول جەتكىزىلگەن؛ ينتەگرالدى تىزبەك جەدەل ورنالاستىرىلىپ، جوبالاۋ، جاساۋ، قوراپتاۋ، سىناۋ، ماتەريال جانە جابدىق قامتىلعان كەمەلدى كاسىپ تىزبەگى قالىپتاسقان.

”14 - بەسجىلدىق“ مەزگىلىندە، ەلىمىزدىڭ سيفرلى نەگىزدىك قۇرىلعىلار قارىشتاپ دامىدى. بيىل 6 - ايدىڭ سوڭىنا دەيىن، G5 نەگىزدىك پۋنكتىنىڭ جالپى سانى 4 ميلليون 550 مىڭعا، مىڭ مەگابايتتىق كەڭ ارنالى تۇتىنۋشى 226 ميلليونعا جەتىپ، ەسەپتەۋ قۋاتىنىڭ جالپى كولەمى دۇنيە ءجۇزى بويىنشا 2 - ورىندى يەلەدى.

ەلىمىزدىڭ ساندى مالىمەت كاسىبى جەدەل دامىپ، بازار كەڭىستىگى كەڭەيىپ، سيفرلى ەكونوميكا دامۋىنىڭ جاڭا ارتۋ تۇيىنىنە اينالدى. مەملەكەتتىك ساندى مالىمەتتەردى دامىتۋدى زەرتتەۋ ورنىنىڭ زەرتتەۋ ساندى مالىمەتىندە كورسەتىلۋىنشە: 2024 - جىلى بۇكىل ەلدەگى ساندى مالىمەت كاسىپورىندارىنىڭ سانى 400 مىڭنان اسىپ، ساندى مالىمەت كاسىبىنىڭ كولەمى 5 تريلليون 860 ميلليارد يۋانعا جەتىپ، ”13 - بەسجىلدىقتىڭ“ سوڭىنداعىدان %117 ارتقان، مەجەمەن الداعى بىرنەشە جىلدا ءبىرشاما جوعارى ارتۋ دەڭگەيىن ساقتايدى ەكەن. ساندى مالىمەتتەردى ىشكەرىلەي اشۋ مەن توعىسپالى قولدانۋدى، ەسەپتەۋ قۋاتى مەن ساندى مالىمەتتەردى جوعارى دارەجەدە شوعىرلاندىرۋدى باستى ەرەكشەلىك ەتكەن كاسىپ ەكولوگياسى قالىپتاسۋدا. مەجەگە قاراعاندا، 2024 - جىلى بازارعا سالىنعان ساندى مالىمەت كاسىپورىندارىنىڭ ورتاشا زەرتتەۋ - اشۋ ۇسىنىلىمى ”13 - بەسجىلدىقتىڭ“ سوڭىنداعىدان %79 ارتىپ، كاسىپ تىزبەگىندە جاڭالىق جاراتۋ ومىرشەڭدىك كۇشى ۇزدىكسىز كۇشەيگەن.