بالا باعۋ قوسىمشا قاراجاتىن الۋعا ءوتىنىش بەرۋ ارنالارى ينتەرنەتكە قوسىلدى 

7 – ايدا «بالا باعۋ قوسىمشا قاراجاتى ءتۇزىمىن اتقارۋ جوباسى» رەسمي جاريالاندى، جوبادا زاڭ – تۇزىمدەگى تۋىتقا قاتىستى بەلگىلەمەلەرگە ساي كەلەتىن 3 جاستان تومەنگى نارەستەلەرگە قوسىمشا قاراجات تاراتۋ، ءاربىر بالاعا جىل سايىن 3600 يۋان بەرۋ ايقىن تۇراقتاندىرىلعان. مەملەكەتتىك دەنساۋلىق ساقتاۋ – سالاماتتىق كوميتەتىنىڭ تانىستىرۋىنشا، 8 – ايدىڭ 31 – كۇنىنەن بۇرىن جەر – جەر بالا باعۋ قوسىمشا قاراجاتىن الۋعا ءوتىنىش بەرۋدى جالپى بەتتىك اتقارادى.

قازىر جىفۋباۋ، ۋيشين قاتارلى ءۇشىنشى جاق قىزمەت وتەۋ تەكشەلەرىندەگى ءوتىنىش بەرۋ ارنالارى تۇگەلدەي ينتەرنەتكە قوسىلعان.

ينتەرنەت ارقىلى ءوتىنىش بەرۋ

بالا باعۋ قوسىمشا قاراجاتىن الۋعا، نەگىزىنەن ەلىمىز بويىنشا ءبىر تۇتاس قولدانىلاتىن بالا باعۋ قوسىمشا قاراجاتى ينفورماتسياسىن باسقارۋ جۇيەسى ارقىلى ءوتىنىش بەرۋگە بولادى، جەر – جەردەگى ولكە دارەجەلى اكىمشىلىك ىستەر جاعىندا قىزمەت وتەۋ تەكشەلەرىنە سۇيەنە وتىرىپ، بالا باعۋ قوسىمشا قاراجاتىن الۋعا ءوتىنىش بەرۋ ارناۋلى پاراقشالارى اشىلادى، سونىمەن بىرگە، جىفۋباۋ، ۋيشين قاتارلى ءۇشىنشى جاق قىزمەت وتەۋ تەكشەلەرىندە ءوتىنش بەرۋ ارنالارى اشىلادى. قازىر جىفۋباۋ مەن ۋيشيندە ءوتىنىش بەرۋ ارناسى ينتەرنەتكە قوسىلىپ بولعان، ”بالا باعۋ قوسىمشا قاراجاتى“ (育儿补贴) دەگەن ءسوزدى جازۋ ارقىلى ارناۋلى شاعىن پروگراممانى تاۋىپ الۋعا بولادى.

ينتەرنەتتەن تىس ءوتىنىش بەرۋ

ەرەكشە سەبەپپەن ينتەرنەت ارقىلى ءوتىنىش بەرۋگە مۇمكىندىگى بولماعان جۇرتشىلىققا ارناپ، ينتەرنەتتەن تىس ءبىتىرۋ ارنالارى جانە ارناۋلى قىزمەتكەرلەر ورنالاستىرىلعان، ءوزىڭىز تۇرعان جەردەگى ۇكىمەت ورىندارى جاريالاعان ينفورماتسيالارعا نازار اۋدارىپ، ءوتىنىش بەرۋ باستالعان سوڭ نوپوس داپتەرى، بالانىڭ ومىرگە كەلگەنىن مەديتسينالىق تۇرعىدان ىسپاتتاۋ كۋالىگى قاتارلى قاتىستى ماتەريالداردى الىپ، بالانىڭ نوپوسى قوندىرىلعان اۋىل – قالاشىقتاعى، مالىدەگى قاتىستى ورىندارعا بارىپ ءوتىنىش بەرۋىڭىزگە بولادى.

ىقىلاستى ەسكەرتپە: كوپشىلىكتىڭ ءوز جاعدايىنا قاراي وتىرىپ ءبىتىرۋ ارناسىن تاڭداعانى ءجون، الايدا، مەيلى ينتەرنەت ارقىلى ءبىتىرىڭىز، مەيلى ينتەرنەتتەن تىس جولمەن ءبىتىرىڭىز، بارلىعىندا دا ۇكىمەت جاريالاعان ارنالاردى دۇرىس تانىپ، الدانىپ قالۋدان اباي بولىڭىز.

كەلۋ قاينارى: حالىق تورابى