جۇڭگو حالقىنىڭ جاپون شاپقىنشىلارىنا قارسى سوعىسى مەن دۇنيە جۇزىلىك فاشيزمگە قارسى سوعىس جەڭىسىنىڭ 80 جىلدىعىن ەسكە ءتۇسىرۋ ادەبيەت ـ كوركەمونەر ساۋىق كەشى «ادىلەت، ءسوزسىز، جەڭەدى» بەيجيڭدە سالتاناتپەن وتكىزىلدى

شينحۋا اگەنتتىگىنىڭ 9 ـ ايدىڭ 3 ـ كۇنى بەيجيڭنەن بەرگەن حابارى. ءان اۋەنى اسقاقتاپ، جەڭىس جىرى كوككە ورلەدى؛ ايبىنمەن بيلەنگەن بيلەر ادىلەت كۇشىن ايگىلەدى. جۇڭگو حالقىنىڭ جاپون شاپقىنشىلارىنا قارسى سوعىسى مەن دۇنيە جۇزىلىك فاشيزمگە قارسى سوعىس جەڭىسىنىڭ 80 جىلدىعىن ەسكە ءتۇسىرۋ ادەبيەت ـ كوركەمونەر ساۋىق كەشى «ادىلەت، ءسوزسىز، جەڭەدى» 9 ـ ايدىڭ 3 ـ كۇنى كەشتە بەيجيڭ حالىق سارايىندا سالتاناتپەن وتكىزىلدى. شي جينپيڭ، لي چياڭ، جاۋ لىجي، ۋاڭ حۋنيڭ، ساي چي، ديڭ شۋەشياڭ، لي شي، حان جىڭ قاتارلى پارتيا مەن مەملەكەت باسشىلارى جۇڭگولىق، شەتەلدىك 6000داي قايراتكەرمەن بىرگە ساۋىق كەشىن تاماشالاپ، وسى شۇعىلالى كۇندى بىرگە ەسكە ءتۇسىردى.

حالىق سارايىنىڭ 10 مىڭ ادامدىق ۇلكەن زالىندا شىراقتار جارقىراپ تۇر، 2 ـ قاباتتاعى كوز جىبەرۋ تەكشەسىنە ”تاريحتى ەستە بەرىك ساقتاپ، ارداگەر قۇربانداردى ساعىنا ەسكە الىپ، بەيبىتشىلىكتى قاستەرلەپ، بولاشاققا جول اشايىق“ دەگەن ءسوز جازىلعان كەرمە تۋ ءىلىنىپتى. ساحنانىڭ ءدال ورتاسىندا ”ادىلەت، ءسوزسىز، جەڭەدى“ دەگەن ۇلكەن التىن رەڭدى جازۋ كوز تارتادى، ايبىندى دا اسقاق ۇلى قورعاننىڭ ءپىشىنى جۇڭحۋا ۇلتىنىڭ قاجىماس رۋحاني ارقاۋىنىڭ سيمۆولى بولىپ تۇر.

ساۋىق كەشى باستالاردان بۇرىن پيونەرلەر كونسەرت كورۋگە كەلگەن جاپون شاپقىنشىلارىنا قارسى سوعىسقا قاتىناسقان ساقا جاۋىنگەرلەر، ساقا جولداستار ۋاكىلدەرىنە گۇل سيلادى. ىلە ـ شالا ساقا جاۋىنگەرلەر، ساقا جولداستار پيونەرلەردىڭ قاۋمالاۋىندا ۇلكەن زالداعى كورەرمەندەر مىنبەسىنە كەلىپ وتىردى، بۇكىل زالداعىلار ورىندارىنان تۇرىپ قىزۋ شاپالاق سوعىپ، ولارعا وسكەلەڭ قۇرمەت ءبىلدىردى.

ساعات 19دان 55 مينۋت وتكەندە شات مەرەيلى قوناق قارسى الۋ مۋزيكاسى كوتەرىلدى، شي جينپيڭ قاتارلى باسشى جولداستار ۇلكەن زالعا كىرىپ، جاپون شاپقىنشىلارىنا قارسى سوعىسقا قاتىناسقان ساقا جاۋىنگەرلەر، ساقا جولداستار ۋاكىلدەرىمەن ىقىلاسپەن قول الىستى.

8 رەت شالىنعان ايبىندى دا سالماقتى قوڭىراۋ ءۇنى ىشىندە مۋزيكا ـ ولەڭ ـ كورىنىس كىرىستىرىلگەن «تاۋ ـ وزەندەر ەستە بەرىك ساقتايدى» اتتى نومىرمەن تۇتاس ساۋىق كەشىنىڭ شىمىلدىعى اشىلدى.

1 ـ كورىنىس ”بۋىرقانشى، حۋاڭحىداعى“ كورىنىستىك قويىلىم «جۇڭحۋا ۇلتىنا ءتوندى ەڭ حاۋىپتى اۋىر كۇن»، كورىنىستىك ءان ـ ءبي «قانعا بويالعان اق قايىڭ ورمانى»، ءبي «قىرشىنىنان قيىلۋ» قاسىرەتتەن قابىرعانى قايىستىرسا، مانەرلەپ وقىلعان جانە حوردا شىرقالعان «بۋىرقانشى، حۋاڭحى» كوڭىلدى تولقىتىپ ـ تەبىرەنتىپ، جۇڭگو كوممۋنيستىك پارتياسىنىڭ ۇندەۋىندە جانە باسشىلىعىندا، جۇڭگو حالقىنىڭ شاپقىنشىلارعا قارسى اتتانعان ەرجۇرەكتىگىن، باتىرلىعىن بەينەلەدى. 2 ـ كورىنىس ”قىزىل جۇلدىز جۇڭگونى نۇرلاندىردىداعى“ مانەرلەپ وقىلعان كورىنىستىك جىر «وسى ساۋلە»، ءان ـ ءبي «يان ـ ان! يان ـ ان!» جىگەردى تاسقىنداتسا، كورىنىستىك قويىلىم «جەرتولە مەن اكوپ» ەرەكشە تەبىرەنتىپ، جۇڭگو كوممۋنيستىك پارتياسىنىڭ جاپون شاپقىنشىلارىنا قارسى سوعىس تۋىن بيىك ۇستاپ، تۇتاس ۇلتتىڭ جاپون شاپقىنشىلارىنا قارسى سوعىسىنداعى بەرىك تىرەككە اينالعاندىعىن ايگىلەدى. 3 ـ كورىنىس ”جەڭىلمەس كۇشتەگى“ جەلىلى ءبي مەن جەلىلى ءان «بار الاپتى سوعىس ءورتى قاپتادى»، كورىنىستىك دراما «ماڭگىلىك ءنومىر» جانە ەرلەر توپتىق ءبيى «سوڭىنا دەيىن قاندى شايقاس جۇرگىزۋ» تاۋدى تالقان ەتەرلىك ايبىنمەن پارتيا باسشىلىعىنداعى حالىقتىق سوعىستىڭ تەلەگەي كۇش ـ قۋاتىن ايگىلەدى. 4 ـ كورىنىس ”بىرگە كۇتكەن تاڭداعى“ ءبي «جەلمەن بىرگە سامعاۋ»، كورىنىستىك ولەڭ «وشپەس اۋەن»، ءان «اتسىز قاھارماندار وردەنى» ايبىندى دا تەرەڭ سۇيىسپەنشىلىككە تولى بولىپ، جۇڭگو حالقىنىڭ زور قۇرباندىق بەرۋ ارقىلى دۇنيە جۇزىلىك فاشيزمگە قارسى سوعىستىڭ شىعىس نەگىزگى سوعىس مايدانىنداعى تىرەككە اينالىپ، دۇنيە جۇزىلىك فاشيزمگە قارسى سوعىستىڭ جەڭىسكە جەتۋىنە تاريحي سيپاتتى ۇلەس قوسقاندىعىن جىرلادى. 5 ـ كورىنىس ”ادىلەت بۇلجىمايدىداعى“ كورىنىستىك تىلدەسۋ «ارمانىڭىز ورىندالدى» شىنايى سۇيىسپەنشىلىككە تولدى، سالت قۇرمەت قاراۋىلدارى ءنومىرى «ادىلەتتى قورعاۋ»، حور باستاۋدا جانە حوردا شىرقالعان «بوگەۋ بەرمەس» ساۋىق كەشتى ورلەۋگە كوتەرىپ، جاڭا داۋىردەگى جۇڭگونىڭ سالتاناتتى رايىن بەينەلەپ، ادىلەت، ءسوزسىز، جەڭەدى دەگەن اقيقات كۇشىن ايگىلەدى. اياقتالۋ بۋىنىندا ءبي «تاعدىرلاس بولۋ» ادامزاتتىڭ تاعدىرلاس ورتاق تۇلعاسىن جىرلاۋدىڭ جاراسىمدى كۇي تاراۋى بولدى.

كونسەرت اياقتالعان كەزدە بۇكىل زالداعىلار ورىندارىنان تۇرىپ، «وتاندى جىرلايمىز» ءانىن اسقاقتاتا بىرگە شىرقادى، قىزۋ شاپالاق ءۇنى كوپكە دەيىن تولاستامادى.

تۇتاس ساۋىق كەشى تاريحتىڭ ۋاقىت كەڭىستىگىن، كوركەمونەردىڭ ۋاقىت كەڭىستىگىن، سۇيىسپەنشىلىكتىڭ ۋاقىت كەڭىستىگىن تۇتاستىرا توعىستىرىپ، جۇڭگو حالقىنىڭ جاپون شاپقىنشىلارىنا قارسى سوعىسى مەن دۇنيە جۇزىلىك فاشيزمگە قارسى سوعىستىڭ اسقاق ايبىندى تاريحىنا تەرەڭ سۇيىسپەنشىلىكپەن قايىرىلا قارادى، جۇڭگو كوممۋنيستىك پارتياسىنىڭ جاپون شاپقىنشىلارىنا قارسى سوعىستاعى تىرەكتىك رولىن كورنەكتى بەينەلەدى، جۇڭگو حالقىنىڭ شاپقىنشىلىققا سوققى بەرۋدەگى قاھارماندىق جەڭىس جىرىن اسقاقتاتتى، جۇڭحۋا ۇلتىنىڭ دۇنيە ءجۇزى ۇلتتارى اراسىندا قاسقايىپ تۇرا العان رۋحاني بەت ـ بەينەسىن ايگىلەدى.

جۇڭگو كوممۋنيستىك پارتياسى ورتالىق كوميتەتىنىڭ، مەملەكەتتىك حالىق قۇرىلتايى تۇراقتى كوميتەتىنىڭ، مەملەكەتتىك كەڭەستىڭ، ەڭ جوعارى حالىق سوتى مەكەمەسىنىڭ، ەڭ جوعارى حالىق پروكۋراتۋراسىنىڭ، مەملەكەتتىك ساياسي كەڭەستىڭ، ورتالىق كوميتەت اسكەري ىستەر كوميتەتىنىڭ باسشى جولداستارى، شياڭگاڭ ەرەكشە اكىمشىلىك رايونىنىڭ اكىمى، اۋمىن ەرەكشە اكىمشىلىك رايونىنىڭ اكىمى ساۋىق كەشىن تاماشالادى.

كەشكى ساۋىقتى كورۋگە قاتىناسقانداردان تاعى ورتالىق پارتيا، ۇكىمەت، ارميا، بۇقارالىق ۇيىمداردىڭ ءارقايسى تاراۋىنداعى جانە بەيجيڭ قالاسىنداعى نەگىزگى جاۋاپتى جولداستار، جاپون شاپقىنشىلارىنا قارسى سوعىسقا قاتىناسقان ساقا جاۋىنگەرلەر، ساقا جولداستار، جاپون شاپقىنشىلارىنا قارسى سوعىس قۇرباندارى تۋىس ـ تۋعاندارىنىڭ ۋاكىلدەرى، گومينداڭنىڭ جاپون شاپقىنشىلارىنا قارسى سوعىسقا قاتىناسقان ساقا اسكەرلەرى ۋاكىلدەرى، ەل ءىشى ـ سىرتىنداعى وتانشىل قايراتكەرلەردىڭ، جاپون شاپقىنشىلارىنا قارسى سوعىستاعى قولباسىلاردىڭ ءۇي ىشىندەگىلەرى ۋاكىلدەرى، بەيجيڭدەگى ورتالىق باسقاراتىن فينانس قۇرىلىمدارىنداعى، كاسىپورىندارداعى نەگىزگى جاۋاپتى جولداستار، بەيجيڭدەگى ورتالىق كوميتەتتىڭ مۇشەلەرى، ورتالىق كوميتەت كانديدات مۇشەلەرى، ورتالىق ءتارتىپ تەكسەرۋ كوميتەتىنىڭ مۇشەلەرى، مەملەكەتتىك باقىلاۋ ـ تەكسەرۋ كوميتەتىنىڭ مۇشەلەرى، مەملەكەتتىك حالىق قۇرىلتايى تۇراقتى كوميتەتىنىڭ مۇشەلەرى، مەملەكەتتىك ساياسي كەڭەستىڭ تۇراقتى مۇشەلەرى، ءارقايسى دەموكراتيالىق پارتيا ـ توپتار ورتالىق كوميتەتتەرىنىڭ، مەملەكەتتىك ساۋدا ـ ونەركاسىپشىلەر بىرلەستىگىنىڭ جاۋاپتىلارى جانە پارتيادا، توپتا جوق قايراتكەرلەر ۋاكىلدەرى، ساقا جولداستار ۋاكىلدەرى، ءبىر ءبولىم قايتىس بولعان ساقا جولداستاردىڭ تۋىس ـ تۋعاندارى، ەلەۋلى ەڭبەك ءسىڭىرىپ داڭققا يە بولعانداردىڭ ۋاكىلدەرى، مەملەكەتتىك وزات ۇلگى تۇلعالار ۋاكىلدەرى، شياڭگاڭدىق، اۋمىندىق، تايۋاندىق باۋىرلاستار، شەتەلدەگى چياۋمين باۋىرلاستار ۋاكىلدەرى، استاناداعى ءار سالا بۇقاراسى ۋاكىلدەرى، بەيجيڭدە تۇراتىن اسكەري بولىمدەردەگى وفيتسەر ـ جاۋىنگەرلەردىڭ ۋاكىلدەرى، سونداي ـ اق ءار ەلدىڭ جۇڭگودا تۇراتىن ەلشىلەرى، اسكەري ءمانساپتىلار مەن حالىقارالىق ۇيىمداردىڭ جۇڭگودا تۇراتىن ۋاكىلدەرى، جۇڭگونىڭ جاپون شاپقىنشىلارىنا قارسى سوعىسىنىڭ جەڭىسىنە ۇلەس قوسقان حالىقاراداعى دوستار نەمەسە ولاردىڭ ءۇي ىشىندەگىلەرىنىڭ ۋاكىلدەرى قاتارلىلار بار.