جۇڭگو جاق قاتاڭ سويلەستى: جاپونيا جاقتان انىقتاپ ءتۇسىندىرۋدى تالاپ ەتتى 

8 – ايدىڭ 24 – كۇنى بەيجيڭدە وتكىزىلەتىن جاپون شاپقىنشىلارىنا قارسى سوعىستىڭ جەڭىسكە جەتكەندىگىنىڭ 80 جىلدىعىن ەسكە ءتۇسىرۋ قيمىلى مەن اسكەري پارات سالتى جونىندە جاپونيا جاقتىڭ كەرەناۋ ءسوز جاريالاعانى جونىندە، سول كۇنى سىرتقى ىستەر مينيسترلىگىنىڭ كەزەكتى تىلشىلەردى قابىلداۋ ماجىلىسىندە، مالىمدەمەشى گو جياكۇن جۇڭگونىڭ جاپونيا جاقپەن قاتاڭ سويلەسكەنىن، جاپونيا جاقتان انىقتاپ ءتۇسىندىرۋدى تالاپ ەتكەنىن ءبىلدىردى.

گو جياكۇن مىنانى اتاپ كورسەتتى: جۇڭگو ۇكىمەتىنىڭ جۇڭگو حالقىنىڭ جاپون شاپقىنشىلارىنا قارسى سوعىس پەن دۇنيە جۇزىلىك فاشيزمگە قارسى سوعىستىڭ جەڭىسكە جەتكەندىگىنىڭ 80 جىلدىعىن ايبىندى تۇردە ەسكە الۋى — تاريحتى ەستە بەرىك ساقتاپ، قۇربانداردى ەسكە ءتۇسىرۋ، بەيبىتشىلىكتى قاستەرلەپ، بولاشاققا جول اشۋ. تاريحقا دۇرىس كوزقاراستا بولاتىن، تاريحتان شىنايى ساباق الاتىن، بەيبىت دامۋعا شىنايى كۇش سالاتىن ءارقانداي مەملەكەت بۇدان كۇدىكتەنبەيدى، ءتىپتى بوتەن پىكىردى ورتاعا قويمايدى.

گو جياكۇن مىنانى ءبىلدىردى: تاريحتى دۇرىس تانۋ جانە وعان دۇرىس كوزقاراستا بولۋ — جاپونيانىڭ سوعىستان كەيىن حالىقارالىق قوعامعا قايتىپ ورالۋىنداعى ماڭىزدى العى شارت، جاپونيانىڭ توڭىرەگىندەگى مەملەكەتتەرمەن قارىم – قاتىناسىن دامىتۋىنىڭ ساياسي نەگىزى، جاپونيانىڭ بەيبىت جولمەن دامۋ سىندى ۋادەسىندە تۇرا الاتىن – المايتىنىن سىنايتىن ولشەم. ەگەر جاپونيا تاريحي ماسەلەنىڭ وسى پاراقشاسىن شىنايى جابۋدى ويلاسا، شاپقىنشىلىق جاساعان تاريحىنا شىنشىل پوزيتسيامەن دۇرىس قاراۋى ءارى قاتەلىگىنە ءۇڭىلۋى، ميليتاريزممەن ءۇزىلدى - كەسىلدى ات كەكىلىن كەسۋى، بەيبىت دامۋ جولىمەن جۇرۋگە تاباندى بولۋى، جۇڭگو قاتارلى زيانعا ۇشىراعان مەملەكەتتەردەگى حالىقتىڭ سەزىمىنە شىنايى قۇرمەت ەتۋى كەرەك، سوندا عانا ازياداعى كورشىلەس ەلدەر مەن حالىقارالىق قوعامنىڭ سەنىمىنە يە بولا الادى.

كەلۋ قاينارى: حالىق تورابى