”جوعارى قارقىندى تاس جولدا ۇرەيلى بەتقالقا تاققان جىگىت“ تۋرالى ساقشى جاق حابارلاندىرۋ شىعاردى 

جۋىردا ءبىر توراپتاستىڭ جوعارى قارقىندى تاس جولدا ۇرەيلى بەتقالقا تاققان ادامنىڭ جولدان وتكەن اۆتوموبيلدەگىلەردى ۇرەيلەندىرگەنىن ايتقانى جۇرتتىڭ نازارىن اۋدارعان. ينتەرنەتتە جاريالانعان كەسكىنگە قاراعاندا، جوعارى قارقىندى تاس جولدا كەتىپ بارا جاتقان اۆتوموبيلدەگى شوفەردىڭ جانىندا وتىرعان ادام ۇرەيلى بەتقالعا تاعىپ، قاتارلاسىپ كەلە جاتقان اۆتوموبيلدەرگە قاراي قاراعان.

8 – ايدىڭ 27 – كۇنى حاڭجوۋ قالالىق قوعام حاۋىپسىزدىگى مەكەمەسى جوعارى قارقىندى تاس جولداعى قاتىناس ساقشى بولىمشە اترەتى ”چاڭچۇن – شىنجىن جوعارى قارقىندى تاس جولىندا ۇرەيلى بەتقالقا تاققان ادامنىڭ جولدان وتكەن اۆتوموبيلدەگىلەردى ۇرەيلەندىرگەنى“ جونىندە ساقشى جاقتىڭ حابارلاندىرۋىن شىعارعان. حابارلاندىرۋ مازمۇنى مىناداي:

ساقشى جاقتىڭ حابارلاندىرۋى

ينتەرنەتتە تاراعان ”چاڭچۇن – شىنجىن جوعارى قارقىندى تاس جولىندا بىرەۋ ۇرەيلى بەتقالقامەن جولدان وتكەن اۆتوموبيلدەگىلەردى ۇرەيلەندىرگەن“ دەگەن جاعداي جونىندە تەكسەرۋ جۇرگىزۋگە قاراعاندا، بۇل ىسكە قاتىستى ادام شياۋشان رايونىنداعى ءمالىم مەكتەپتىڭ شەتەلدىك وقىتۋشىسى Hugo (ەر، 42 جاستا) ەكەن. 8 – ايدىڭ 24 – كۇنى ساعات 16 دان 57 مينۋت وتكەندە، ول دوسىنىڭ اۆتوموبيلىمەن G25 چاڭچۇن – شىنجىن جوعارى قارقىندى تاس جولى ارقىلى حاڭجوۋعا قايتقان، اۆتوموبيل فۋياڭ رايونىنىڭ لۇڭمىن دەگەن جەرىندەگى جول ايرىعىنا جەتكەن كەزدە، سومكەسىنەن ۇساق – تۇيەك تاعامداردى الىپ جەمەكشى بولعان كەزدە بەتقالقانى كورىپ (Hugo بۇل بەتقالقانى 2024 – جىى 11 – ايدا ينتەرنەت ارقىلى ساتىپ العان)، بەتقالقانى تاعىپ العان، مۇنى ءبىر باعىتتا كەلە جاتقان باسقا اۆتوموبيلدەگىلەر كورگەن ءارى قول تەلەفونىمەن كەسكىنگە ءتۇسىرىپ العان. ەكى اۆتوموبيل 9 سەكۋندتاي ۋاقىت قاتارلاسىپ جۇرگەن، وسى ارالىقتا ەكى جاقتىڭ ءبىر – بىرىمەن سويلەسكەنى نەمەسە باسقاداي قالىپسىز ارەكەت ىستەگەنى بايقالماعان. ساعات 17 دەن 27 مينۋت وتكەندە، اتالعان ىسكە قاتىستى اۆتوموبيل حاڭجوۋ تۇستىك بەكەتىندەگى اقى الۋ ورنىنان وتكەن، اۆتوموبيلدەگى ادام بەتقالقا تاقپاعان.

بۇل ارەكەت ەشقانداي زارداپ تۋدىرماعانىمەن، اۆتوموبيلدەردىڭ قاتىناۋ حاۋىپسىزدىگىنە ىقپال جاساۋ ىقتيمالدىعىن ەسكەرە وتىرىپ، قوعام حاۋىپسىزدىگى ورگاندارى بۇل ىسكە قاتىستى ادامدى دەرەۋ تاۋىپ، وعان سىن ايتىپ، تاربيە بەرگەن. ول ءوزىنىڭ وكىنەتىنىن بىلدىرگەن ءارى وسى ىسكە قاتىستى ادامداردان كەشىرىم سۇراپ، ولاردىڭ كەشىرىمىنە يە بولعان ءارى وسى ءىستىڭ جۇرت نازارىن اۋدارعانى جونىندە بارشا توراپتاستاردان كەشىرىم سۇراعان. حاڭجوۋ جوعارى قارقىندى تاس جولى قاتىناس ساقشىسى بارشا شوفەرلەرگە مىنانى ەسكەرتەدى: اۆتوموبيلدى وركەنيەتتى جۇرگىزىپ، حاۋىپتى ارەكەتتەرگە تيىم سالۋ قاجەت، ەگەر وسى تەكتەس جاعدايلارعا جولىقساڭىز، بايسالدى بولىپ، حاۋىپسىزدىككە كەپىلدىك ەتكەن سوڭ، دەر كەزىندە 12122 نومىرىنە تەلەفون سوعىپ، ساقشىعا مالىمدەڭىز.

كەلۋ قاينارى: حالىق تورابى