شي جينپيڭ يندونەزيا زۇڭتۇڭى پرابوۋومەن كەزدەستى

شينحۋا اگەنتتىگىنىڭ 9 ـ ايدىڭ 3 ـ كۇنى بەيجيڭنەن بەرگەن حابارى (تىلشىلەر ياڭ يجۇن، ۋىن شين). 9 ـ ايدىڭ 3 ـ كۇنى تۇستەن كەيىن مەملەكەت ءتوراعاسى شي جينپيڭ بەيجيڭ حالىق سارايىندا جۇڭگو حالقىنىڭ جاپون شاپقىنشىلارىنا قارسى سوعىسى مەن دۇنيە جۇزىلىك فاشيزمگە قارسى سوعىس جەڭىسىنىڭ 80 جىلدىعىن ەسكە ءتۇسىرۋ قيمىلىنا قاتىناسۋ ءۇشىن جۇڭگوعا ارنايى كەلگەن يندونەزيا زۇڭتۇڭى پرابوۋومەن كەزدەستى.

شي جينپيڭ بىلاي دەپ اتاپ كورسەتتى: زۇڭتۇڭ مىرزانىڭ قيىنشىلىقتى جەڭىپ، جۇڭگوعا كەلىپ ەسكە ءتۇسىرۋ قيمىلىنا قاتىناسۋى جۇڭگو - يندونەزيا قارىم ـ قاتىناسىنا ءمان بەرەتىندىگىن جانە يندونەزيا حالقىنىڭ جۇڭگو حالقىنا شىنايى دوستىق سۇيىسپەنشىلىگىن ايگىلەدى. جۇڭگو جاق زۇڭتۇڭ مىرزانىڭ بيلىك جۇرگىزۋىن قولدايدى، يندونەزيانىڭ تەز ارادا ءتارتىپ پەن ورنىقتىلىقتى قالپىنا كەلتىرۋىن قولدايدى، يندونەزيانىڭ دامىپ، زورايۋىن قولدايدى. بيىل جۇڭگو مەن يندونەزيا ديپلوماتيالىق قارىم ـ قاتىناس ورناتقاندىعىنىڭ 75 جىلدىعى، سونداي ـ اق يندونەزيانىڭ تاۋەلسىزدىك العاندىعىنىڭ 80 جىلدىعى جانە باندۇڭ ءماجىلىسى اشىلعاندىعىنىڭ 70 جىلدىعى. مەيلى حالىقارالىق جاعداي قالاي وزگەرسە دە، جۇڭگو مەن يندونەزيا باستان ـ اياق دەربەس، وزىنە ـ ءوزى قوجايىن بولۋ سىندى ۇلت رۋحىن جالعاستىرىپ، سەلبەسىپ تەڭ يگىلىككە كەنەلۋ سىندى قارىم ـ قاتىناس جاساۋ جولىنا تاباندى بولىپ، بەيبىت دامۋداعى ءىرى ەل جاۋاپكەرشىلىگىن ايگىلەپ كەلەدى. جۇڭگو جاق يندونەزيامەن ديپلوماتيالىق قارىم ـ قاتىناس ورناتۋداعى اۋەلگى ماقساتتى بەرىك ۇستانىپ، بەيبىت قاتار تۇرۋ بەس پرينسيبى مەن باندۇڭ رۋحىن اسقاقتاتىپ، جۇڭگو مەن يندونەزيانىڭ تاعدىرلاس ورتاق تۇلعاسى قۇرىلىسىن جوعارى دەڭگەيدە ىلگەرىلەتىپ، ادامزاتتىڭ العا باسۋ ىستەرىنە تيەسەلى ۇلەس قوسۋدى قالايدى.

شي جينپيڭ بىلاي دەپ باسا دارىپتەدى: ەكى جاق دۇرىس بەتالىستى كوزدەپ، جان ـ جاقتى ستراتەگيالىق ىستەستىك پەن دامۋ ستراتەگياسىن ءتۇيىلىستىرۋدى تەرەڭدەتىپ، جۇڭگو - يندونەزيا قارىم ـ قاتىناسىنىڭ ورنىقتى قاداممەن الىسقا جەتۋىن ىلگەرىلەتىپ، ءوڭىر، ءتىپتى، بۇكىل جەر شارى دەڭگەيىندە ۇلگى كورسەتۋ رولىن اتقارۋى كەرەك. سىرتقى ىستەر مينيسترلەرى مەن قورعانىس مينيسترلەرىنىڭ “2+2” تىلدەسۋ مەحانيزمىنەن ويداعىداي پايدالانىپ، حاۋىپسىزدىك جانە قورعانىس ىستەرى سەلبەستىگىن تەرەڭدەتۋ كەرەك. ”ءبىر بەلدەۋ، ءبىر جولدى“ جوعارى ساپامەن بىرگە قۇرىپ، قوس بەتالىستا ەسىك اشۋدى كەڭەيتىپ، شەشۋشى كەن ونىمدەرى، سيفرلى ەكونوميكا، جاساندى زەردە، اۋىل شارۋاشىلىعى، بالىق شارۋاشىلىعى سالاسىنداعى سەلبەستىگىن كەڭەيتۋ كەرەك. جۇڭگو جاق يندونەزيامەن كەدەيلىكتەن ارىلتۋدان قامال الۋ تاجىريبەلەرىن ءبولىسىپ، ادامداردىڭ بارىس ـ كەلىسىنە قولايلىلىق جاساپ، گۋمانيتارلىق اۋىس ـ كۇيىستى كۇشەيتۋدى قالايدى. جۇڭگو مەن يندونەزيا بىردەي جەر شارىنىڭ وڭتۇستىگىندەگى ءىرى ەل، سىڭار جاقتى زورەكەرلىك ارەكەتتەرگە تىزە قوسا قارسى تۇرىپ، ءوڭىردىڭ بەيبىتشىلىگى، ورنىقتىلىعى مەن حالىقارالىق ادىلدىكتى، ادىلەتتىلىكتى قورعاۋى كەرەك.

پرابوۋو ەل ىشىندەگى جاعدايدى تانىستىرىپ مىنالاردى ءبىلدىردى: جاعداي ورنىقتىلىققا قاراي بەت الىپ بارادى. جۇڭگو حالقىمەن بىرگە جاپون شاپقىنشىلارىنا قارسى سوعىس جەڭىسىنىڭ 80 جىلدىعىن قۇتتىقتاعانىما توتەنشە قۋانىشتىمىن. يندونەزيا مەن جۇڭگو جاقسى دوس، ناعىز دوس. جۇڭگومەن قارىم ـ قاتىناس — يندونەزيانىڭ ديپلوماتيالىق ساياساتىنىڭ ەڭ ماڭىزدى ءتۇيىنى، جۇڭگو جاقتىڭ ۇزاق ۋاقىتتان بەرى، يندونەزيانىڭ ەكونوميكالىق، قوعامدىق دامۋىنا قىمباتتى قولداۋ كورسەتكەندىگىنە العىس ايتامىن. ەكى ەل قارىم ـ قاتىناسى تاريحتاعى ەڭ تاماشا مەزگىلدە تۇر. يندونەزيا جۇڭگو جاقپەن ساۋدا، قارجى قوسۋ، فينانس، نەگىزدىك قۇرىلعى سياقتى سالالارداعى سەلبەستىكتى كۇشەيتىپ، ەكى ەل قارىم ـ قاتىناسىندا اناعۇرلىم كوپ جەتىستىكتەرگە قول جەتكىزۋدى ىلگەرىلەتىپ، ەكى ەل حالقىنا ءتىپتى دە زور باقىت جاراتىپ، ءوڭىردىڭ بەيبىتشىلىگى مەن ورنىقتىلىعىن جەبەۋگە بەلسەندى ۇلەس قوسۋدى ءۇمىت ەتەدى.

ساي چي، ۋاڭ ي قاتارلىلار كەزدەسۋگە قاتىناستى.