شي جينپيڭ چاۋشيان ەڭبەك پارتياسىنىڭ باس شۋجيى، مەملەكەت ىستەرى كوميتەتىنىڭ باستىعى جين جىڭىنمەن كەڭەس وتكىزدى

9 - ايدىڭ 4 - كۇنى كەشتە جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى شي جينپيڭ بەيجيڭدەگى حالىق سارايىندا جۇڭگو حالقىنىڭ جاپون شاپقىنشىلارىنا قارسى سوعىسى مەن دۇنيە جۇزىلىك فاشيزمگە قارسى سوعىس جەڭىسىنىڭ 80 جىلدىعىن ەسكە ءتۇسىرۋ قيمىلىنا قاتىناسۋ ءۇشىن جۇڭگوعا كەلگەن چاۋشيان ەڭبەك پارتياسىنىڭ باس شۋجيى، مەملەكەت ىستەر كوميتەتىنىڭ باستىعى جين جىڭىنمەن كەڭەس وتكىزدى.

سۋرەتتى شينحۋا اگەنتتىگىنىڭ ءتىلشىسى حۋاڭ جيڭۋىن فوتوسى

«حالىق گازەتى»، 9 - ايدىڭ 4 - كۇنى، بەيجيڭ (ءتىلشى دۋ شاڭزى). 9 - ايدىڭ 4 - كۇنى كەشتە جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى شي جينپيڭ بەيجيڭدەگى حالىق سارايىندا جۇڭگو حالقىنىڭ جاپون شاپقىنشىلارىنا قارسى سوعىسى مەن دۇنيە جۇزىلىك فاشيزمگە قارسى سوعىس جەڭىسىنىڭ 80 جىلدىعىن ەسكە ءتۇسىرۋ قيمىلىنا قاتىناسۋ ءۇشىن جۇڭگوعا كەلگەن چاۋشيان ەڭبەك پارتياسىنىڭ باس شۋجيى، مەملەكەت ىستەر كوميتەتىنىڭ باستىعى جين جىڭىنمەن كەڭەس وتكىزدى.

شي جينپيڭ بىلاي دەپ اتاپ كورسەتتى: جۇڭگو مەن چاۋشيان − تاعدىرلاس، ءوزارا قارايلاساتىن جاقسى كورشى، جاقسى دوس، جاقسى جولداس. جۇڭگو مەن چاۋشياننىڭ دوستىعى ارىدان باستاۋ الادى، ەكى ەل دە − كوممۋنيستىك پارتيا باسشىلىق ەتكەن سوتسياليستىك مەملەكەت، ورتاق مۇرات - سەنىمى جانە كۇرەس نىساناسى بار. باس شۋجي جين جىڭىن جۇڭگوعا كەلىپ جۇڭگو حالقىنىڭ جاپون شاپقىنشىلارىنا قارسى سوعىسى مەن دۇنيە جۇزىلىك فاشيزمگە قارسى سوعىس جەڭىسىنىڭ 80 جىلدىعىن ەسكە ءتۇسىرۋ قيمىلىنا قاتىناسىپ، چاۋشياننىڭ دۇنيە جۇزىلىك ەكىنشى سوعىستىڭ جەڭىس جەتىستىكتەرىن قورعاۋداعى بەرىك ەركىن ايگىلەدى، سونداي - اق جۇڭگو مەن چاۋشيان پارتيالارىنىڭ، ەلدەرىنىڭ دوستىق سەلبەستىك قارىم - قاتىناسىن ونان ارى دامىتۋىنا ماڭىزدى وراي ازىرلەدى.

شي جينپيڭ چاۋشيان ەڭبەك پارتياسى قۇرىلعاندىعىنىڭ 80 جىلدىعىن قۇتتىقتاپ، بىلاي دەپ باسا دارىپتەدى: جۇڭگو جۇڭگو ۇلگىسىندەگى وسىزامانداندىرۋ ارقىلى مەملەكەتتى قۇدىرەتتەندىرۋ قۇرىلىسىن، ۇلتتىڭ گۇلدەنۋى ۇلى ءىسىن جاپپاي ىلگەرىلەتۋدە، چاۋشياننىڭ سوتسياليستىك قۇرىلىسىندا ۇزدىكسىز تىڭ تابىستارعا قول جەتتى. جۇڭگو پارتياسى مەن ۇكىمەتى جۇڭگو مەن چاۋشياننىڭ ءداستۇرلى دوستىعىنا ايرىقشا ءمان بەرەدى، جۇڭگو - چاۋشيان قارىم - قاتىناسىن ويداعىداي قورعاۋدى، بەكەمدەۋدى، دامىتۋدى قالايدى. حالىقارالىق جاعداي قالاي وزگەرسە دە، وسى تۇرعى وزگەرمەيدى. جۇڭگو جاق چاۋشياننىڭ ءوز ەلىنىڭ مەملەكەت جاعدايىنا ۇيلەسەتىن دامۋ جولىمەن ءجۇرىپ، چاۋشياننىڭ سوتسياليزم ىستەرىنىڭ جاڭا جاعدايىن ۇزدىكسىز اشۋىن بۇرىنعىداي قولدايدى. چاۋشيان جاقپەن جوعارى جىكتەگىلەردىڭ بارىس - كەلىسى مەن ستراتەگيالىق قارىم - قاتىناسىن كۇشەيتىپ، پارتيانى، مەملەكەتتى جونگە سالۋ تاجىريبەلەرىن اۋىستىرۋدى تەرەڭدەتىپ، ءوزارا ءتۇسىنىسۋ مەن دوستىقتى تەرەڭدەتۋدى قالايمىز. ءار جىكتەگىلەردىڭ ىقپالداستىعىن جيىلەتىپ، ءار سالادا ناقتى سەلبەستىك ورىستەتۋ كەرەك.

شي جينپيڭ بىلاي دەپ باسا دارىپتەدى: بۇرىن - سوڭدى بولماعان دۇنيە جۇزىلىك سىن - سايىس الدىندا، مەن ىلگەرىندى - كەيىندى ادامزاتتىڭ تاعدىرلاس ورتاق تۇلعاسىن قۇرۋ ۇستانىمىن جانە دۇنيە جۇزىلىك دامۋ باستاماسىن، دۇنيە جۇزىلىك حاۋىپسىزدىك باستاماسىن، دۇنيە جۇزىلىك وركەنيەت باستاماسىن، عالامدىق جونگە سالۋ باستاماسىن العا قويىپ، چاۋشيان جاقتىڭ بەلسەنە قولداۋىنا جانە ءۇن قوسۋىنا يە بولدىم. جۇڭگو مەن چاۋشيان حالىقارالىق جانە وڭىرلىك ىستەردە ستراتەگيالىق سەلبەستىكتى كۇشەيتىپ، ورتاق مۇددەنى قورعاۋى كەرەك. چاۋشيان تۇبەگى ماسەلەسىندە جۇڭگو باستان - اياق وبيەكتيۆ، ءادىل تۇرعىدا تۇرىپ، چاۋشيان جاقپەن سايكەسۋدى ۇزدىكسىز كۇشەيتىپ، چاۋشيان تۇبەگىنىڭ بەيبىتشىلىگى مەن ورنىقتىلىعىن بار كۇشپەن قورعاۋدى قالايدى.

جين جىڭىن مىنالاردى ءبىلدىردى: جۇڭگو حالقىنىڭ جاپون شاپقىنشىلارىنا قارسى سوعىسى مەن دۇنيە جۇزىلىك فاشيزمگە قارسى سوعىس جەڭىسىنىڭ 80 جىلدىعىن ەسكە ءتۇسىرۋ قيمىلى سالتاناتتى، دابىرالى بولىپ، كۇللى دۇنيە ءجۇزىن جالت قاراتتى، بۇل جۇڭگونىڭ دۇنيە ءجۇزىنىڭ بەيبىتشىلىگىن قورعاۋداعى بەرىك بەكىمىن، جۇڭگونىڭ ماڭىزدى حالىقارالىق ورنى مەن ىقپالىن ايگىلەدى. چاۋشيان مەن جۇڭگونىڭ اعا بۋىن باسشىلارى جاپون شاپقىنشىلارىنا قارسى سوعىستا تەرەڭ دوستىق ورناتتى، ءبىز مۇنى ۇرپاقتان - ۇرپاققا جالعاستىرۋعا مىندەتتىمىز. حالىقارالىق جاعداي قالاي وزگەرسە دە، چاۋشيان مەن جۇڭگو اراسىنداعى دوستىق سۇيىسپەنشىلىك وزگەرمەيدى، چاۋشيان مەن جۇڭگو قارىم - قاتىناسىن ۇزدىكسىز تەرەڭدەتۋ جانە دامىتۋ − چاۋشيان جاقتىڭ بەرىك تىلەگى. چاۋشيان جاق تايۋان، شيزاڭ، شينجياڭ سياقتى جۇڭگونىڭ وزەكتى مۇددەسىنە ساياتىن ماسەلەلەردە جۇڭگونىڭ تۇرعىسىن ۇزدىكسىز باتىل قولدايدى، جۇڭگونىڭ مەملەكەتتىڭ يەلىك ۇقىعى مەن تەرريتوريا تۇتاستىعىن قورعاۋىن قولدايدى، جۇڭگونىڭ ۇزاق ۋاقىتتان بەرى چاۋشياننىڭ سوتسياليزم ىستەرىن تاباندىلىقپەن قولداعانىنا ءارى قاستەرلى قولداۋ كورسەتكەنىنە جانە كومەكتەسكەنىنە العىس ايتامىز.

جين جىڭىن بىلاي دەپ اتاپ كورسەتتى: باس شۋجي شي جينپيڭنىڭ پارمەندى باسشىلىعىندا، شي جينپيڭ جاڭا ءداۋىر جۇڭگوشا سوتسياليزم يدەياسىنىڭ جەتەكشىلىگىندە، جۇڭگو ۇلى دامۋ جەتىستىكتەرىنە قول جەتكىزدى. چاۋشيان جاق جۇڭگو جاقپەن ەكى پارتيانىڭ، ەكى ەلدىڭ ءار دارەجەلى بارىس - كەلىسىن جيىلەتىپ، پارتيا قۇرىلىسى، ەكونوميكالىق دامۋ سياقتى جاقتارداعى تاجىريبە اۋىس - كۇيىسىن ورىستەتىپ، چاۋشياننىڭ پارتيا جانە مەملەكەت قۇرىلىسى ىستەرىنىڭ دامۋىنا دەم بەرۋدى قالايدى. ەكى ەلدىڭ ءوزارا ءتيىمدى ەكونوميكا - ساۋدا سەلبەستىگىن تەرەڭدەتىپ، ءتىپتى دە كوپ ناتيجەلەردى قولعا كەلتىرۋىن ءۇمىت ەتەمى. چاۋشيان جاق جۇڭگو جاقتىڭ چاۋشيان تۇبەگى ماسەلەسىندەگى ءادىل تۇرعىسىن القايدى، بىرلەسكەن مەملەكەتتەر ۇيىمى سياقتى كوپ جاقتى تۇعىرلاردا سايكەسۋدى ۇزدىكسىز كۇشەيتىپ، ەكى جاقتىڭ ورتاق جانە ءتۇبىرلى مۇددەسىن ويداعىداي قورعاۋدى قالايدى.

سول كۇنى كەشتە شي جينپيڭ جين جىڭىنمەن شاعىن كولەمدە شاي ىشە وتىرىپ اڭگىمەلەستى ءارى قوناعاسى بەردى.

ساي چي، ۋاڭ ي جوعارىداعى قيمىلدارعا قاتىناستى.