سىرتقى ىستەر مينيسترلىگى: نەپالداعى جۇڭگو ازاماتتارى مەن قۇرىلىمدارىنا نەپالدىڭ حاۋىپسىزدىك جاعدايىنا قاداعالاي نازار اۋدارۋدى ەسكەرتتى

9 – ايدىڭ 10 – كۇنى، سىرتقى ىستەر مينيسترلىگىنىڭ مالىمدەمەشىسى لين جيان كەزەكتى تىلشىلەر جينالىسىن باسقارىپ، نەپالدان حۋاچياۋلاردى شەگىندىرۋ جوسپارىنىڭ بار ـ جوقتىعىنا جاۋاپ بەردى.

لين جيان بىلاي دەدى: قازىرگە دەيىن ءبىز جۇڭگو ازاماتتارىنىڭ جارالانۋى، ءولىم - ءجىتىمى جونىندەگى مالىمەتتى تاپسىرىپ المادىق. نەپالدا ەرەۋىل جاساپ، قىر كورسەتكەننەن كەيىن، سىرتقى ىستەر مينيسترلىگى مەن نەپالدا تۇراتىن ەلشىحانا كونسۋلدىق قورعاۋدىڭ شۇعىل جاعدايعا توتەپ بەرۋ مەحانيزمىن دەرەۋ ىسكە قوسىپ، نەپالدان جۇڭگو ازاماتتارى مەن قۇرىلىمدارىنىڭ حاۋىپسىزدىگىن شىنايى قامتاماسىزداندىرۋدى تالاپ ەتتى، ەلشىحانا جەرگىلىكتى جۇڭگو ازاماتتارىمەن جانە قۇرىلىمدارىمەن تىعىز بايلانىس جاساپ، ولاردىڭ حاۋىپسىزدىك ساقتىعى مەن شۇعىل قورعانۋىنا جەتەكشىلىك ەتتى ءارى قاجەتتى جۇڭگو ازاماتتارىنا بەلسەنە كومەك كورسەتتى. بۇل ارادا ءبىز نەپالداعى جۇڭگو ازاماتتارى مەن قۇرىلىمدارىنا نەپالدىڭ حاۋىپسىزدىك جاعدايىنا قاداعالاي نازار اۋدارىپ، قىراعىلىقتى ارتتىرىپ، شىنايى شارالار قولدانىپ، حاۋىپسىزدىك ساقتىعىن كۇشەيتىپ، شۇعىل جاعدايعا توتەپ بەرۋ دايىندىعىن جاقسى ىستەپ، قاجەت بولماسا سىرتقا شىقپاۋدى، ەگەر شۇعىل جاعدايعا تاپ بولسا، جۇڭگونىڭ نەپالدا تۇراتىن ەلشىحاناسىمەن دەر كەزىندە بايلانىس جاساپ، كومەك سۇراۋدى ەسكەرتەمىز.

كەلۋ قاينارى: حالىق تورابى