جاڭا ۇلگىدەگى جۇمىرتقا ونىمدەرىن ءوندىرۋ رۇقساتىن تەكسەرۋ ەرەجەسى كەلەر جىلى اتقارىلادى

شينحۋا اگەنتتىگىنىڭ 10 - ايدىڭ 21 – كۇنى بەيجيڭنەن بەرگەن حابارى. بازاردى باقىلاۋ - باسقارۋ باس مەكەمەسى تاياۋدا «جۇمىرتقا ونىمدەرىن ءوندىرۋ رۇقساتىن تەكسەرۋ ناقتى ەرەجەسىن (2025 - جىلعى نۇسقاسى)» جاريالادى، بۇل ەرەجە 2026 - جىلى 1 - ايدىڭ 1 - كۇنىنەن باستاپ اتقارىلادى. جاڭا ەرەجە سۇيىق جۇمىرتقا ونىمدەرى قاتارلى جاڭا ونىمدەردى تۇڭعىش رەت ءوندىرىس رۇقساتىن تەكسەرۋ كولەمىنە ەنگىزدى.

بۇل ءتىلشىنىڭ 10 – ايدىڭ 21 – كۇنى بازاردى باقىلاۋ ـ باسقارۋ باس مەكەمەسىنەن ۇعىسقان حابارى. جاڭا ەرەجەنىڭ ماقساتى جۇمىرتقا ونىمدەرىن ءوندىرۋ رۇقساتىن ونان ارى ارناعا ءتۇسىرىپ، جۇمىرتقا ونىمدەرىن وندىرەتىن كاسىپورىنداردى باقىلاۋ ـ باسقارۋدى كۇشەيتىپ، جۇمىرتقا ونىمدەرىنىڭ ساپا حاۋىپسىزدىگىن شىنايى قامتاماسىز ەتىپ، جۇمىرتقا ونىمدەرى كاسىبىنىڭ دارەجەسىن جوعارىلاتۋعا دەم بەرۋ. بۇرىنعى «جۇمىرتقا ونىمدەرىن ءوندىرۋ رۇقساتىن تەكسەرۋ ناقتى ەرەجەسى (2006 – جىلعى نۇسقاسى)» ۇقساس ءبىر ۋاقىتتا كۇشىنەن قالدىرىلادى.

جاڭا ەرەجە مىناداي ءۇش جاقتان وزگەرىس ەنگىزىپ كەمەلدەندىرۋگە باسا ءمان بەردى. ءبىرىنشى، زاڭ، زاڭدىق ەرەجەلەردىڭ جاڭا بەلگىلەمەسى، ازىق - تۇلىك حاۋىپسىزدىگىنىڭ مەملەكەتتىك ولشەمىنىڭ جاڭا تالابى بويىنشا، جۇمىرتقا ونىمدەرى كاسىپورىندارىنىڭ ءوندىرىس ورنى، جابدىق قۇرىلعىلارى، جابدىقتاردى ورنالاستىرۋ جانە تەحنولوگيا بارىسى، قىزمەتكەرلەردى باسقارۋ، باسقارۋ ءتۇزىمى، ونىمدەردى سىناق رەتىندە جاساۋ قاتارلىلارعا ەڭ جاڭا تەكسەرۋ تالابى قويىلدى، رۇقساتتى تەكسەرۋ تالابى مەن زاڭ، زاڭدىق ەرەجەلەردىڭ ولشەمىن ۇشتاستىرۋدى كۇشەيتتى. ەكىنشى، ازىق - تۇلىك حاۋىپسىزدىگى حاۋىپ - قاتەرىن پارىقتاۋ مەن ودان ساقتانۋدى كورنەكتىلەندىرىپ، جۇمىرتقا ونىمدەرىن وندىرەتىن كاسىپورىنداردىڭ ساتىپ الۋدى باسقارۋ جانە زات ەنگىزۋ، ءوندىرىس بارىسىن تىزگىندەۋ، تەكسەرۋ - باسقارۋ، سونداي - اق زاۆودتان شىعارۋ، تەكسەرۋ ەستەلىگى قاتارلى تۇزىمدەردى قاتاڭ جاساپ جانە اتقارىپ، جۇمىرتقا ونىمدەرىن باقىلاۋ - باسقارۋدىڭ عىلىميلىعىن، ونىمدىلىگىن شىنايى جوعارىلاتتى. ءۇشىنشى، سۇيىق جۇمىرتقا ونىمدەرى قاتارلى جاڭا ونىمدەردى تۇڭعىش رەت ءوندىرىس رۇقساتىن تەكسەرۋ كولەمىنە ەنگىزىپ، كاسىپ سالاسىنىڭ دامۋ قاجەتىنە بەلسەنە جاۋاپ قايتارىپ، جۇمىرتقا ونىمدەرى كاسىبىنىڭ جوعارى ساپالى دامۋىنا دەم بەردى.

كەلۋ قاينارى: حالىق تورابى