شي جينپيڭ كورەياعا بارىپ ازيا - تىنىق مۇحيت ەكونوميكالىق سەلبەستىك ۇيىمىنىڭ 32 ـ رەتكى باسشىلار بەيرەسمي ماجىلىسىنە قاتىناسادى ءارى كورەيادا مەملەكەتتىك ساپاردا بولادى

شينحۋا اگەنتتىگىنىڭ 10 ـ ايدىڭ 24 ـ كۇنى بەيجيڭنەن بەرگەن حابارى. سىرتقى ىستەر مينيسترلىگىنىڭ مالىمدەمەشىسى 10 ـ ايدىڭ 24 ـ كۇنى مىنانى جاريالادى: كورەيا رەسپۋبليكاسىنىڭ زۇڭتۇڭى لي زايميڭنىڭ ۇسىنىسىنا ساي، مەملەكەت ءتوراعاسى شي جينپيڭ 10 ـ ايدىڭ 30 ـ كۇنىنەن 11 ـ ايدىڭ 1 ـ كۇنىنە دەيىن كورەيانىڭ چيڭجوۋىنا بارىپ، ازيا - تىنىق مۇحيت ەكونوميكالىق سەلبەستىك ۇيىمىنىڭ 32 ـ رەتكى باسشىلار بەيرەسمي ماجىلىسىنە قاتىناسادى ءارى كورەيادا مەملەكەتتىك ساپاردا بولادى.

شينحۋا اگەنتتىگىنىڭ 10 ـ ايدىڭ 24 ـ كۇنى بەيجيڭنەن بەرگەن حابارى (تىلشىلەر دۇڭ شۋە، ما جويان). كورەيا رەسپۋبليكاسىنىڭ زۇڭتۇڭى لي زايميڭنىڭ ۇسىنىسىنا ساي، مەملەكەت ءتوراعاسى شي جينپيڭ 10 ـ ايدىڭ 30 ـ كۇنىنەن 11 ـ ايدىڭ 1 ـ كۇنىنە دەيىن كورەيانىڭ چيڭجوۋىنا بارىپ، ازيا - تىنىق مۇحيت ەكونوميكالىق سەلبەستىك ۇيىمىنىڭ 32 ـ رەتكى باسشىلار بەيرەسمي ماجىلىسىنە قاتىناسادى ءارى كورەيادا مەملەكەتتىك ساپاردا بولادى. سىرتقى ىستەر مينيسترلىگىنىڭ مالىمدەمەشىسى گو جياكۇن 10 ـ ايدىڭ 24 ـ كۇنى كەزەكتى تىلشىلەر ماجىلىسىندە قاتىستى ورنالاستىرۋلاردى جانە جۇڭگو جاقتىڭ ءۇمىتىن تانىستىردى.

گو جياكۇن مىنالاردى ءبىلدىردى: ازيا - تىنىق مۇحيت ەكونوميكالىق سەلبەستىك ۇيىمى ازيا - تىنىق مۇحيت وڭىرىندەگى ەڭ ماڭىزدى ەكونوميكالىق سەلبەستىك مەحانيزمى. ءتوراعا شي جينپيڭنىڭ بيىلعى ازيا - تىنىق مۇحيت ەكونوميكالىق سەلبەستىك ۇيىمىنىڭ باسشىلار بەيرەسمي ماجىلىسىنە قاتىناسۋى جۇڭگو جاقتىڭ ازيا - تىنىق مۇحيت ءوڭىرىنىڭ ەكونوميكالىق سەلبەستىگىنە ايرىقشا ءمان بەرەتىندىگىن ايگىلەدى. ءتوراعا شي جينپيڭ ماجىلىستە ماڭىزدى ءسوز سويلەيدى ءارى قاتىستى ەلدەردىڭ باسشىلارىمەن ەكى جاقتى كەزدەسەدى. جۇڭگو جاق ءار جاقپەن بىرگە قۇلشىنىپ، ازيا - تىنىق مۇحيت ءوڭىرىنىڭ سەلبەستىگىن ىلگەرىلەتۋگە، ازيا - تىنىق مۇحيت ەكونوميكاسىنىڭ ارتۋىن جەبەۋگە ۇلەس قوسىپ، ازيا - تىنىق مۇحيت تاعدىرلاس ورتاق تۇلعاسىن قول ۇستاسا قۇرۋدى قالايدى.

گو جياكۇن بىلاي دەدى: جۇڭگو مەن كورەيا جاقىن كورشى جانە سەلبەستىك سەرىكتەر. جۇڭگو جاق جۇڭگو - كورەيا قارىم ـ قاتىناسىنا ءمان بەرەدى، كورەياعا باعىتتالعان ساياساتتىڭ ورنىقتىلىعىن جانە ۇدايىلىعىن ساقتايدى، وسى رەتكى ساپار ءتوراعا شي جينپيڭنىڭ اراعا 11 جىل سالىپ كورەيادا تاعى دا مەملەكەتتىك ساپاردا بولۋى ءارى لي زايميڭ زۇڭتۇڭ مىندەتكە وتىرعاننان كەيىن جۇڭگو - كورەيا مەملەكەت باسشىلارىنىڭ تۇڭعىش رەتكى ديدارلاسۋى. جۇڭگو جاق كورەيا جاقپەن بىرگە ديپلوماتيالىق قارىم ـ قاتىناس ورناتۋداعى اۋەلگى ماقساتىنان جازباي، تاتۋ كورشىلەستىككە، دوستىققا، ءوزارا پايدا جەتكىزىپ تەڭ يگىلىككە كەنەلۋگە تاباندى بولىپ، جۇڭگو مەن كورەيانىڭ ستراتەگيالىق سەلبەستىك سەرىكتەستىك قاتىناسىنىڭ ۇزدىكسىز العا دامۋىن ىلگەرىلەتۋدى قالايدى.