جياڭشي ساقشى جاعى ”جارىلىس“ تۋرالى وسەك – اياڭ قۇراستىرىپ، ۇرەي تۋدىرعان ادامدى زاڭ بويىنشا انىقتاپ ءبىر جاقتى ەتتى 

ورتالىق تەلەۆيزيا حابارى: قوعام حاۋىپسىزدىگى مينيسترلىگىنىڭ ينتەرنەت حاۋىپسىزدىگى مەڭگەرمەسىنىڭ مالىمەتىنە قاراعاندا، جۋىردا جياڭشي ولكەسى پيڭشياڭ قالالىق قوعام حاۋىپسىزدىگى ورگانىنىڭ ينتەرنەت حاۋىپسىزدىگى تاراۋلارى قاراستىلىعىنداعى شاڭلي اۋداندىق قوعام حاۋىپسىزدىگى ورگاندارىمەن بىرگە ينتەرنەت تەكشەسىندە وسەك – اياڭ تاراتۋ دەلوسىن انىقتاپ ءبىر جاقتى ەتكەن، زاڭعا قايشى ارەكەت وتكىزگەن چىن XX كە اكىمشىلىك جاقتان قولدا ۇستاي تۇرۋ جازاسىن بەرگەن. بۇل دەلو بارشا توراپتاستارعا قايتالاي ەسكەرتۋ دابىلىن قاقتى: ينتەرنەت كەڭىستىگى زاڭنان تىسقارى جەر ەمەس، جالعان ينفورماتسيالاردى قۇراستىرۋشىلار مەن تاراتۋشىلار سايكەستى زاڭدىق جاۋاپكەرشىلىك ارقالايدى.

كورىلىمگە يە بولۋ ءۇشىن، جان تۇرشىكتىرەرلىك وسەك – اياڭ قۇراستىرعان

جياڭشي ولكەسى پيڭشياڭ قالالىق ينتەرنەت ساقشىلارى جۋىردا قىزمەت بارىسىندا ءبىر توراپتاستىڭ كورىلىمى جوعارى ينتەرنەت تەكشەسىندە ”10 – ايدىڭ 6 – كۇنى جياڭشيدەگى شاڭلي اۋدانىندا جارىلىس تۋىلدى، جارالانعاندار مەن قازا بولعاندار بەلگىسىز“ دەگەن مازمۇنداعى ماقالانى جاريالاعانىن ءارى اتالمىش ءىس تۋىلعان جەردەگى ءبىر پارشا سۋرەتتى قوسىپ جولداعانىن بايقاعان. ساقشى جاقتىڭ تەكسەرىپ تۇراقتاندىرۋىنشا، جۋىردا شاڭلي اۋدانىندا بۇل حاباردا ايتىلعانداي ءىس تۋىلماعان، بۇل اقپارات بۇكىلدەي ويدان قۇراستىرىلعان ينتەرنەتتىك وسەك – اياڭ سانالادى. اتالعان حابار جاريالانعان سوڭ، كوپتەگەن توراپتاستار دەرەۋ نازار اۋدارىپ، حاباردى جوتكەگەن، بەلگىلى كولەم ىشىندە تۇرعىنداردى ۇرەيلەندىرىپ، قوعامدىق الەۋمەتتىك ءتارتىپتى اۋىر دارەجەدە بىلىقتىرعان. پيڭشياڭ قالالىق ينتەرنەت حاۋىپسىزدىگى تاراۋلارى دەرەۋ قاراستىلىعىنداعى جەردەگىلەرمەن بىرگە ارەكەتتەنىپ، بۇل حاباردى جاريالاعان چىن XX تى قوعام حاۋىپسىزدىگى ورگاندارىنا شاقىرىپ، بۇل ىسكە تەكسەرۋ جۇرگىزگەن. ساقشى جاقتىڭ تەرگەۋى مەن بۇلتارتپاس فاكت الدىندا چىن XX ءوزىنىڭ زاڭعا قايشى ارەكەتىن تۇگەل مويىنداپ، ءوزىنىڭ ”كورىلىم جيناۋ ءۇشىن“ ينتەرنەتتە وسەك – اياڭ جاريالاعانىن مويىنداعان.

وسەك – اياڭ تاراتۋشىلار زاڭ بويىنشا قاتاڭ جازالانادى

«جۇڭحۋا حالىق رەسپۋبليكاسىنىڭ اماندىق باسقارۋعا قايشىلىق جاساعانداردى جازالاۋ زاڭىنىڭ» 25 – تارماعىنىڭ ءبىرىنشى تارماقشاسىندا مىناداي بەلگىلەنگەن: وسەك – اياڭ تاراتقاندارعا، قاتەرلى جاعداي، ىندەت جاعدايى، ساقتانۋعا ءتيىستى جاعداي تۋرالى وتىرىك مالىمەت بەرگەندەرگە نەمەسە باسقا تاسىلدەر ارقىلى الەۋمەتتىك ءتارتىپتى قاساقانا بۇلدىرگەندەرگە بەس كۇننەن جوعارى ون كۇننەن تومەن قولدا ۇستاي تۇرۋ جازاسى بەرىلەدى، سونىمەن قوسا، بەس ءجۇز يۋاننان تومەن اقشالاي ايىپ سالۋعا بولادى؛ قىلمىسى ءبىرشاما جەڭىل بولعان جاعدايدا، بەس كۇننەن تومەن قولدا ۇستاي تۇرۋ جازاسىن بەرۋگە نەمەسە بەس ءجۇز يۋاننان تومەن اقشالاي ايىپ سالۋعا بولادى.

چىن XX تىڭ ارەكەتى ”وسەك – اياڭ تاراتىپ، الەۋمەتتىك ءتارتىپتى قاساقانا بۇلدىرۋگە“ جاتادى، قوعام حاۋىپسىزدىگى ورگاندارى وعان اكىمىشىلىك جاقتان 10 كۇن قولدا ۇستاي تۇرۋ جازاسىن بەرگەن.

ينتەرنەت ساقشىلارىنىڭ ۇندەۋى

بارشا توراپتاستار زاڭنىڭ شەگىنەن اسپاۋى، وسەك – اياڭ قۇراستىرماۋى، وسەك – اياڭعا سەنبەۋى، وسەك – اياڭ تاراتپاۋى كەرەك. انىق – قانىعىنا كوز جەتكىزبەگەن اقپاراتتاردى كورگەندە بايىپتى بولعان، جان – جاقتىلى سۇراستىرعان ءجون، بەلسەندىلىكپەن ”وسەك – اياڭعا تويتارىس بەرۋشى“ بولىپ، وسەك – اياڭدى بايقاعان كەزدە دەر كەزىندە ينتەرنەت تەكشەلەرىنە نەمەسە قوعام حاۋىپسىزدىگى ورگاندارىنا مالىمدەۋ قاجەت. ينتەرنەت كەڭىستىگىنىڭ پاكتىگى ءاربىر توراپتاستىڭ بىرگە قورعاۋىن قاجەت ەتەدى، بارلىعىمىز وزىمىزدەن باستاپ ىسكە كىرىسىپ، ءوزىمىزدىڭ ينتەرنەتتەگى ءسوز – ارەكەتىمىزدى جۇيەگە ءتۇسىرىپ، ينتەرنەتتەگى جاۋاپكەرشىلىكتى ازاماتتاردان بولىپ، ستيلى دۇرىس ينتەرنەت ورتاسىن جاراتۋعا تىزە قوسا ارەكەتتەنەيىك.

كەلۋ قاينارى: حالىق تورابى