جۇڭگو جاق فرانسيا قاتارلى مەملەكەتتەردىڭ ازاماتتارىنان ۆيزا تالاپ ەتپەۋ ساياساتىنىڭ ۋاقىتىن ۇزارتپاقشى ءارى شۆەتسيا ازاماتتارىنان ۆيزا تالاپ ەتپەۋ ساياساتىن اتقارماقشى 

شينحۋا اگەنتتىگىنىڭ ءتىلشىسى ما جويان، فىڭ شينران 11 – ايدىڭ 3 – كۇنى بەيجيڭنەن حابارلايدى. سىرتقى ىستەر مينيسترلىگىنىڭ مالىمدەمەشىسى ماۋ نيڭنىڭ 11 – ايدىڭ 3 – كۇنى كەزەكتى تىلشىلەردى قابىلداۋ ماجىلىسىندە ايتۋىنشا، پارتيا 20 – كەزەكتى ورتالىق كوميتەتى ءتورتىنشى جالپى ءماجىلىسىنىڭ رۋحىن دايەكتى تياناقتاندىرۋ، جوعارى ساپالى ەسىك اشۋدىڭ ءورىسىن كەڭەيتۋ، جۇڭگولىقتار مەن شەتەلدىكتەردىڭ بارىس – كەلىسىنە ۇزدىكسىز قولايلىلىق جاساۋ ءۇشىن، جۇڭگو جاق فرانسيا قاتارلى مەملەكەتتەردىڭ ازاماتتارىنا باعىتتالعان ۆيزا تالاپ ەتپەۋ ساياساتىنىڭ ۋاقىتىن 2026 – جىلى 12 – ايدىڭ 31 – كۇنىنە دەيىن ۇزارتادى. مۇنان سىرت، جۇڭگو جاق 2025 – جىلى 11 – ايدىڭ 10 – كۇنىنەن 2026 – جىلى 12 – ايدىڭ 31 – كۇنىنە دەيىن شۆەتسيا ازاماتتارىنان ۆيزا تالاپ ەتپەۋ ساياساتىن اتقارادى.

سىرتقى ىستەر مينيسترلىگى كونسۋلدىق ىستەر مەڭگەرمەسى سول كۇنى ۇقتىرۋ جاريالاپ، اتالعان مەملەكەتتەردىڭ جاي پاسپورتى بار ازاماتتارى جۇڭگوعا كەلىپ ساۋدا ىستەگەندە، ساياحاتتاعاندا، تۋىسشىلاعاندا، اۋىس – كۇيىس جاساعاندا، شەكارا ارقىلى وتكەندە ايالداعان ۋاقىتى 30 كۇننەن اسىپ كەتپەيتىن بولسا، شەكارادان ۆيزاسىز كىرۋىنە بولادى. ۆيزاسىز ءوتۋ شارتىنا تولمايتىندار شەكارادان كىرگەندە ءالى دە جۇڭگوعا كەلۋ ۆيزاسىن ءبىتىرىپ كەلۋى كەرەك.

جۇڭگونىڭ ۆيزا تالاپ ەتپەۋ ساياساتىنىڭ ۋاقىتى ۇزارتىلعان مەملەكەتتەر مىنالار: فرانسيا، گەرمانيا، يتاليا، گوللانديا، يسپانيا، شۆەتساريا، يرلانديا، ۆەنگريا، اۆستريا، بەلگيا، ليۋكسەمبۋرگ، اۆستراليا، جاڭا زەللانديا، پولشا، پورتۋگاليا، گرەتسيا، سيپرۋس، سلوۆەنيا، سلوۆاكيا، نورۆەگيا، فينلانديا، دانيا، يسلانديا، موناكو، ليحتەنشتەين، اندورا، كورەيا، بۋلگاريا، رۋمينيا، حورۆاتيا، مونتەنەگرو، سولتۇستىك ماكەدونيا، مالتا، ەستونيا، لاتوۆيا، جاپونيا، برازيليا، ارگەنتينا، چيلي، پەرۋ، ۋرۋگۆاي، ساۋد ارابياسى، ومان، كۆەيت، باحرەين.

كەلۋ قاينارى: حالىق تورابى