لي چياڭ گرۋزيانىڭ زۇڭليى كوباشيزەمەن، سەربيانىڭ زۇڭليى ماچۋتپەن، نيگەريا قاۋىم پالاتاسىنىڭ باستىعى تاجەدينمەن جەكە - جەكە كەزدەستى

«حالىق گازەتى»، 11 - ايدىڭ 4 - كۇنى، شاڭحاي (تىلشىلەر ليۋ ليڭليڭ، باي زى - ۋەي). 11 - ايدىڭ 4 - كۇنى تۇستەن كەيىن مەملەكەتتىك كەڭەستىڭ زۇڭليى لي چياڭ شاڭحايدا 8 - كەزەكتى جۇڭگو حالىقارالىق يمپورت كورمەسىنە قاتىناسۋ ءۇشىن جۇڭگوعا كەلگەن گرۋزيانىڭ زۇڭليى كوباشيزەمەن كەزدەستى.

لي چياڭ مىنالاردى ءبىلدىردى: جۇڭگو مەن گرۋزيا ديپلوماتيالىق قارىم - قاتىناس ورناتقان 33 جىلدان بەرى باستان - اياق ءوزارا قۇرمەت ەتىپ، ءوزارا ءتۇسىنىپ، ءبىر - ءبىرىنىڭ وزەكتى مۇددەسى مەن كوڭىل ءبولىپ وتىرعان كەلەلى ماسەلەلەرىن باتىل قولدادى. 2023 - جىلى ەكى ەل ستراتەگيالىق سەرىكتەستىك قارىم - قاتىناس ورناتقاننان بەرى ءار سالاداعى سەلبەستىك جەدەل ىلگەرىلەپ، كوپتەگەن تىڭ تابىسقا قول جەتىپ، ەكى ەل حالقى شىنايى يگىلىككە كەنەلدى. جۇڭگو گرۋزيامەن باستان - اياق شىنايى دوس، جاقسى سەرىك بولىپ، ءوزارا قولداۋ سىندى تاڭداۋلى ءداستۇردى ساۋلەلەندىرىپ، ستراتەگيالىق قارىم - قاتىناستى كۇشەيتىپ، ناقتى سەلبەستىكتى كەڭەيتىپ، وسىزامانداندىرۋ قۇرىلىسىن بىرگە ىلگەرىلەتىپ، ەكى ەل حالقىنا ءتىپتى دە زور باقىت جاراتۋدى قالايدى.

لي چياڭ بىلاي دەپ اتاپ كورسەتتى: جۇڭگو مەن گرۋزيانىڭ ەكونوميكالىق جاقتاعى ءوزارا تولىقتاۋ سيپاتى كۇشتى، جۇڭگو جاق گرۋزيا جاقپەن دامۋ ستراتەگياسىن ۇشتاستىرۋدى اناعۇرلىم كۇشەيتىپ، ”ءبىر بەلدەۋ، ءبىر جولدى“ جوعارى ساپامەن بىرگە قۇرۋ سەلبەستىگىن جەتەكشى ەتىپ، ەكى ەلدىڭ ۇكىمەتتەر ارا ەكونوميكا - ساۋدا سەلبەستىك كوميتەتىنىڭ رولىن اناعۇرلىم ويداعىداي ساۋلەلەندىرىپ، ەكى جاقتىڭ اناعۇرلىم كوپ مۇددە توعىسۋ تۇيىندەرىن اشىپ، جۇڭگو - گرۋزيا سەلبەستىگىنىڭ ساپاسىن ۇزدىكسىز جوعارىلاتىپ، ونىمدىلىگىن ارتتىرۋدى ىلگەرىلەتۋدى قالايدى. ەكى جاق ەكى جاقتى ەركىن ساۋدا كەلىسىمىنىڭ دارەجەسىن جوعارىلاتۋ كەلىسسوزىن ماندىك اياقتاتۋدى وراي ەتىپ، ساۋدا، قارجى قوسۋ، ۇلاستىرۋ - تۇتاستىرۋ سياقتى سەلبەستىكتى تەرەڭدەتىپ، سيفرلى ەكونوميكا، جاڭا ەنەرگيا، جاساندى زەردە سياقتى جاڭادان گۇلدەنگەن كاسىپ سالاسى سەلبەستىگىن كەڭەيتۋى كەرەك، گرۋزيا جاقتىڭ جۇڭگو كاسىپورىندارىنا ۇزدىكسىز تاماشا ساۋدا ورتاسىن ازىرلەۋىن ءۇمىت ەتەمىن. جۇڭگو جاق تا گرۋزيا جاقپەن ساياحات، وقۋ - اعارتۋ، عىلىم - تەحنيكا، مادەنيەت، جاستار سياقتى سالالارداعى اۋىس - كۇيىستى كۇشەيتىپ، ەكى جاقتى ءتىپتى دە كوپ ولكە، وبلىس، قالالاردى جاقسى قارىم - قاتىناس جاساۋعا شابىتتاندىرىپ، ەكى ەل حالقىنىڭ ءتىپتى دە ءتۇسىنىسۋىن، ەتەنە بولۋىن جەبەۋدى قالايدى. جۇڭگو مەن گرۋزيا − دۇنيە جۇزىندەگى وڭتۇستىك ەلدەرى، كوپ جاقتى قارىم - قاتىناستى، سايكەسۋدى كۇشەيتىپ، ءتوراعا شي جينپيڭ العا قويعان 4 ۇلكەن دۇنيە جۇزىلىك باستامانى تياناقتاندىرىپ، قالىڭ وركەندەپ كەلە جاتقان ەلدەرمەن بىرگە كوپ جاقتىلىق پەن ەركىن ساۋداعا تاباندى بولىپ، دۇنيە جۇزىلىك ەكونوميكا - ساۋدا ءتارتىبى مەن حالىقارالىق ادىلدىكتى، ادىلەتتىلىكتى قورعاۋى كەرەك.

كوباشيزە مىنالاردى ءبىلدىردى: جۇڭگو − گرۋزيانىڭ ستراتەگيالىق سەرىگى، گرۋزيا - جۇڭگو قارىم - قاتىناسى ءوزارا قۇرمەت ەتۋ، ءوزارا سەنىم ارتۋ نەگىزىندە ۇزدىكسىز دامىپ، حالىقتىڭ دوستىعى كۇن سايىن تەرەڭدەدى. گرۋزيا جاق ءبىر جۇڭگو پرينسيبىنە تاباندى بولادى، جۇڭگو جاقپەن ءار جىكتەگىلەردىڭ بارىس - كەلىسىن جيىلەتىپ، ”ءبىر بەلدەۋ، ءبىر جولدى“ بىرگە قۇرۋ باستاماسى جۇلگەسىندە ەكى جاقتى ەركىن ساۋدا كەلىسىمىنىڭ رولىن ويداعىداي ساۋلەلەندىرىپ، ساۋدا، قارجى قوسۋ، ۇلاستىرۋ - تۇتاستىرۋ، وقۋ - اعارتۋ، ساياحات سياقتى سالالارداعى سەلبەستىكتى اناعۇرلىم كەڭەيتىپ، ادامداردىڭ بارىس - كەلىسىن جەبەۋدى قالايدى. قازىرگى حالىقارالىق جاعدايدا جۇڭگو دۇنيە ءجۇزىنىڭ بەيبىتشىلىگىن، ادىلدىگىن، تۋراشىلدىعىن قورعايتىن جاۋاپكەرشىلىك ارقالايتىن ءىرى ەلدىك رولىن ساۋلەلەندىرىپ، اۋمالى - توكپەلى دۇنيە جۇزىنە باعالى ورنىقتىلىق ۇستەدى. گرۋزيا جاق ءتوراعا شي جينپيڭ العا قويعان 4 ءىرى دۇنيە جۇزىلىك باستامانى قولدايدى، جۇڭگو جاقپەن كوپ جاقتى سەلبەستىكتى كۇشەيتىپ، دۇنيە ءجۇزىنىڭ بەيبىتشىلىگىن، ورنىقتىلىعىن، دامۋىن بىرگە جەبەۋدى قالايدى.

كەزدەسۋدەن كەيىن ەكى ەل زۇڭليلەرى ساۋدا، جاساندى زەردە، اۋىل شارۋاشىلىعى، قورشاعان ورتانى قورعاۋ، تەكسەرۋ - كارەنتيندەۋ، مادەنيەت، اۆياتسيا سياقتى كوپ ءتۇرلى ەكى جاقتى سەلبەستىك قۇجاتتارىنا قول قويۋعا بىرگە كۋا بولدى.

چىن جينيڭ، ۋ جىڭلۇڭ جوعارىداعى قيمىلدارعا قاتىناستى.

«حالىق گازەتى»، 11 - ايدىڭ 4 - كۇنى، شاڭحاي (تىلشىلەر يۋە لينۋەي، شيڭ شۋە). 11 - ايدىڭ 4 - كۇنى تۇستەن كەيىن مەملەكەتتىك كەڭەستىڭ زۇڭليى لي چياڭ شاڭحايدا 8 - كەزەكتى جۇڭگو حالىقارالىق يمپورت كورمەسىنە قاتىناسۋ ءۇشىن جۇڭگوعا كەلگەن سەربيانىڭ زۇڭليى ماچۋتپەن كەزدەستى.

لي چياڭ مىنالاردى ءبىلدىردى: ەكى ەل مەملەكەت باسشىلارىنىڭ ستراتەگيالىق جەتەكشىلىگىندە، جۇڭگو - سەربيا قارىم - قاتىناسى ورنىقتى دامۋ جاعدايىن ساقتاپ، ءار سالاداعى ءوزارا ءتيىمدى سەلبەستىك جەدەل ىلگەرىلەتىلدى. بيىل جىل باسىنان بەرى ءتوراعا شي جينپيڭ ۆۋچيچ زۇڭتۇڭمەن ەكى رەت ديدارلاسىپ، ءبىرقىدىرۋ كەلەلى ماسەلە جونىندە كەڭ كولەمدى ورتاق تانىمعا كەلىپ، جاڭا داۋىردەگى جۇڭگو - سەربيا تاعدىرلاس ورتاق تۇلعاسى قۇرىلىسىنا اناعۇرلىم ايقىن باعدار كورسەتتى. جۇڭگو جاق سەربيا جاقپەن ءوزارا قۇرمەت ەتۋ، ءوزارا سەنىم ارتۋ رۋحىن ۇستانىپ، ءبىر - ءبىرىنىڭ وزەكتى مۇددەسى مەن ءجىتى قاداعالاپ وتىرعان كەلەلى ىستەرىن باتىل قولداپ، ەكى جاقتى قارىم - قاتىناستىڭ مازمۇنىن ۇزدىكسىز بايىتىپ، ەكى ەل سەلبەستىگىنىڭ تەرەڭدەۋىن، ناقتىلانۋىن ىلگەرىلەتىپ، جۇڭگو - سەربيا حالقىنا ءتىپتى دە كوپ باقىت جاراتۋدى قالايدى.

لي چياڭ بىلاي دەپ اتاپ كورسەتتى: جۇڭگو كوممۋنيستىك پارتياسى 20 - كەزەكتى ورتالىق كوميتەتىنىڭ ءتورتىنشى جالپى ءماجىلىسى ”15 - بەسجىلدىق“ جوبا ۇسىنىسىن قاراپ ماقۇلداپ، بۇدان بىلايعى 5 جىلداعى، ءتىپتى ونان دا ۇزاق مەزگىلدەگى جۇڭگونىڭ دامۋىنا ستراتەگيالىق جوبا جاسادى. جۇڭگو جاق ”سەربيا 2035“ دامۋ جوباسىمەن ۇشتاسۋدى كۇشەيتىپ، سەربيا جاقپەن ەكى جاقتى ەركىن ساۋدا كەلىسىمىنەن تولىق، ويداعىداي پايدالانىپ، ەكى ەل ۇكىمەتتەرى اراسىنداعى ەكونوميكا - ساۋدا ارالاس كوميتەتى مەحانيزمىنىڭ رولىن اناعۇرلىم ويداعىداي ساۋلەلەندىرىپ، ”ءبىر بەلدەۋ، ءبىر جولدى“ جوعارى ساپامەن بىرگە قۇرۋ جۇلگەسىندە ۆەنگريا - سەربيا تەمىر جولى سياقتى ءتۇيىندى نىسانداردى ىلگەرىلەتىپ، عىلىم - تەحنيكادا جاڭالىق اشۋ، جاسىل ەكونوميكا، بيولوگيالىق ءدارى - دارمەك، جاساندى زەردە سياقتى سالالارداعى سەلبەستىكتىڭ كومەسكى كۇشىن ىشكەرىلەي اشىپ، ەكونوميكا - ساۋدا سەلبەستىگىنىڭ كولەمىن ۇزدىكسىز كەڭەيتىپ، ونىمدىلىگىن ارتتىرۋدى ىلگەرىلەتۋدى قالايدى. ەكى جاق مادەنيەت، ساياحات، وقۋ - اعارتۋ، دەنە تاربيە سياقتى گۋمانيتارلىق اۋىس - كۇيىستى اناعۇرلىم كۇشەيتىپ، جۇڭگو - سەربيا دوستىعىنىڭ جۇرت جۇرەگىنە اناعۇرلىم تەرەڭ ۇيالاۋىن ىلگەرىلەتۋى كەرەك. جۇڭگو جاق سەربيا جاقپەن بىرلەسكەن مەملەكەتتەر ۇيىمى سياقتى تۇعىرلاردا تىعىز سايكەسىپ، ءار جاقتىڭ 4 ۇلكەن دۇنيە جۇزىلىك باستامانى بەلسەنە تياناقتاندىرۋىن ىلگەرىلەتىپ، ناعىز كوپ جاقتىلىقتى امالياتتا ايگىلەپ، دۇنيە جۇزىلىك جونگە سالۋدى كۇشەيتىپ جانە كەمەلدەندىرىپ، ادامزاتتىڭ تاعدىرلاس ورتاق تۇلعاسىن اناعۇرلىم ويداعىداي قۇرۋدى قالايدى.

ماچۋت مىنالاردى ءبىلدىردى: سەربيا مەن جۇڭگونىڭ ءداستۇرلى دوستىعى تەرەڭ، ەكى ەل قارىم - قاتىناسى تاياۋ جىلداردان بەرى قارىشتاپ دامىدى. ءتوراعا شي جينپيڭ مەن ۆۋچيچ زۇڭتۇڭ ءساتتى تۇردە ءوزارا ساپاردا بولىپ، سەربيا - جۇڭگو قارىم - قاتىناسىنىڭ تاريحي تىڭ دەڭگەيگە كوتەرىلۋىنە جەتەكشىلىك ەتتى. سەربيا ۇكىمەتى ءبىر جۇڭگو پرينسيبىنە تاباندى بولىپ، جۇڭگونىڭ وزەكتى مۇددەنى قورعاۋ ماسەلەسىندەگى ورىندى تۇرعىسىن باتىل قولدايدى. سەربيا جاق جۇڭگو جاقتىڭ سەربيانىڭ ەكونوميكالىق، قوعامدىق دامۋىنا كورسەتكەن قاستەرلى قولداۋىنا شىن جۇرەكتەن العىس ايتادى، جۇڭگو جاقپەن جوعارى جىكتەگىلەردىڭ بارىس - كەلىسىن جيىلەتىپ، ەكونوميكا - ساۋدا، قارجى قوسۋ، مانەرلەۋ كاسىبى، عىلىم - تەحنيكا، جاساندى زەردە، ساياحات سياقتى سالالارداعى سەلبەستىكتى تەرەڭدەتىپ، ەكى ەل حالقى اراسىنداعى دوستىقتى كۇشەيتۋدى ءۇمىت ەتەدى. جۇڭگو ەكونوميكاسىنىڭ ارتۋى دۇنيە ءجۇزىنىڭ باياندى دامۋىنا پارمەندى قوزعاۋشى كۇش قوستى، جۇڭگونىڭ ”15 - بەسجىلدىق“ جوباسىنىڭ سەربيا سياقتى ەلدەردىڭ جۇڭگومەن سەلبەستىگىنە تىڭ وراي اكەلەتىندىگىنە سەنەمىن. سەربيا جاق ءتوراعا شي جينپيڭ العا قويعان ادامزاتتىڭ تاعدىرلاس ورتاق تۇلعاسىن قۇرۋ ۇستانىمىن جانە 4 ءىرى دۇنيە جۇزىلىك باستامانى باتىل قولدايدى، جۇڭگو جاقپەن كوپ جاقتى ورىنداردا سەلبەستىكتى كۇشەيتىپ، بىرگە دامىپ، گۇلدەنۋدى جەبەۋدى قالايدى.

چىن جينيڭ، ۋ جىڭلۇڭ كەزدەسۋدە بىرگە بولدى.

«حالىق گازەتى»، 11 - ايدىڭ 4 - كۇنى، شاڭحاي (تىلشىلەر حان شو، ۋاڭ حۇي). 11 - ايدىڭ 4 - كۇنى تۇستەن كەيىن مەملەكەتتىك كەڭەستىڭ زۇڭليى لي چياڭ شاڭحايدا 8 - كەزەكتى جۇڭگو حالىقارالىق يمپورت كورمەسىنە قاتىناسۋ ءۇشىن جۇڭگوعا كەلگەن نيگەريا قاۋىم پالاتاسىنىڭ باستىعى تاجەدينمەن كەزدەستى.

لي چياڭ مىنالاردى ءبىلدىردى: جۇڭگو مەن نيگەريا − تەرەڭ ءداستۇرلى دوستىققا يە جاقسى باۋىرلاس، جاقسى سەرىك. تاياۋ جىلداردان بەرى ەكى جاقتىڭ بىرگە قۇلشىنۋىندا، جۇڭگو - نيگەريا قارىم - قاتىناسىنىڭ دامۋى ”جەدەل ارناعا“ ءتۇستى. بىلتىر 9 - ايدا ءتوراعا شي جينپيڭ تينۋب زۇڭتۇڭمەن بەيجيڭدە كەڭەس وتكىزىپ، ەكى ەل قارىم - قاتىناسىنىڭ جالپى بەتتىك ستراتەگيالىق سەرىكتەستىك قارىم - قاتىناستىڭ جاڭا كەزەڭىنە قادام تاستاۋىن ىلگەرىلەتتى. جۇڭگو جاق نيگەريا جاقپەن وسىزامانداندىرۋدى ىلگەرىلەتۋ جولىندا ۇزدىكسىز قول ۇستاسا العا باسىپ، دامۋ ستراتەگياسىن ۇشتاستىرۋدى كۇشەيتىپ، جان - جاقتى سەلبەستىكتى كەڭەيتىپ، اناعۇرلىم كوپ ءىس جۇزىندىك جەتىستىكتەرگە قول جەتكىزىپ، ەكى ەلدىڭ ەكونوميكالىق، قوعامدىق قۇرىلىسىنا اناعۇرلىم ويداعىداي قىزمەت ەتۋدى قالايدى.

لي چياڭ بىلاي دەپ اتاپ كورسەتتى: جۇڭگو مەن نيگەريا ەكەۋى دە وركەندەپ كەلە جاتقان ەلدەر، حالىق سانى كوپ، دامۋ كومەسكى كۇشى زور، ەكى ەلدىڭ ەكونوميكالىق قۇرىلىمى ءبىرشاما كۇشتى ءوزارا تولىقتاۋ سيپاتىنا يە، سەلبەستىك دانەكەرىن ونان ارى بەكەمدەۋ ارقىلى اناعۇرلىم زور دامۋ بىرىككەن كۇشىن ۇيىستىرۋعا بولادى. جۇڭگو جاق نيگەريا جاقپەن جۇڭگو مەن افريكانىڭ ”10 ءىرى سەرىكتەستىك ارەكەتىن“ بەلسەنە تياناقتاندىرىپ، ”ءبىر بەلدەۋ، ءبىر جولدى“ جوعارى ساپامەن بىرگە قۇرىپ، بىرگە داميتىن ەكونوميكالىق سەرىكتەستىك قارىم - قاتىناس كەلىسىمىنە قول قويۋ ارقىلى نولدىك كەدەن باجىسى شارالارىنىڭ نيگەريادا ەرتەرەك تياناقتانۋىن ىلگەرىلەتىپ، ەكى ەلدىڭ ساۋدا، قارجى قوسۋ، اۋىل شارۋاشىلىعى، كەن كاسىبى، نەگىزگى قۇرىلىس، حالىق تۇرمىسى سياقتى سالالارداعى سەلبەستىك دەڭگەيىن جوعارىلاتىپ، تازا ەنەرگيا، ەلەكترلى ۆەلەسيپەد، جاساندى زەردە، بيولوگيالىق عىلىم - تەحنيكا سياقتى جاڭادان گۇلدەنگەن كاسىپ سالاسى سەلبەستىگىن كەڭەيتۋدى قالايدى. جۇڭگو جاق نيگەريانىڭ حالىقارالىق جانە وڭىرلىك ىستەردە اناعۇرلىم زور رول اتقارۋىن قولدايدى، نيگەريا جاقپەن بريكس ەلدەرى، بىرلەسكەن مەملەكەتتەر ۇيىمى، دۇنيە جۇزىلىك ساۋدا ۇيىمى سياقتى كوپ جاقتى مەحانيزمدە سايكەسۋدى، سەلبەسۋدى كۇشەيتىپ، دۇنيە ءجۇزىنىڭ وڭتۇستىگى مەن سولتۇستىگىنىڭ بىرلەسىپ ءوزىن الۋەتتەندىرۋىن ىلگەرىلەتىپ، دۇنيە ءجۇزىنىڭ كوپ ۇيەكتەنۋى مەن ەكونوميكانىڭ جاھاندانۋىن بىرگە ىلگەرىلەتىپ، اناعۇرلىم ءادىل، ۇيلەسىمدى دۇنيە جۇزىلىك جونگە سالۋ جۇيەسىن ورناتۋدى قالايدى.

تاجەدين مىنالاردى ءبىلدىردى: قازىر دۇنيە ءجۇزىنىڭ ورنىقسىزدىعى، تۇراقسىزدىعى جوعارىلاعان جاعدايدا، جۇڭگو يمپورت كورمەسىن ءۇرتىس وتكىزىپ، جۇڭگونىڭ دۇنيە جۇزىمەن دامۋ ورايىنان بىرگە يگىلىكتەنۋگە، بىرگە دامۋدى جەبەۋگە كۇش سالاتىندىعىن ايگىلەدى. نيگەريا مەن جۇڭگو وركەندەپ كەلە جاتقان ەلدەر، ديپلوماتيالىق قارىم - قاتىناس ورناتقاننان بەرى باستان - اياق ءبىرىن - ءبىرى قۇرمەتتەپ، ءبىرىن - ءبىرى قولداپ، ەكى ەل قارىم - قاتىناسىنىڭ دامۋ بەتالىسى تەبىندى بولدى. نيگەريا جاق ءبىر جۇڭگو پرينسيبىنە تاباندى بولادى، جۇڭگونىڭ مەملەكەتتىڭ يەلىك ۇقىعى مەن تەرريتوريا تۇتاستىعىن قورعاۋ قۇلشىنىسىن باتىل قولدايدى، جۇڭگو جاقپەن ەل باسقارۋ تاجىريبەلەرىن اۋىستىرۋدى كۇشەيتىپ، ەكونوميكا - ساۋدا، نەگىزگى قۇرىلىس، ەنەرگيا سياقتى سالالارداعى ءوزارا ءتيىمدى سەلبەستىكتى كەڭەيتىپ، گۋمانيتارلىق اۋىس - كۇيىستى جيىلەتۋدى قالايدى. نيگەريا پارلامەنتى نيگەريا مەن جۇڭگونىڭ ءار سالاداعى سەلبەستىگىن پارمەندى قولداپ جانە قامتاماسىز ەتىپ، نيگەريا مەن جۇڭگونىڭ جالپى بەتتىك ستراتەگيالىق سەرىكتەستىك قارىم - قاتىناسىنىڭ اناعۇرلىم جوعارى دەڭگەيگە ۇزدىكسىز قادام تاستاۋىن ىلگەرىلەتۋدى قالايدى.

چىن جينيڭ، ۋ جىڭلۇڭ كەزدەسۋدە بىرگە بولدى.

كەلۋ قاينارى: حالىق تورابى