شي جينپيڭ تەلەگرامما جولداپ كاستتىڭ چيليدىڭ زۇڭتۇڭى بولىپ سايلانعاندىعىن قۇتتىقتادى

شينحۋا اگەنتتىگى، 12 - ايدىڭ 22 - كۇنى، بەيجيڭ. 12 - ايدىڭ 22 - كۇنى مەملەكەت ءتوراعاسى شي جينپيڭ كاستكە تەلەگرامما جولداپ، ونىڭ چيلي رەسپۋبليكاسىنىڭ زۇڭتۇڭى بولىپ سايلانعاندىعىن قۇتتىقتادى.

شي جينپيڭ بىلاي دەپ اتاپ كورسەتتى: چيلي _ جاڭا جۇڭگومەن تۇڭعىش ديپلوماتيالىق قارىم - قاتىناس ورناتقان وڭتۇستىك امەريكا مەملەكەتى، ەكى ەل باستان - اياق ءوزارا قۇرمەت ەتۋگە، تەڭ تۇرعىدا مامىلە جاساۋعا، ءوزارا پايدا جەتكىزىپ، تەڭ يگىلىككە كەنەلۋگە تاباندى بولىپ، ءبىر - ءبىرىنىڭ وزەكتى مۇددەسىنە جانە ءجىتى قاداعالاپ وتىرعان كەلەلى ىستەرىنە ساياتىن ماسەلەلەردە ءوزارا ءتۇسىنىسىپ جانە قولداۋ كورسەتىپ، ءار سالاداعى ناقتى سەلبەستىكتە سۇبەلى تابىستارعا قول جەتكىزىپ، ەكى ەل حالقىنا ناقتى قۇت - ىرىس اكەلدى. جۇڭگو - چيلي قارىم - قاتىناسى ۇزاق ۋاقىتتان بەرى جۇڭگونىڭ لاتىن امەريكاسىنداعى ەلدەرمەن قارىم - قاتىناسىنىڭ الدىڭعى لەگىندە ءجۇرىپ كەلەدى، جۇڭگو - چيلي قارىم - قاتىناسىنىڭ دامۋىن ۇزدىكسىز ىلگەرىلەتۋ _ ەكى ەل قوعامىنداعى ءار سالانىڭ جالپىلىق ورتاق تانىمى. مەن جۇڭگو - چيلي قارىم - قاتىناسىنىڭ دامۋىنا ايرىقشا ءمان بەرەمىن، سايلانعان زۇڭتۇڭ كاستپەن بىرگە قۇلشىنىپ، ءداستۇرلى دوستىقتى جالعاستىرىپ، جۇڭگو مەن چيليدىڭ جان - جاقتى ستراتەگيالىق سەرىكتەستىك قارىم - قاتىناسىنىڭ ۇزدىكسىز تىڭ ساتىعا كوتەرىلۋىن ىلگەرىلەتىپ، ەكى ەل حالقىن اناعۇرلىم ويداعىداي يگىلىككە كەنەلتۋدى قالايمىن.