ەلىمىز بويىنشا جۇقپالى تۇماۋ ۆيرۋسىن تەكسەرۋ ناتيجەسىنىڭ بولىمدىلىق مولشەرى تومەندەدى

شينحۋا اگەنتتىگىنىڭ ءتىلشىسى شۇي پىڭحاڭ 12 – ايدىڭ 18 – كۇنى بەيجيڭنەن حابارلايدى. جۇڭگو اۋرۋدىڭ الدىن الۋ جانە ونى تىزگىندەۋ ورتالىعىنىڭ ەڭ جاڭا باقىلاۋ ساندى مالىمەتىنە قاراعاندا، 2025 – جىلدىڭ 50 – اپتاسىندا (2025 – جىلى 12 – ايدىڭ 8 – كۇنىنەن 12 – ايدىڭ 14 – كۇنىنە دەيىن) سولتۇستىكتەگى ولكەلەردە جۇقپالى تۇماۋ ۆيرۋسىن تەكسەرۋ ناتيجەسىنىڭ بولىمدىلىق مولشەرى الدىڭعى اپتاداعى تومەندەۋ بەتالىسىن جالعاستى ساقتاعان، وڭتۇستىكتەگى ءبىر ءبولىم ولكەلەردە دە جۇقپالى تۇماۋ ۆيرۋسىن تەكسەرۋ ناتيجەسىنىڭ بولىمدىلىق مولشەرى تومەندەگەن.

جۇڭگو اۋرۋدىڭ الدىن الۋ جانە ونى تىزگىندەۋ ورتالىعى ۆيرۋستان تۋىنداعان اۋرۋلار بولىمشەسىنىڭ زەرتتەرمەنى ۋاڭ دايان: ”بۇل ەلىمىز بويىنشا جۇقپالى تۇماۋدىڭ جالپى جاقتان ادەتتە ايتىلاتىن ’بۇرىلىس‘ كەزەڭىنە جەتكەنىن كورسەتەدى، الايدا جۇقپالى تۇماۋ ءجيى تۋىلاتىن مەرزىم ءوتىپ كەتكەنىنەن دەرەك بەرمەيدى، ونىڭ ۇستىنە، ءارقايسى ولكەلەردە ەڭ جوعارى كەزەڭگە جەتەتىن ۋاقىتى دا دەرلىكتەي ۇقسامايدى“ دەيدى.

ونىڭ ايتۋىنشا، ەڭ جوعارى شەككە جەتكەن سوڭ، ءبىرشاما تومەن تارالۋ دەڭگەيىنە ءتۇسۋ ءۇشىن ادەتتە تاعى 6 – 8 اپتا ۋاقىت قاجەت، تومەندەۋ بارىسىندا از مولشەردە تولقۋ تۋىلۋى دا مۇمكىن.

مەملەكەتتىك اۋرۋدىڭ الدىن الۋ جانە ونى تىزگىندەۋ مەڭگەرمەسىنىڭ اقپارات مالىمدەمەشىسىنىڭ ايتۋىنشا، جەكەلىك ساقتىقتى ۇزدىكسىز ويداعىداي ساقتاۋ قاجەت، قارتتار، نارەستەلەر مەن سابيلەر، سوزىلمالى اۋرۋى بارلار قاتارلى ءتۇيىندى توپتاعىلار ادام شوعىرلانعان ورىنعا بارعاندا نەمەسە الەۋمەتتىك قاتىناس قۇرالىنا وتىرعاندا ماسكى تاققانى ابزال. سونىمەن بىرگە، قولدى ءجيى جۋىپ، ءار كۇنى تەرەزەنى 2 – 3 رەت اشىپ اۋا الماستىرىپ، ەسىك تۇتقاسى، ىدىس – اياق قاتارلى ۇنەمى قول تيگىزەتىن زاتتاردى مەرزىم سايىن ديزەنفەكسيالاپ وتىرعان ءجون.

مۇنان سىرت، تەڭگەرىمدى ازىقتانۋ، ۇيلەسىمدى ارەكەتتەنۋ جانە جەتكىلىكتى دەمالۋ ارقىلى يممۋنيتەتتى ارتتىرعان ءجون. ەگەر قىزۋى ورلەۋ، جوتەلۋ قاتارلى جۇقپالى تۇماۋدىڭ اۋرۋ بەلگىلەرى بايقالسا، دەر كەزىندە ەمدەلۋ ءارى سىرتقا شىعۋدى ازايتۋ قاجەت، اۋىرىپ ءجۇرىپ قىزمەتكە شىقپاعان، وقۋعا بارماعان ابزال.

كەلۋ قاينارى: حالىق تورابى