شۇعىل قۇتقارۋ اۆتوموبيلىمەن جوتكەگەندە اقىنى اسا جوعارى الۋ وقيعاسىنا قاتىستى ەمحاناعا 5000 يۋان اقشالاي ايىپ سالىندى

ءتىلشىنىڭ 12 – ايدىڭ 16 – كۇنى جياڭشي ولكەلىك بازاردى باقىلاۋ – باسقارۋ تاراۋلارىنان ۇعىسۋىنشا، نانچاڭ قالالىق بازاردى باقىلاۋ – باسقارۋ مەكەمەسى جۋىردا شۇعىل قۇتقارۋ اۆتوموبيلىمەن جوتكەگەندە اقىنى اسا جوعارى الۋ وقيعاسىنا قاتىستى نانچاڭ گان – ي ەمحاناسى شەكتى سەرىكتەستىگىنە اكىمشىلىك جاقتان 5000 يۋان اقشالاي ايىپ سالعان.

جازالاۋ ۇيعارىمىنا قاراعاندا، 2025 – جىلى 4 – ايدىڭ 8 – كۇنى كەشكى ساعات 10 اينالاسىندا، نانچاڭ قالاسى گان – ي ەمحاناسى شەكتى سەرىكتەستىگىنىڭ قىزمەتكەرى شيۇڭ زۇڭيۇڭ اتالعان ەمحانانىڭ اتىندا تىركەلگەن شۇعىل قۇتقارۋ اۆتوموبيلىن جۇرگىزىپ، اتالعان ەمحانانىڭ اتىندا جياڭشي ولكەلىك بالالار ەمحاناسىنداعى ناۋقاس تاڭ XX تى شاڭحاي قالاسىنداعى ەمحاناعا ءوز بەتىمەن جوتكەگەن، تۇتاس ارالىققا بارىپ كەلۋ ءۇشىن 1600 كيلومەتر جول باسىپ، ناۋقاستى جوتكەۋ قاراجاتى ءۇشىن 28000 يۋان العان. نانچاڭ قالاسى گان – ي ەمحاناسى شەكتى سەرىكتەستىگىنىڭ شۇعىل قۇتقارۋ اۆتوموبيلىنىڭ اشىق جاريالانعان اقى ولشەمى ”3 كيلومەترگە 20 يۋان“، اتاپ ايتقاندا، ءار كيلومەترگە 6.67 يۋان، نانچاڭ قالاسىنان شاڭحاي قالاسىنا بارىپ – كەلۋ بارىسىندا جيىنى 1600 كيلومەتر جول باسقان بولسا، اشىق جاريالانعان باعا ولشەمى بويىنشا 10672 يۋان اقى الۋى كەرەك. اتالعان ەمحانا دەلوعا قاتىستى شۇعىل قۇتقارۋ ماشيناسى مەن شيۇڭ زۇڭيۇڭعا ءونىمدى باسقارۋ شارالارىن قولدانباعاندىقتان، اتالعان ەمحانانىڭ قىزمەتكەرى شۇعىل قۇتقارۋ ماشيناسىمەن ناۋقاس جوتكەۋ جاعىندا قىزمەت وتەۋ بارىسىندا، شۇعىل قۇتقارۋ اۆتوموبيلىنىڭ اشىق جاريالانعان باعاسىنان سىرت 17328 يۋان اقىنى ارتىق العان.

”حالىقتىق شۇعىل قۇتقارۋ اۆتوموبيلىنىڭ 800 كيلومەترگە بارىپ – كەلۋگە 28 مىڭ يۋان اقى العانى“ سىندى ءىس قوعامداعىلاردىڭ نازارىن اۋداردى، ىسكە قاتىستى ادام 6 – ايدىڭ 18 – كۇنى ارتىق العان 17328 يۋان اقشانى ناۋقاس تاڭ XX كە قايتارىپ بەرگەن.

ەمحانانىڭ شۇعىل قۇتقارۋ اۆتوموبيلىمەن جوتكەۋگە اشىق جاريالانعان باعادان سىرت اقى العانى جونىندە نانچاڭ قالالىق بازاردى باقىلاۋ – باسقارۋ مەكەمەسى «جۇڭحۋا حالىق رەسپۋبليكاسىنىڭ باعا زاڭىنىڭ» 42 – تارماعىنداعى ”تيجاراتشىلار اشىق باعا قويۋ بەلگىلەمەسىنە قايشى كەلسە، ونى تۇزەتۋگە بۇيىرىلادى، زاڭعا قايشى قول جەتكىزگەن تابىسى ءمۇسادىرالانادى، سونىمەن بىرگە، 5000 يۋاننان تومەن اقشالاي ايىپ سالۋعا بولادى“ دەگەن بەلگىلەمەگە ساي، ىسكە قاتىستى ەمحانانى زاڭعا قايشى ارەكەتىن تۇزەتۋگە بۇيىرعان ءارى ەمحاناعا اكىمشىلىك جاقتان 5000 يۋان اقشالاي ايىپ سالعان.

مۇنان سىرت، ىسكە قاتىستى ەمحانادا ەمدەۋ جاعىندا باسقا دا قىزمەت وتەۋ بارىسىندا ولشەمنەن ارتىق اقى الۋ، قايتالاي اقى الۋ، شيپالى شەكتى مەرزىمىنەن ءوتىپ كەتكەن ءدارى – دارمەكتەردى قولدانۋ قاتارلى ارەكەتتەر ساقتالعان، بازاردى باقىلاۋ – باسقارۋ تاراۋلارى ۋاقىتى وتكەن ءدارى – دارمەكتەردى وتكىزىپ العان، ءتۇرلى زاڭعا قايشى ارەكەتتەرى ءۇشىن ەمحاناعا 87220.86 يۋان اقشالاي ايىپ سالىپ، بۇل اقشانى مەملەكەت قازىناسىنا تاپسىرعان.

كەلۋ قاينارى: حالىق تورابى