بيىل كۇننىڭ سۋىتۋى جايىراق بولدى ما؟ بيىل قىس جىلى بولا ما؟ بۇل جونىندە ماماندار جاۋاپ قايتاردى

كۇشتى سۋىق اعىستىڭ ىقپالىنان، وسى اپتادا ءۇرىمجى قالاسى ىقپال كولەمى كەڭ، تەمپەراتۋراسى قاتتى تومەندەگەن كۇشتى سۋىق اعىستى اۋا رايى بارىسىن قارسى الدى. وسى رەتكى تەمپەراتۋرانىڭ تومەندەۋ مولشەرى ءبىرشاما زور بولعانىمەن، بيىل قىس كىرگەننەن بەرى ادامدار وتە سۋىق ەمەس ەكەنىن سەزىندى. ەندەشە، كۇن جايىراق سۋىتا ما؟ بيىل قىس جىلى بولا ما؟

12 – ايدىڭ 10 – كۇنى، ءتىلشىنىڭ اۋا رايى تاراۋلارىنان ۇعىسۋىنشا، بۇرىنعى جىلدارداعىمەن سالىستىرعاندا، بيىل قىس ماۋسىمىنداعى سۋىق اعىستىڭ ءجۇرۋ ۋاقىتى جاي بولعان، بۇل نەگىزىنەن كوپ ءتۇرلى كليمات فاكتورىنىڭ ورتاق رولىنا بايلانىستى. ”مۇنىڭ باستى سەبەبى قىس تۇسكەننەن كەيىن ەندىك اتموسفەرا اينالما اعىسىنىڭ تەجەۋىنە ۇشىراپ، 11 ـ ايدىڭ ورتا، سوڭعى شەنىندە شينجياڭنىڭ سۋىق اۋاسىنىڭ ءبىرشاما ءالسىز بولۋىنا ىقپال جاساپ، بۇكىل رايوننىڭ اۋا تەمپەراتۋراسى بۇرىنعى جىلدارداعىدان ءبىرشاما جوعارى بولدى“ دەدى شينجياڭ كليمات ورتالىعىنىڭ كليماتتى الدىن الا مەجەلەيتىن باس مامانى چىن يىڭ.

شينجياڭ كليمات ورتالىعىنىڭ ەڭ جاڭا مەجەسىنە قاراعاندا، 2025\2026 - جىلعى قىس ماۋسىمىندا (2025 - جىلى 12 - ايدان 2026 - جىلى 2 - ايعا دەيىن)، ءۇرىمجى قالاسىنىڭ ورتاشا اۋا تەمپەراتۋراسى بۇرىنعى جىلدارداعىدان ءبىرشاما جوعارى بولادى، الايدا ”قىستىڭ باسى جىلى بولسا، سوڭى سۋىق بولاتىن“ كەزەڭدىك ەرەكشەلىك جارىققا شىعىپ، ەرەكشە سۋىق بولۋ مۇمكىندىگى ءبىرشاما تومەن بولادى.

جۇرت كوڭىل ءبولىپ وتىرعان ”بيىل قىس سۋىق بولا ما، الدە جىلى بولا ما“ دەگەن ماسەلەگە قاراتا، چىن يىڭ بىلاي دەپ اتاپ كورسەتتى: سۋىق قىس نەمەسە جىلى قىس جونىندەگى تۇجىرىمدى تۇتاس قىس ماۋسىمىنداعى 3 ايلىق ورتاشا اۋا تەمپەراتۋراسىنا نەگىزدەلىپ تۇراقتاندىرۋ كەرەك، ايقىن پايدالانۋ ولشەمى بار، ونى تەك ءبىر مەزەتتىك جىلى اۋا رايىنا قاراي بەلگىلەۋگە بولمايدى. مەجەلەۋدە ايتىلعان ”جىلىلاۋ بولۋ“، ”سۋىقتاۋ بولۋ“ بەتالىسىن تىكەلەي قىس جىلى بولادى نەمەسە سۋىق بولادى دەپ ايتۋعا بولمايدى، ەڭ سوڭعى قورىتىندىنى قىس اياقتاعاننان كەيىن، ناقتى جاعدايعا نەگىزدەلىپ تۇجىرىم جاساۋعا تۋرا كەلەدى.

ەۆروپا وداعىنىڭ كليماتتى باقىلاۋ قۇرىلىمى كوپەرنيك كليمات وزگەرىسىنە قىزمەت وتەۋ مەكەمەسىنىڭ 12 – ايدىڭ 9 - كۇنى جاريالاعان مازمۇنداماسىندا كورسەتىلۋىنشە، بيىل الدىڭعى 11 ايداعى اۋا تەمپەراتۋراسى ساندى مالىمەتىنە نەگىزدەلگەندە، 2025 - جىل 2023 – جىلمەن قاتار تۇرىپ، قاتىستى ەستەلىككە الىنعاننان بەرگى ەكىنشى ىستىق جىل بولعان، 2024 – جىلدان كەيىنگى ورىندا تۇرادى.

ءۇرىمجى قالاسىندا بيىل قىس ماۋسىمىندا شەكتەن تىس تومەن تەمپەراتۋرالى جاعداي جالپى جاقتان از بولعانىمەن، كليماتتىڭ تولقۋى ءالى دە ورىن تەۋىپ وتىر.

كەلۋ قاينارى: حالىق تورابى