بۇرىنعى جۇڭگو حۋارۇڭ حالىقارالىق جارنا مەڭگەرۋ شەكتى سەرىكتەستىگىنىڭ باس ديرەكتورى باي تيانحۇيعا ءولىم جازاسى اتقارىلدى

شينحۋا اگەنتتىگىنىڭ 12 - ايدىڭ 9 – كۇنى تيانجيننەن بەرگەن حابارى. ەڭ جوعارى حالىق سوت مەكەمەسىنىڭ تەكسەرىپ بەكىتۋىمەن، 2025 - جىلى 12 - ايدىڭ 9 - كۇنى تۇستەن بۇرىن تيانجين قالالىق 2 - ورتا دارەجەلى حالىق سوت مەكەمەسى قىلمىسكەر باي تيانحۇيعا زاڭ بويىنشا ءولىم جازاسىن اتقاردى.

2024 – جىلى 5 – ايدىڭ 28 – كۇنى، تيانجين قالالىق 2 - ورتا دارەجەلى حالىق سوت مەكەمەسى پارا الۋ قىلمىسى بويىنشا ايىپكەر باي تيانحۇيدى ءولىم جازاسىنا ۇكىم ەتىپ، ساياسي ۇقىعىنان ماڭگى ماحۇرىم ەتۋ ءارى بارلىق جەكە مال – مۇلكىن ءمۇساتىرالاۋ ۇكىمىن شىعاردى. باي تيانحۇي شاعىم ارىز بەرگەننەن كەيىن، تيانجين قالالىق جوعارى دارەجەلى حالىق سوت مەكەمەسى سوت اشىپ دەلونى قاراۋ ارقىلى ارىز - شاعىمدى تويتارىپ، بۇرىنعى ۇكىمدى ساقتاۋ جونىندە كەسىم جاسادى ءارى زاڭ بويىنشا ەڭ جوعارى حالىق سوت مەكەمەسىنىڭ تەكسەرىپ بەكىتۋىنە جولدادى.

ەڭ جوعارى حالىق سوت مەكەمەسى قايتا تەكسەرۋ ارقىلى بىلاي دەپ تۇراقتاندىردى: 2014 - جىلدان 2018 - جىلعا دەيىن باي تيانحۇي حۋارۇڭ (شياڭگاڭ) حالىقارالىق جارنا مەڭگەرۋ شەكتى سەرىكتەستىگىنىڭ كاسىپتى كەڭەيتۋ 3 – ءبولىمىنىڭ جاۋاپتىسى، باس ديرەكتورى، قارجى قوسۋ بانكەسى ءبولىمىنىڭ باس ديرەكتورى، جۇڭگو حۋارۇڭ حالىقارالىق جارنا مەڭگەرۋ شەكتى سەرىكتەستىگىنىڭ كاپيتال اينالىمىنىڭ باس باقىلاۋشىسى، باس ديرەكتوردىڭ كومەكشىسى، ورىنباسار باس ديرەكتور، باس ديرەكتورى قاتارلى مىندەت قولايلىلىعىنان پايدالانىپ، قاتىستى ورىنداردىڭ نىسان ساتىپ الۋ جانە كاسىپورىنداردىڭ قارجى قۇراۋ قاتارلى جاقتاردا پايدا تابۋىنا كومەكتەسىپ، زاڭسىز مال - مۇلىك العان، جالپى سىندىرىپ ەسەپتەگەندە ءبىر ميلليارد 108 ميلليون يۋاننان استام بولعان.

ەڭ جوعارى حالىق سوت مەكەمەسى بىلاي دەپ قارادى: ايىپكەر باي تيانحۇيدىڭ ارەكەتى پارا الۋ قىلمىسىن قالىپتاستىرادى. باي تيانحۇيدىڭ پاراعا العان سوماسى ەرەكشە كوپ، قىلمىس سالماعى ەرەكشە اۋىر، قوعامدىق ىقپالى ەرەكشە ناشار، سونداي - اق مەملەكەت پەن حالىقتىڭ مۇددەسىن ەرەكشە اۋىر زيانعا ۇشىراتقان، قىلمىسى توتەنشە اۋىر، زاڭ بويىنشا قاتاڭ جازالاۋ كەرەك. بۇل دەلونىڭ ءبىرىنشى سوت ۇكىمىندە، ەكىنشى سوت كەسىمىندە تانىلعان فاكتىلەرى انىق، دالەل - ىسپاتتارى شىن، تولىق، قىلمىسى دۇرىس تۇراقتاندىرىلعان، جازا ولشەمى لايىقتى بولعان. سوت ءتارتىبى زاڭدى. وسىعان ساي، ەڭ جوعارى حالىق سوت مەكەمەسى تيانجين قالالىق جوعارى دارەجەلى حالىق سوت مەكەمەسىنىڭ ءبىرىنشى سوتتا باي تيانحۇيعا ءولىم جازاسىن بەرۋ سىندى قىلمىستىق ىستەر كەسىمىن ساقتاۋىن تەكسەرىپ بەكىتتى.

تيانجين قالالىق 2 - ورتا دارەجەلى حالىق سوت مەكەمەسى ەڭ جوعارى حالىق سوت مەكەمەسىنىڭ قىلمىستىق ىستەر كەسىمناماسى مەن ءولىم جازاسىن اتقارۋ بۇيرىعىن تاپسىرىپ العاننان كەيىن، قىلمىسكەر باي تيانحۇيعا زاڭ بويىنشا ۇكىم جاريالادى ءارى ءولىم جازاسىن اتقاردى. جازا باستالاردان بۇرىن، باي تيانحۇي ءوزىنىڭ جاقىن تۋىستارىمەن كەزدەستى.