ا ق ش مەن كانادانىڭ شەكارالاسقان جەرىندە 7.0 بال جەر سىلكىندى

ا ق ش – نىڭ الياسكا شتاتى مەن كانادانىڭ يۋكون رايونىنىڭ شەكارالاسقان جەرىندە 12 – ايدىڭ 6 – كۇنى 7.0 بال جەر سىلكىندى، الياسكا شتاتىنىڭ ورتالىعى جۋنەاو مەن يۋكون رايونىنداعى ءبىر ءبولىم تۇرعىندار سىلكىنىس ءدۇمپۋىنىڭ انىق بولعانىن ايتقان.

جەرگىلىكتى اقپارات قۇرالى «جۋنەاۋ تاۋەلسىزدىك گازەتىنىڭ» حابارلاۋىنشا، جەر سىلكىنىسى سەبەبىنەن جۋنەاۋدا سىلكىنىس كەمىندە 30 سەكۋند انىق بايقالعان، قازىرگە دەيىن ادامداردىڭ جارالانۋى جانە ءولىم – جىتىمگە ۇشىراۋى، مال – مۇلىكتىڭ زيانعا ۇشىراۋى تۋرالى مالىمەت بەرىلمەگەن.

ا ق ش – نىڭ تەڭىز شۋىلىنان دابىل قاعۋ ورتالىعىنىڭ سول كۇنى جاريالاۋىنشا، جەر سىلكىنىسىنەن سوڭ تەڭىز شۋىلىنىڭ تۋىلۋ حاۋپى بايقالماعان.

ا ق ش – نىڭ گەولوگيالىق تەكسەرۋ مەڭگەرمەسىنىڭ ساندى مالىمەتىنە قاراعاندا، وسى رەتكى جەر سىلكىنىسى جەرگىلىكتى ۋاقىت بويىنشا ساعات 11 دەن 41 مينۋت وتكەندە (بەيجيڭ ۋاقىتى بويىنشا 12 – ايدىڭ 7 – كۇنى ساعات 4 تەن 41 مينۋت وتكەندە) تۋىلعان، سىلكىنىس ورتالىعى الياسكا شتاتى ياكۋتات قالاسىنىڭ سولتۇستىگىنەن 90 كيلومەتر قاشىقتىقتا، سىلكىنىس قاينارى شامامەن 10 كيلومەتر تەرەڭدىكتە. سودان كەيىن دە نەشە رەت تومەن دارەجەلى قايتالامالى سىلكىنىس تۋىلعان.

مۇنان سىرت، الياسكا جەر سىلكىنىسى ورتالىعىنىڭ مالىمەتىنە قاراعاندا، وسى رەتكى جەر سىلكىنىسىنىڭ دارەجەسى 6.8 بال ەكەن، سىلكىنىس قاينارى 5 كيلومەتر تەرەڭدىكتە.

ياكۋتات — الياسكا شتاتىنداعى شەتكەرى اۆتونوميالى قالا – قالاشىق، جان سانى شامامەن 700 ادام، جۋنەاۋ قالاسىنىڭ باتىس سولتۇستىگىنەن 450 كيلومەتر قاشىقتىقتاعى جەرگە ورنالاسقان.

كەلۋ قاينارى: حالىق تورابى