ورتالىق ءتارتىپ تەكسەرۋ كوميتەتى، مەملەكەتتىك باقىلاۋ ـ تەكسەرۋ كوميتەتىنىڭ ورتالىق ۇيىمداستىرۋ بولىمىندە تۇراتىن ءتارتىپ تەكسەرۋ، باقىلاۋ ـ تەكسەرۋ گرۋپپاسىنىڭ بۇرىنعى باستىعى لي گاڭنىڭ پارا الۋ دەلوسىنا ءبىرىنشى سوتتا ۇكىم شىعارىلدى

12 – ايدىڭ 3 – كۇنى، حۋبەي ولكەسى ۋحان قالالىق ورتا دارەجەلى حالىق سوت مەكەمەسى ورتالىق ءتارتىپ تەكسەرۋ كوميتەتى، مەملەكەتتىك باقىلاۋ ـ تەكسەرۋ كوميتەتىنىڭ ورتالىق ۇيىمداستىرۋ بولىمىندە تۇراتىن ءتارتىپ تەكسەرۋ، باقىلاۋ ـ تەكسەرۋ گرۋپپاسىنىڭ بۇرىنعى باستىعى لي گاڭنىڭ پارا الۋ دەلوسىنا ءبىرىنشى سوتتا اشىق ۇكىم شىعارىپ، ايىپكەر لي گاڭعا پارا الۋ قىلمىسى بويىنشا 15 جىل مەرزىمدى قاماۋ جازاسىن ۇكىم ەتتى، وعان قوسا 6 ميلليون يۋان اقشالاي ايىپ سالدى؛ دەلوعا الىنعان لي گاڭنىڭ پارا الۋ قىلمىسىنان تاپقان مال - مۇلكى مەن ءوسىمىن زاڭ بويىنشا مەملەكەت قازىناسىنا تاپسىرادى، جەتپەگەن بولەگىن جالعاستى قۋزاپ قايتارىپ الادى.

قاراۋ ارقىلى مىنالار انىقتالدى: 1998 - جىلدىڭ العاشقى جارىمىنان 2024 – جىلى 6 – ايعا دەيىن ايىپكەر لي گاڭ سىچۋان ولكەسى چىڭدۋ قالاسى دا - ي اۋداندىق پارتكومنىڭ تۇراقتى مۇشەسى، ورىنباسار اكىمى، دا - ي اۋداندىق پارتكومنىڭ ورىنباسار شۋجيى، چىڭدۋ قالاسى ۋىنجياڭ اۋداندىق (رايون) پارتكومنىڭ ورىنباسار شۋجيى، اۋدان (رايون) اكىمى، چىڭدۋ قالاسى بۇعازدىڭ ەكى جاعالاۋىنداعى عىلىم - تەحنيكا كاسىبىن اشۋ باقشاسىن باسقارۋ كوميتەتىنىڭ ۇنەمىلىك ىستەرگە جاۋاپتى ورىنباسار مەڭگەرۋشىسى، چىڭدۋ قالاسى ۋىنجياڭ رايوندىق پارتكومنىڭ شۋجيى، سىچۋان ولكەلىك ساۋداگەر شاقىرىپ، قارجى ەنگىزۋ مەكەمەسى پارتگرۋپپاسىنىڭ شۋجيى، مەكەمە باستىعى، سىچۋان ولكەسى باجۇڭ قالالىق پارتكومنىڭ شۋجيى، سىچۋان ولكەسى زىگۇڭ قالالىق پارتكومنىڭ شۋجيى، سىچۋان ولكەلىك حالىق ۇكىمەتى پارتگرۋپپاسىنىڭ مۇشەسى، ورىنباسار ولكە باستىعى، يۇننان ولكەلىك پارتكومنىڭ تۇراقتى مۇشەسى، ۇيىمداستىرۋ ءبولىمىنىڭ باستىعى قاتارلى قىزمەت قولايلىلىعى، سونداي - اق قىزمەت ۇقىعى نەمەسە ورنى قالىپتاستىرعان قولايلى شارت – جاعدايدان پايدالانىپ قاتىستى ورىندار مەن جەكەلەردىڭ كاسىپورىن تيجاراتى، نىساندى كوتەرەگە الۋ، جەردى وتكەرمەلەۋ، قىزمەت مىندەتىن ءوسىرۋ قاتارلى ىستەرىنە كومەكتەسىپ، جوعارىدا ايتىلعان ورىندار مەن جەكەلەردىڭ بەرگەن مال – مۇلكىن العان، حالىق اقشاسىنا سىندىرعاندا جيىنى 102 ميلليون يۋاننان اسقان.

ۋحان قالالىق ورتا دارەجەلى حالىق سوت مەكەمەسى بىلاي دەپ قارادى: ايىپكەر لي گاڭنىڭ ارەكەتى پارا الۋ قىلمىسىن قالىپتاستىرادى، ونىڭ پارا الۋ سوماسى توتەنشە كوپ، سونداي - اق مەملەكەت پەن حالىقتىڭ مۇددەسىن ەرەكشە اۋىر زيانعا ۇشىراتتى، ونى زاڭ بويىنشا جازالاۋ كەرەك. ونىڭ كوپ ادامنىڭ زاڭعا قايشىلىق جاساپ قىلمىس وتكىزۋ ماسەلەسىن اشكەرەلەۋى تەكسەرۋ ارقىلى شىن بولىپ، ەلەۋلى ەڭبەك كورسەتۋ بەينەسى بولعاندىقتان، پارا الۋ قىلمىسىندا جۇزەگە اسپاعان جايتتەر بولعاندىقتان، سوتقا كەلگەننەن كەيىن قىلمىسىن قاز - قالپىندا مويىنداپ، دەلو باسقارۋ ورگاندارى ءالى يگەرمەگەن كوپ ساندى پارا الۋ فاكتىلەرىن ىرىقتىلىقپەن تاپسىرىپ، قىلمىسىن تانىپ، وكىنگەندىكتەن، زاڭسىز ولجانى بەلسەنە قايتارىپ، دەلوعا قاتىستى زاڭسىز اقشا مەن زاڭسىز مال – مۇلىكتىڭ باسىم كوپ ساندىسىن قايتارىپ العاندىقتان، زاڭ بويىنشا جەڭىلدەتىپ جازالاۋعا بولادى. سوت مەكەمەسى جوعارىداعىداي ۇكىم شىعاردى.

ۇعىسۋعا قاراعاندا، ۋحان قالالىق ورتا دارەجەلى حالىق سوت مەكەمەسى 2025 - جىلى 9 – ايدىڭ 18 - كۇنى اشىق سوت اشىپ، اتالعان دەلونى قاراعان. سوتتا پروكۋراتۋرا ورگانى قاتىستى دالەل - سىپاتتاردى كورسەتتى، ايىپكەر لي گاڭ مەن ونىڭ اقتاۋشىسى فاكت كورسەتتى، شاعىم ايتۋشى مەن اقتاۋشى سوتتىڭ باسقارۋىندا تولىق پىكىر ايتتى، لي گاڭ سوڭعى ءسوزىن سويلەدى ءارى سوتتا قىلمىسىن تانىپ، وكىنەتىندىگىن ءبىلدىردى. حالىق قۇرىلتايى ۋاكىلدەرىنەن، ساياسي كەڭەس مۇشەلەرىنەن جانە ءار سالا بۇقاراسىنان 20 نەشە ادام سوت تەرگەۋىن سىرتتاي تىڭدادى.

كەلۋ قاينارى: حالىق تورابى