”جول سۇراۋ، تەلەفونىن بەرە تۇرۋدى ءوتىنۋ“ سىندى جاڭا الدامكوستىكتەن ساق بولىڭىزدار

جۋىردا شاندۇڭ ولكەسى دىجوۋ قالاسى شياجين اۋدانىندا ”جول سۇراۋدى“ جەلەۋ ەتكەن ەكى رەتكى الدامكوستىك دەلوسى تۋىلدى، زاڭسىز ەلەمەنتتەر ارناۋلى تۇردە قارتتاردى كوزدەگەن، تەلەفون سوعىپ الايىن دەپ تەلەفونىن سۇراپ، وسى ارالىقتا تەلەفون كارتۋچكاسىن ۇرلاپ العان. ساقشى جاق جۇرتشىلىققا قول تەلەفوندى الباتى بەيتانىس ادامدارعا بەرۋدەن ساق بولۋدى ەسكەرتەدى.

شياجين اۋداندىق قوعام حاۋىپسىزدىگى مەكەمەسى شياڭجاۋجۋاڭ ساقشى باسقارماسىنىڭ ورىنباسار باستىعى لي ۋانليننىڭ تانىستىرۋىنشا دەلو تۋىلعان كۇنى، شياڭجاۋجۋاڭ قالاشىعىنداعى شيڭ اتاي سىرتقا شىعىپ قوقسىق توگۋ بارىسىندا، سارى ءتۇستى ءنومىرسىز اۆتوموبيلدىڭ جول شەتىنە توقتاتىلعانىن كورەدى. شوفەردىڭ جانىنداعى ورىندىقتا وتىرعان ەر ادام ”ناعاشى اعاسى جاۋ ليدىڭ“ ءۇيىنىڭ قايسى ەكەنىن سۇرايدى، شيڭ اتاي بىلمەيتىنىن ايتقان سوڭ، ول قارسى جاقپەن حابارلاسىپ الۋ ءۇشىن شيڭ اتايدان تەلەفونىن بەرە تۇرۋدى وتىنەدى. شيڭ اتاي تەلەفونىن بەرگەن سوڭ، ول تەلەفوندى شوفەرگە بەرىپ، ءوزى ونى – مۇنى اڭگىمەلەردى ايتىپ، شيڭ اتايدىڭ نازارىن بۇرادى. ەكى – ءۇش مينۋتتان كەيىن ولار تەلەفوندى قايتارىپ بەرەدى، كەلەسى كۇنى ايەلى شيڭ اتايمەن حابارلاسا الماي قالعان كەزدە بارىپ، قول تەلەفوننىڭ كارتۋچكاسىنىڭ زىم – زيا جوعالعانىن بايقايدى.

سول كۇنى تۇستەن كەيىن، كورشى قىستاقتاعى ما اجەي دە وسى تەكتەس الدامكوستىككە ۇشىرايدى. سارى ءتۇستى اۆتوموبيلدەگىلەر ما اجەيدەن ”ۋاڭ جيە“ دەگەن ادامنىڭ ءۇيى قايسى دەپ دەپ سۇرايدى. ما اجەي ول قىستاقتا وسى اتتاس ادامنىڭ جوق ەكەنىن ايتادى، اۆتوموبيلدەگىلەر ودان تەلەفون سوعىپ الايىق دەگەن سىلتاۋمەن قول تەلەفونىن سۇرايدى، بىرنەشە مينۋتتان كەيىن تەلەفوندى قايتارىپ بەرگەن سوڭ ولار كەتىپ قالادى. ەكىنشى كۇنى ما اجەيدىڭ قىزى وعان بىرنەشە رەت تەلەفون بەرسە دە، تەلەفونى جالعانبايدى، باستابىندا ول تەلەفون اقىسى تولەنبەي تەلەفونى توقتاپ قالعان بولۋى مۇمكىن دەپ ويلاپ، تەلەفونعا اقىسىن تولىقتاپ تولەگەن سوڭ دا تەلەفون جالعانبايدى، ۇيگە قايتقان سوڭ شەشەسىنىڭ تەلەفونىن تەكسەرسە، تەلەفون كارتۋچكاسى ۇرلانعان ەكەن.

شياڭجاۋجۋاڭ ساقشى باسقارماسىنىڭ ورىنباسار باستىعى لي ۋانليننىڭ ايتۋىنشا، ”دەلو تۋدىرۋشىلاردىڭ نىساناسى قول تەلەفون ەمەس، قايتا قول تەلەفوننىڭ كارتۋچكاسى“، ۇرلانعان تەلەفون كارتۋچكاسى قىمبات باعادا وتكەرمەلەپ ساتىلادى، ولار بۇل كارتۋچكانى تەلەفون سوعىپ الدامكوستىك ىستەۋگە نەمەسە باسقا زاڭسىز قيمىلدارعا پايدالانادى، زيانكەستىككە ۇشىراعاندار وسىنىڭ سالدارىنان ويلاماعان جەردەن الدامكوستەردىڭ ”قولشوقپارىنا“ اينالىپ قالۋى مۇمكىن. قارتتار قول تەلەفوننىڭ يقۋاتىنا قانىق بولماعاندىقتان، ادەتتە وتباسىنداعىلار حابارلاسا الماي قالعان كەزدە بارىپ جاعدايدىڭ قالىپسىز ەكەنىن بايقايدى.

قازىر دەلوعا قاتىستى ادامدار باسقا جەردە تۇگەلدەي قولعا تۇسكەن، دەلو ىشكەرىلەي تەكسەرىلۋدە.

ساقشى جاق مىنانى ەسكەرتەدى، بارشا جۇرتشىلىق، وتە – موتە، قارتتار قول تەلەفوننىڭ كارتۋچكاسىن ويداعىداي ساقتاعانى ابزال، قول تەلەفوندى الباتى ادامعا بەرە تۇرۋعا بولمايدى، بەيتانىس ادامدارعا قول تەلەفونىڭىزدى مەڭگەرۋگە بەرمەڭىز. شىنىمەن دە باسقالاردىڭ مەڭگەرۋى قاجەت بولسا، قول تەلەفونىڭىزدىڭ باستان – اياق ءوزىڭىز كورىپ تۇرالاتىنداي جەردە بولۋىنا كەپىلدىك ەتىڭىز ءارى ترۋپكاسىز تىڭداۋ كنوپكاسىن باسىپ قويىڭىز. الدا – جالدا قول تەلەفونىڭىزدىڭ كارتۋچكاسى ۇرلانسا، جوعالسا، دەرەۋ كارتۋچكانى بىتىرگەن حابارلاسۋ سەرىكتەستىگىمەن حابارلاسىپ، جوعالعانىن مالىمدەپ تىزىمدەتىڭىز ءارى دەر كەزىندە ساقشىعا مالىمدەڭىز.

كەلۋ قاينارى: حالىق تورابى