حى جياۋلۇڭنىڭ مەكەمەسى مالىمدەمە جاريالادى: حى جياۋلۇڭنىڭ بارلىق تىكە تاراتىلىمى تۇگەلدەي الەۋمەتتىك يگىلىك ماقساتىندا اۋىل شارۋاشىلىعى سالاسىنا كومەكتەسۋ سيپاتىندا، وعان اقى المايدى

11 – ايدىڭ 27 – كۇنى، شينجياڭ ۇيعۇر اۆتونوميالى رايوندىق اۋىل شارۋاشىلىعى ونىمدەرى ايگىلى ماركا قۇرىلىسى جانە ءوندىرۋ مەن ساتۋ جاعىندا قىزمەت وتەۋ ورتالىعى قاتاڭ مالىمدەمە جاريالاپ، حى جياۋلۇڭنىڭ بارلىق تىكە تاراتىلىمى تۇگەلدەي الەۋمەتتىك يگىلىك ماقساتىندا اۋىل شارۋاشىلىعىنا كومەكتەسۋ سيپاتىندا ەكەنىن، ەشقانداي اقى المايتىنىن ءبىلدىردى.

حى جياۋلۇڭ — شينجياڭ ۇيعۇر اۆتونوميالى رايوندىق اۋىل شارۋاشىلىعى ونىمدەرى ايگىلى ماركا قۇرىلىسى جانە ءوندىرۋ مەن ساتۋ جاعىندا قىزمەت وتەۋ ورتالىعىنىڭ (اۆتونوميالى رايوندىق اۋىل شارۋاشىلىعى سالاسىندا شەتەلمەن سەلبەستىك جاساۋ ورتالىعىنىڭ) مەڭگەرۋشىسى، اتالعان ورتالىق اۆتونوميالى رايوندىق اۋىل شارۋاشىلىعى جانە اۋىل – قىستاق مەڭگەرمەسىنە توتە قاراستى ءىسورىن. سول كۇنى حى جياۋلۇڭ دا ءوزىنىڭ جەكەلىك تىركەلگىسىندە وسى مالىمدەمەنى جوتكەپ تاراتتى.

مالىمدەمەدە بىلاي دەلىنگەن: جۋىردا زاڭسىز ەلەمەنتتەر ”حى جياۋلۇڭنىڭ“ اتىن جامىلىپ، تىكە تاراتىلىم ارقىلى زات ساتۋ دەگەندى جەلەۋ ەتىپ، ساۋداگەرلەردەن اقى العان، ”حى جياۋلۇڭ جولداس ورىستەتكەن بارلىق تىكە تاراتىلىم قيمىلدارى تۇگەلدەي الەۋمەتتىك يگىلىك ماقساتىندا اۋىل شارۋاشىلىعى سالاسىنا كومەكتەسۋ سيپاتىن الادى، ەشقانداي اقى المايدى، سونىمەن بىرگە، ەشقاشان ساۋداگەرلەر مەن كاسىپورىنداردان ەشقانداي اقى الماعان“.

شينجياڭ ۇيعۇر اۆتونوميالى رايوندىق اۋىل شارۋاشىلىعى جانە اۋىل – قىستاق مينيسترلىگى مەن اۋىل شارۋاشىلىعى ونىمدەرى ايگىلى ماركا قۇرىلىسى جانە ءوندىرۋ مەن ساتۋ جاعىندا قىزمەت وتەۋ ورتالىعى، سونداي – اق، حى جياۋلۇڭ جولداس ەشقاشان ءارقانداي سەرىكتەستىككە، قۇرىلىمعا نەمەسە جەكەگە ”حى جياۋلۇڭ“ دەگەن اتتى قولدانىپ ”ورىن يەلەۋ اقىسى“، ”ۇگىتتەۋ اقىسى“ قاتارلى ءتۇرلى قاراجاتتاردى الۋعا ۇقىق بەرمەگەن.

مالىمدەمەدە كاسىپورىندار مەن تۇتىنۋشىلارعا قىراعىلىقتى ارتتىرۋ، مۇقيات پارىقتاپ، الدانىپ قالۋدان ساقتانۋ ەسكەرتىلگەن، ەگەر ”حى جياۋلۇڭ“ دەگەن اتپەن اقى الۋ ءىسى بايقالسا، شينجياڭ ۇيعۇر اۆتونوميالى رايوندىق اۋىل شارۋاشىلىعى ونىمدەرى ماركا قۇرىلىسى جانە ءوندىرۋ مەن ساتۋ جاعىندا قىزمەت وتەۋ ورتالىعىنا مالىمدەۋگە بولادى، ەگەر الدەقاشان زيان شەككەن بولساڭىز، دەرەۋ ساقشىعا مالىمدەڭىز ءارى ىسپاتتاردى ساقتاپ قويىڭىز.

كەلۋ قاينارى: حالىق تورابى