ءورت ءوشىرۋ سالاسىنداعى جالعان – جارامسىز زاتتاردى جاساۋ – ساتۋ قىلمىسىنا زاڭ بويىنشا قاتاڭ سوققى بەردى

حالىق گازەتىنىڭ ءتىلشىسى جوۋ چيان 11 – ايدىڭ 24 – كۇنى بەيجيڭنەن حابارلايدى. 11 – ايدىڭ 24 – كۇنى تۇستەن بۇرىن، ءتىلشىنىڭ قوعام حاۋىپسىزدىگى مينيسترلىگىنەن ۇعىسۋىنشا، قوعام حاۋىپسىزدىگى مينيسترلىگىنىڭ ءبىرتۇتاس ورنالاستىرۋىنا ساي، قوعام حاۋىپسىزدىگى ورگاندارى ”كۇنلۇن“ تاقىرىبىنداعى ارناۋلى قىزمەت پەن تۇتىنۋ سالاسىنداعى جالعان – جارامسىز زاتتاردى جاساۋ – ساتۋ قىلمىسىن ارناۋلى جونگە سالۋدى ىشكەرىلەي ىلگەرىلەتىپ، ءورت ءوشىرۋ اسپاپتارى، ەلەكترلى ۆەلوسيپەت پەن ونىڭ زاپشاستارى، ەلەكترلى بۇيىمدار قاتارلىلارعا قاتىستى ءتۇيىندى سالالارداعى قىلمىستىق ىستەرگە زاڭ بويىنشا قاتاڭ سوققى بەرىپ، قوعامداعى الەۋمەتتىك حاۋىپسىزدىكتىڭ ساقتىق شەبىن بەرىك بەكەمدەدى. بيىل 1 – ايدان 10 – ايعا دەيىن، قوعام حاۋىپسىزدىگى ورگاندارى قاتىستى قىلمىستارعا ساياتىن 520 دەلو تۇرعىزىپ جانە وعان بارلاۋ جۇرگىزىپ، جالعان بۇيىمداردى جاساۋ – ساتۋمەن شۇعىلداناتىن قىلمىستىق كاسىپ سالاسى تىزبەگىن تۇبەگەيلى تالقانداپ، حاۋىپسىزدىككە ساياتىن ءبىر توپ قاتەردى دەر كەزىندە الاستادى.

قوعام حاۋىپسىزدىگى مينيسترلىگى ءورت ءوشىرۋ سالاسىندا جالعان – جارامسىز زاتتاردى جاساۋ – ساتۋ قىلمىسىنا ساياتىن 5 رەتكى تيپتىك دەلونى جاريالادى. مۇنىڭ ىشىندە، لياۋنيڭ ولكەسى لياۋياڭ قالالىق قوعام حاۋىپسىزدىگى ورگاندارى بيىل 7 – ايدا انىقتاعان ءبىر رەتكى جالعان – جارامسىز ءورت ءوشىرۋ اسپابىن ءوندىرۋ جانە ساتۋ دەلوسى قامتىلعان. تەكسەرۋگە قاراعاندا، 2021 – جىلى 1 – ايدان بەرى، ءمالىم ءورت ءوشىرۋ اسپاپتارىن جاساۋ شەكتى سەرىكتەستىگى ءورت ءوشىرۋ ءدارىسىن وندىرەتىن بىرنەشە كاسىپورىننان بازارداعى باعادان كورنەكتى تومەن باعادا ساپاسى تولىمسىز ءورت ءوشىرۋ دارىلەرىن زور مولشەردە ساتىپ الىپ، جالعان – جارامسىز ءورت ءوشىرۋ اسپاپتارىن جاسايدى. ساراپتاۋعا قاراعاندا، دەلوعا ساياتىن ءورت ءوشىرۋ اسپاپتارىنىڭ، ءورت ءوشىرۋ دارىلەرىنىڭ ءونىمدى قۇرامى تۇگەلدەي مەملەكەتتىك ولشەمگە جەتپەگەن، جالعان – جارامسىز بۇيىم سانالادى. قوعام حاۋىپسىزدىگى ورگاندارى قىلمىس كۇماندىلارىنان 6 ادامدى زاڭ بويىنشا تۇتقىنداپ، جالعان بۇيىمداردى جاسايتىن 3 سەرىكتەستىكتى، 5 ورىنداعى قىلمىستىق اپاندى تالقانداپ، سول جەردەن جالعان – جارامسىز ءورت ءوشىرۋ اسپابىنان 10 مىڭنان استامىن، جالعان – جارامسىز ءورت ءوشىرۋ دارىسىنەن 50 توننادان استامىن قولعا تۇسىرگەن، دەلوعا قاتىستى سوما 50 ميلليون يۋاننان اسقان. قازىر اتالعان دەلوداعى باستى قىلمىس كۇماندىلارىنا قىلمىستىق ىستەر بويىنشا ماجبۇرلەۋ شارالارى اتقارىلعان.

تانىستىرۋعا قاراعاندا، قوعام حاۋىپسىزدىگى ورگاندارى قاتىستى تاراۋلارمەن بىرگە حاۋىپسىز ءوندىرىس سالاسىن تۇبەگەيلى وڭالتۋدان قامال الۋداعى 3 جىلدىق ارەكەت پەن ءورت ءوشىرۋ بۇيىمدارىنىڭ ساپاسىنىڭ حاۋىپسىزدىگىن تۇتاس تىزبەك بويىنشا جونگە سالۋ ارەكەتىن كۇش سالا ورىستەتىپ، قىلمىستى ىستەرمەن اينالىسۋدى كاسىپ قىلعان قىلمىستىق توپتارعا جانە ءوڭىر اتتاعان زاڭسىز ءوندىرىس تىزبەگىنە نازاردى شوعىرلاندىرىپ، ءبىر توپ كەلەلى ءارى ءىرى دەلولاردى ءساتتى انىقتاعان.

كەلۋ قاينارى: حالىق تورابى