”اعا، ايلىعىمدى ەندى بەرمەسەڭىز اش قالاتىن بولدىم“ 

”اعا، ايلىعىمدى ەندى بەرمەسەڭىز اش قالاتىن بولدىم“.

قۇلاققا جاعىمدى اتىمەن، تەرەڭ سەزىمگە تولى سوزدەرىمەن ءسىزدى ”ءتاتتى ءسوزدىڭ شىرعاسىنا“ تۇسىرگەن ”سۇيكىمدى بويجەتكەن“ بالكىم ”دورەكى جىگىت“ بولىپ شىعۋى مۇمكىن، ءسىز ”ماحابباتىڭىزدى“ ينتەرنەتتەن تاپقانىڭىزعا شىن سەنىپ جۇرگەنىڭىزدە، قارسى جاق ءسىزدىڭ قالتاڭىزدى قاعۋدى ويلاپ جۇرگەن بولۋى مۇمكىن.

تيانجين قالاسى شيچيڭ رايونىنداعى ءبىر جىگىت دوستاسۋ دەتالىندا ”قىز دوسىمەن“ ءۇش جىل ماحابباتتاسادى، قارسى جاق 110 مىڭ يۋان اقشاسىن الداپ اكەتكەندە بارىپ، ونىڭ مۇلدە ”قۇپ جاراسقان قوساعى“ ەمەس ەكەنىن، ءتىپتى قارسى جاقتىڭ دا الدامكوستىكپەن شۇعىلدانىپ جۇرگەن ەر ادام ەكەنىن بايقايدى.

2023 – جىلى تيانجين قالاسى شيچيڭ رايونىنىڭ تۇرعىنى شياۋلي ينتەرنەت ارقىلى ءبىر قىزبەن تانىسادى، قارسى جاق وعان اتا – اناسىنىڭ اجىراسقانىن، وتباسى كەدەي بولسا دا، ءوز كۇشىنە سۇيەنىپ جان باققان قايسار بويجەتكەن ەكەنىن ايتادى.

وسىنداي ”تاعدىردىڭ تالكەگىنە ۇشىراعان بويجەتكەنگە“ شياۋليدىڭ كوڭىلى ءتۇسىپ قالىپ، ەكەۋى تەز ارادا ينتەرنەتتە ماحابباتتاسادى.

”جاقىننان بەرى تاماق الىپ ىشەتىن اقشام جوق“، ”سۋىق ءتۇسىپ كەتتى، قالىڭىراق شاپان الىپ كيگىم كەلەدى“، ”بەت جارعاق، بەت جۋۋ ورامالى، ۇيقى كيىمى قاتارلى العىم كەلگەن نارسەلەر وتە كوپ“ ...

ەكەۋى ارالاسۋ بارىسىندا ”قىز دوسى“ ودان ساۋعا، كيىم – كەشەك، تۇرمىستىق بۇيىم قاتارلىلاردى ساتىپ الۋ دەگەن جەلەۋمەن اقشا سۇرايدى ءارى جاسىم كىشكەنە بولعان سوڭ بانكە كارتۋچكاسىن بىتىرە المادىم دەپ الداپ، اي سايىن شياۋليدان 3000 يۋان تۇرمىستىق قاراجاتتى ”قارىزعا الادى“، كەزدەسكەن كەزدە ناق اقشامەن قايتارىپ بەرەتىن بولىپ ۋادە بەرەدى.

وعان جانى اشىعاندىقتان ءارى سەنگەندىكتەن، شياۋلي ونىڭ قاجەتىن تولىق قاناعاتتاندىرىپ وتىرادى، ەرەكشە كۇندەردە تاعى 520 يۋان حۇڭباۋ جولداپ ءوزىنىڭ ماحابباتىن بىلدىرەدى، وسىلايشا ءۇش جىل ىشىندە جيىنى 110 مىڭ يۋان اقشا جوتكەيدى. الايدا، ءار جولى شياۋلي كەزدەسۋدى نەمەسە كەسكىن ارقىلى سويلەسۋدى ايتقاندا، قارسى جاق ۇنەمى تەلەفوندى مۇعالىمگە تاپسىرىپ بەرەمىز، جاتاقتا سويلەسۋگە قولايسىز دەگەن سياقتى سەبەپتەرمەن الداۋسىراتادى.

بيىل 11 – ايدا شياۋلي تاعى دا ونىمەن كەزدەسۋدى ورتاعا قويعاندا، قارسى جاق ونى قارا تىزىمدىككە قوسىپ تاستايدى، وسى كەزدە بارىپ شياۋلي ءوزىنىڭ الدامكوستىككە جولىققانىن ءبىلىپ، دەرەۋ ساقشىعا دەلو مالىمدەيدى.

ساقشىعا مالىمدەۋدى تاپسىرىپ العان سوڭ، شيچيڭ رايوندىق ساقشى بولىمشەسىنىڭ قىلمىستىق ىستەردى بارلاۋ بولىمشەسى بىرلەسىپ بارلاۋ جۇرگىزۋ 3 – ۇلكەن اترەتىنىڭ ينفورماتسيالىق جاقتان قولداۋ كورسەتۋ بولىمشەسىنىڭ سايكەسۋىندە، شياۋلي بەرگەن ”قىز دوسىنىڭ“ الەۋمەتتىك جەلىدەگى تىركەلگىسى، سويلەسكەن مازمۇنى، اقشا جوتكەۋ تالونى قاتارلى دەرەكتەرگە سۇيەنىپ جان – جاقتى بارلاۋ جۇرگىزىپ، تەز ارادا ءىستىڭ شىن سىرىن انىقتايدى: شياۋليمەن ءۇش جىل بويى ينتەرنەت ارقىلى ماحابباتتاسقان ”بويجەتكەن“، ءىس جۇزىندە، ليۋ XX ەسىمدى جىگىت بولىپ شىعادى.

حالىق ساقشىلارى وسى دەرەكتەر بويىنشا دەرەۋ ىزدەۋ سالىپ، ليۋ XX تىڭ تۇرعان جەرىن تۇراقتاندىرعان سوڭ دەرەۋ ارەكەتتەنىپ، ونى ءساتتى تۇردە قولعا تۇسىرەدى.

مول ىسپات الدىندا ليۋ XX ءوزىنىڭ ”تاعدىر تالكەگىنە ۇشىراعان“ بويجەتكەن بەينەسىن مۇقيات جوبالاپ، ءتۇرلى سەبەپتەردى ويدان قۇراستىرۋ ارقىلى شياۋليدى الداپ اقشاسىن العان قىلمىسىن قاز – قالپىندا باياندايدى.

ول الەۋمەتتىك جەلىگە شىعارعان ”بويجەتكەننىڭ سۋرەتتەرىنىڭ“ تۇگەلدەي AI ارقىلى جاسالعانىن، اقشانى قايتارىپ بەرۋدى مۇلدە ويلاماعانىن، ”ەندى جاسىرا بەرۋگە امالى قالماعاندىقتان ونى قارا تىزىمدىككە قوسقانىن“ بۇكپەسىز ايتادى.

قازىر قوعام حاۋىپسىزدىگى ورگاندارى زاڭ بويىنشا ليۋ XX تى الدامكوستىك قىلمىس كۇمانىنا ساي قىلمىستىق ىستەر بويىنشا قاماۋعا العان.

كەلۋ قاينارى: حالىق تورابى