كويلەگىنە 229 ءتىرى بالىق جاسىرعان ايەلدى كەدەن مەكەمەسى انىقتاپ قولعا ءتۇسىردى 

جۋىردا لوحۋ كەدەن مەكەمەسى شەكارادان كىرگەن جولاۋشى كويلەگىنىڭ ىشىنە جاسىرعان ءتىرى ەسكەك بالىقتان 229 بالىقتى انىقتاپ قولعا تۇسىرگەن.

لوحۋ كەدەن مەكەمەسىنىڭ قىزمەتكەرلەرى شەكارادان كىرگەن جولاۋشىلارعا باقىلاۋ – باسقارۋ جۇرگىزۋ بارىسىندا، كەدەن مەكەمەسىنە ءوتىنىش تاپسىرماعان ءبىر ايەل جولاۋشىنىڭ كەدەندىك باقىلاۋ – باسقارۋ رايونىنا كىرگەنىن بايقاپ، كەدەن قىزمەتكەرلەرى وعان تاڭداپ تەكسەرۋ جۇرگىزەدى. ىشكەرىلەي تەكسەرۋ ارقىلى كەدەن قىزمەتكەرلەرى اتالعان جولاۋشىنىڭ ۇزىن قارا كويلەگىنىڭ ىشىنەن قىزىل، اق سۋلياۋ قالتالارعا سالىنعان كۇماندى ءتىرى بالىقتاردان 2 قالتاداعى جيىنى 229 بالىقتى بايقايدى. سوڭىنان شىنجىن كەدەن مەكەمەسىنىڭ حايۋاناتتار مەن وسىمدىكتەردى تەكسەرۋ – كارانتيندەۋ تەحنيكالىق ورتالىعى ساراپتاۋ ارقىلى اتالعان ءتىرى بالىقتىڭ ەسكەك بالىق ەكەنىن تۇراقتاندىرادى.

ەسكەك بالىق اعىندى تۇشتى سۋلاردا تىرشىلىك ەتۋگە بەيىمدەلگەن بالىق ءتۇرى، باۋىر قاناتى سورعىش قۇرىلىمعا وزگەرگەن، كوبىنەسە ازياداعى تاۋلى وڭىرلەردەگى بۇلاق سۋلارىنا تارالعان، ەرەكشەلىككە يە اسەمدىك بالىق سانالادى.

كەدەن مەكەمەسى مىنانى ەسكەرتەدى: جۇڭحۋا حالىق رەسپۋبليكاسى اۋىل شارۋاشىلىعى جانە اۋىل – قىستاق مينيسترلىگى مەن كەدەن باس باسقارماسىنىڭ 470 – ءنومىرلى ۇقتىرۋىنا ساي، ەسكەك بالىق «جۇڭحۋا حالىق رەسپۋبليكاسىنىڭ الىپ ءجۇرۋ، پوچتادان جولداۋ ارقىلى شەكارادان كىرگىزۋگە تيىم سالىناتىن حايۋاناتتار مەن وسىمدىكتەر، ولاردان جاسالعان ونىمدەر جانە باسقا كارانتيندەلەتىن تۇرلەر تىزىمدىگىندە» بەلگىلەنگەن شەكارادان كىرگىزۋگە تيىم سالىناتىن حايۋانات، ونى الىپ جۇرۋگە، پوچتادان جولداۋ ارقىلى شەكارادان كىرگىزۋگە تيىم سالىنادى.

كەلۋ قاينارى: حالىق تورابى