شينجياڭ اقشي اۋدانىندا 6.0 بال جەر سىلكىندى

شينحۋا اگەنتتىگىنىڭ 12 ـ ايدىڭ 4 ـ كۇنى ۇرىمجىدەن بەرگەن حابارى. 12 ـ ايدىڭ 4 ـ كۇنى شينجياڭنىڭ اقشي اۋدانىندا 6.0 بال جەر سىلكىندى. ءتىلشىنىڭ جەرگىلىكتى ۇكىمەت، ءورت ءسوندىرۋ جانە ورتتەن ساقتانۋ، شۇعىل جاعدايعا توتەپ بەرۋ تاراۋلارىنان ۇعىسۋىنشا، قازىرگە دەيىن ءولىم - ءجىتىم جانە مال ـ مۇلىك زيانى جونىندەگى حابار كەلمەگەن، قاتىستى تەكسەرۋ قىزمەتى ءالى جۇرگىزىلۋدە.

جۇڭگو جەر سىلكىنىسىن باقىلاۋ ستانسياسى تورابىنىڭ ولشەۋىنە قاراعاندا، 12 – ايدىڭ 4 – كۇنى ساعات 15تەن 44 مينۋت وتكەندە، شينجياڭ قىزىلسۋ قىرعىز اۆتونوميالى وبلىسىنىڭ اقشي اۋدانىندا (سولتۇستىك ەندىك 41.13 گرادۋس، شىعىس بويلىق 78.40 گرادۋس) 6.0 بال جەر سىلكىندى، سىلكىنىس قاينارىنىڭ تەرەڭدىگى 10 كيلومەتر.

اقشي اۋدانىنداعى ءبىر ۇكىمەت قىزمەتكەرى تىلشىگە اقشي اۋدانىنىڭ قاتىستى تاراۋلارىنىڭ سىلكىنىس ورتالىعىنا بارىپ، ءولىم – ءجىتىم، مال ـ مۇلىك شىعىنى جاعدايىن تەكسەرىپ جاتقاندىعىن ايتتى. جەر سىلكىنىسى تۋىلعاننان كەيىن، قىزىلسۋ قىرعىز اۆتونوميالى وبلىستىق ءورت ءسوندىرۋ جانە ورتتەن ساقتانۋ، قۇتقارۋ ـ كومەكتەسۋ تارماق اترەتى اقشي اۋداندىق ءورت ءسوندىرۋ جانە ورتتەن ساقتانۋ، قۇتقارۋ ـ كومەكتەسۋ ۇلكەن اترەتى سىلكىنىس ورتالىعىنا ىلگەرىندى – كەيىندى جەتىپ، ناق مايدان جاعدايىن ءبىر ـ بىرلەپ تەكسەرىپ، قۇتقارۋ دايىندىعىن جاقسى ىستەدى. ءورت ءسوندىرۋ جانە ورتتەن ساقتانۋ تاراۋلارى مەن قاراستى رايونداعى تەز مالىمدەۋشىنىڭ، جەرگىلىكتى قوعام حاۋىپسىزدىگى، شۇعىل جاعدايعا توتەپ بەرۋ قاتارلى تاراۋلاردىڭ تەكسەرىپ انىقتاۋى ارقىلى قازىر ءولىم – ءجىتىم نەمەسە ءۇي قۇلاۋ جاعدايى تۋىلماعان، قاتىستى ىستەر جونىندە ساقشىعا مالىمدەگەندەر جوق. قازىر اقشي اۋدانىنىڭ قاتىناس، ەلەكتر، حابارلاسۋ جانە بۇقارانىڭ ءوندىرىس، تۇرمىس ءتارتىبى قالىپتى.

كەلۋ قاينارى: حالىق تورابى