چىڭدۋ قوعام حاۋىپسىزدىگى مەكەمەسى ەرەكشە ءىرى جالعامالى ساتۋ دەلوسىن انىقتاعان

ءتىلشىنىڭ 12 – ايدىڭ 16 – كۇنى چىڭدۋ قوعام حاۋىپسىزدىگى مەكەمەسى ۋىنجياڭ رايوندىق بولىمشە مەكەمەسىنەن ۇعىسۋىنشا، اتالعان مەكەمە ەرەكشە ءىرى جالعامالى ساتۋ قىلمىستىق تورىن تالقانداپ، باستى قىلمىس كۇماندىلارىنان 35 ادامعا زاڭ بويىنشا قىلمىستىق ىستەرگە ساي ماجبۇرلەۋ شارالارىن اتقارعان، دەلوعا ساياتىن سوما 23 ميلليون يۋاننان اسقان.

ءتىلشىنىڭ ۇعىسۋىنشا، 2025 – جىلى 7 – ايدا، چىڭدۋ قوعام حاۋىپسىزدىگى مەكەمەسى ۋىنجياڭ رايوندىق بولىمشە مەكەمەسى قاراماعىنداعى وڭىردە جاسىرىنعان جالعامالى ساتۋ توبىنىڭ دەرەگىن بايقاپ، دەرەۋ ارناۋلى قىزمەت گرۋپپاسىن قۇرىپ، دەلونى بارلاۋ قىزمەتىن كۇش سالا ورىستەتەدى. اتالعان جالعامالى ساتۋ توبى ”ادام تىركەۋ“ تاسىلىمەن جالعامالى ساتۋ تورىن ۇزدىكسىز ۇلعايتقان، قىلمىستىق تىزبەگىندە تيپتىك جالعامالى ساتۋدىڭ پيراميدا فورمالى دارەجەلىك كەڭەيۋ بەلگىسى بايقالعان، قىسقا عانا بىرنەشە ايدا 200 دەن استام ”قولشوقپار“ جيناعان.

چىڭدۋ قالالىق قوعام حاۋىپسىزدىگى مەكەمەسى ۋىنجياڭ رايوندىق بولىمشە مەكەمەسى ۇلكەن اترەتىنىڭ ورىنباسار باستىعى كۋاڭ ميڭنىڭ تانىستىرۋىنشا، اتالعان توپ ۇنەمى قىزمەت ىزدەۋ، ساياحاتتاۋ، دوستاسۋ دەگەندەردى سىلتاۋ ەتىپ، ۋيشين، QQ، تەلەفون قاتارلى تاسىلدەرمەن سىرت ولكەدە وقىپ جاتقان نەمەسە جاڭا عانا وقۋ تاۋىسقان ستۋدەنتتەردى چىڭدۋعا كەلۋگە شىرعالاپ، ”مەملەكەتتىك نىسان“، ”مەملەكەت جاسىرىن قولداۋ كورسەتەدى“ دەگەن جەلەۋلەرمەن “جالعامالى ساتۋعا“ ساياتىن ۇعىمداردى بۇركەمەلەپ، ”ساۋلەلى ينجەنەريا“، ”تىزبەكتى تيجارات“ دەگەن سىلتاۋلارمەن قاتىناسۋشىلاردى 69800 يۋان قارجى قوسۋ ارقىلى قابىلدانۋ تولىمدىلىعىنا يە بولۋعا شىرعالاپ، ”قول استىڭا ادام قابىلداۋ ارقىلى ەڭ كوپ بولعاندا 10 ميلليون 400 مىڭ يۋان پايداعا كەنەلۋىڭە بولادى“ دەگەن وتىرىكتى قۇراستىرىپ، وسى ارقىلى جالعامالى ساتۋ ارەكەتىن ورىستەتكەن. (ءتىلشى دۇڭ شياۋحۇڭ)

كەلۋ قاينارى: حالىق تورابى