حالىق اقشاسىمەن ناق اقشا تۇرىندە اقى الۋدان باس تارتقان ەكى ورىندى جازالادى 

جۇڭگو حالىق بانكەسىنىڭ 1 – ايدىڭ 22 – كۇنى جاريالاۋىنشا، 2025 – جىلى ءتورتىنشى توقساندا جۇڭگو حالىق بانكەسى حالىق اقشاسىمەن ناق اقشا تۇرىندە اقى الۋدان باس تارتقانى تۇراقتاندىرىلعان ەكى ورىندى جانە قاتىستى جاۋاپتى ادامداردى زاڭ بويىنشا ەكونوميكالىق جاقتان جازالادى ءارى ولاردى اشىق جاريالادى.

جۇڭگو حالىق بانكەسىنىڭ جازالاۋعا قاتىستى ينفورماتسيالارىنا قاراعاندا، وسى جولى اشىق جاريالانعان ورىندار جياڭسۋ ولكەسى قالا كەڭىستىگىن ىسكە قوسۋ جانە باسقارۋ شەكتى سەرىكتەستىگى مەن جۇڭگو حالىق مال – مۇلىك قامسىزداندىرۋ شەكتى سەرىكتەستىگى نيڭبو قالاسى بەيلۇن رايوندىق بولىمشە سەرىكتەستىگى. الدىڭعىسى تۇتىنۋشىلاردىڭ ناق اقشامەن اقى تولەۋ فورماسى ارقىلى اۆتوموبيل توقتاتۋ اقىسىن تولەۋىنەن باس تارتقاندىقتان جازالانعان. كەيىنگىسى تۇتىنۋشىلاردىڭ ناق اقشامەن اقى تولەۋ فورماسىندا قامسىزداندىرۋعا قاتىناسۋ ءىسىن بىتىرۋىنەن باس تارتقاندىقتان جازالانعان. ەكى ورىنعا جەكە – جەكە اقشالاي 20 مىڭ يۋان جانە 30 مىڭ يۋان ايىپ سالىنعان.

جۇڭگو حالىق بانكەسىنىڭ قاتىستى قىزمەتكەرلەرىنىڭ ايتۋىنشا، جۇڭگو حالىق بانكەسى حالىق اقشاسىمەن ناق اقشا تۇرىندە اقى الۋدان باس تارتۋ ارەكەتىن جونگە سالۋ قىزمەتىن ۇزدىكسىز ورىستەتىپ، تۇتىنۋشىلاردىڭ زاڭدى ۇقىق – مۇددەسىن شىنايى قورعاپ، حالىق اقشاسىنىڭ زاڭدى ۆاليۋتالىق بەدەلىن قورعايدى. بارشا تيجارات نەگىزگى تۇلعالارىنىڭ زاڭمەن جونگە سالۋ تانىمىن كۇشەيتىپ، جۇرتشىلىقتىڭ اقى تولەۋ جاعىنداعى تالعامىنا قۇرمەت ەتىپ، ناق اقشانىڭ اينالىمىنا جاراسىمدى ورتانى بىرگە قالىپتاستىرۋىن ءۇمىت ەتەمىز. ەگەر حالىق اقشاسىمەن ناق اقشا تۇرىندە اقى الۋدان باس تارتۋ ارەكەتىنە جولىقساڭىز، زاڭ بويىنشا ۇقىعىڭىزدى قورعاۋىڭىزعا بولادى.

كەلۋ قاينارى: حالىق تورابى