شي جينپيڭ برازيليا زۇڭتۇڭى لۋلامەن تەلەفوندا سويلەستى

شينحۋا اگەنتتىگىنىڭ 1 - ايدىڭ 23 - كۇنى بەيجيڭنەن بەرگەن حابارى. 1 - ايدىڭ 23 - كۇنى تۇستەن بۇرىن مەملەكەت ءتوراعاسى شي جينپيڭ برازيليا زۇڭتۇڭى لۋلامەن تەلەفوندا سويلەستى.

شي جينپيڭ بىلاي دەپ اتاپ كورسەتتى: 2024 - جىلى مەن لۋلا زۇڭتۇڭمەن ەكى ەل قارىم - قاتىناسىن قول ۇستاسا اناعۇرلىم ادىلەتتى دۇنيە جانە اناعۇرلىم باياندى پلانەتا قۇراتىن جۇڭگو − برازيليا تاعدىرلاس ورتاق تۇلعاسى دەڭگەيىنە كوتەرۋدى بىرگە جاريالادىق. ءبىر جىلدان استام ۋاقىتتان بەرى، ەكى ەلدىڭ تاعدىرلاس ورتاق تۇلعا قۇرىلىسى ءساتتى باستالىپ، دامۋ ستراتەگيالارىن ءتۇيىلىستىرۋى بارعان سايىن تەرەڭدەپ، ناقتىلانىپ، جەر شارىنىڭ وڭتۇستىگىندەگى ەلدەردىڭ ىنتىماقتاسىپ سەلبەسۋىنىڭ ۇلگىسى ورناتىلدى. بيىل − جۇڭگونىڭ ”15 - بەسجىلدىعىنىڭ“ باستاما جىلى. جۇڭگو جاق جوعارى دەڭگەيدە سىرتقا ەسىك اشۋ ارقىلى جوعارى ساپالى دامۋدى جەبەپ، جۇڭگو − برازيليا سەلبەستىگىنە اناعۇرلىم كوپ وراي ازىرلەيدى. جۇڭگو جاق برازيليا جاقپەن بىرگە قۇلشىنىپ، ءار سالاداعى ءوزارا پايدا جەتكىزۋ سەلبەستىگىن جان - جاقتى ىلگەرىلەتىپ، جۇڭگو − برازيليا قارىم - قاتىناسىنىڭ اناعۇرلىم زور دامۋعا قول جەتكىزۋىن ىلگەرىلەتىپ، اناعۇرلىم كوركەم بولاشاقتى قارسى الۋدى قالايدى.

شي جينپيڭ بىلاي دەپ باسا دارىپتەدى: قازىر حالىقارالىق جاعداي اۋمالى - توكپەلى، جۇڭگو مەن برازيليا جەر شارىنىڭ وڭتۇستىگىنىڭ ماڭىزدى مۇشەسى رەتىندە، دۇنيە ءجۇزىنىڭ بەيبىتشىلىگىن، ورنىقتىلىعىن قورعاۋدىڭ، الەمدىك باسقارۋدى رەفورمالاۋدىڭ، كەمەلدەندىرۋدىڭ سىندارلى كۇشى، تاريحتىڭ دۇرىس جاعىندا بەرىك تۇرىپ، ەكى ەلدىڭ جانە جەر شارىنىڭ وڭتۇستىگىنىڭ ورتاق مۇددەسىن اناعۇرلىم ويداعىداي قورعاۋى، بىرلەسكەن مەملەكەتتەر ۇيىمىنىڭ وزەكتى ورنى مەن حالىقارالىق ادىلدىكتى، تۋراشىلدىقتى بىرگە قورعاۋى كەرەك. جۇڭگو جاق باستان - اياق لاتىن امەريكاسى مەن كارايب ەلدەرىنىڭ جاقسى دوسى، جاقسى سەرىگى بولىپ، جۇڭگو − لاتىن امەريكاسى تاعدىرلاس ورتاق تۇلعاسىن بىرگە قۇرۋدى ىلگەرىلەتۋدى قالايدى.

لۋلا مىنالاردى ءبىلدىردى: ءتوراعا شي جينپيڭ 2024 - جىلى برازيليادا تاريحي سيپات الاتىن ساپاردا بولىپ، برازيليا − جۇڭگو قارىم - قاتىناسىن قول ۇستاسا اناعۇرلىم ادىلەتتى دۇنيە جانە اناعۇرلىم باياندى پلانەتا قۇراتىن تاعدىرلاس ورتاق تۇلعا تىڭ دەڭگەيىنە كوتەردى، ەكى ەلدىڭ ءار سالاداعى سەلبەستىگى قارىشتاپ ىلگەرىلەۋگە قول جەتكىزدى. برازيليا جاق جۇڭگو جاقپەن بىرگە ەكى جاقتىڭ جانە لاتىن امەريكاسى مەن جۇڭگونىڭ قارىم - قاتىناسىنىڭ اناعۇرلىم زور دامۋعا قول جەتكىزۋىن ىلگەرىلەتۋدى قالايدى. برازيليا مەن جۇڭگو كوپ جاقتىلىقتى قورعاۋداعى، ەركىن ساۋداعا تاباندى بولۋداعى ماڭىزدى كۇش. قازىرگى حالىقارالىق جاعداي ادامدى الاڭداتادى، برازيليا جاق جۇڭگو جاقپەن تىعىز سەلبەسىپ، بىرلەسكەن مەملەكەتتەر ۇيىمىنىڭ بەدەلىن قورعاۋدى، بريكس ەلدەرى سەلبەستىگىن كۇشەيتۋدى، ءوڭىردىڭ جانە دۇنيە ءجۇزىنىڭ بەيبىتشىلىگىن، ورنىقتىلىعىن قورعاۋدى قالايدى.