شي جينپيڭ تەلەگرامما جولداپ، سۋ ليننىڭ ۆيەتنام كوممۋنيستىك پارتياسى ورتالىق كوميتەتىنىڭ باس شۋجيى بولىپ سايلانعاندىعىن قۇتتىقتادى

شينحۋا اگەنتتىگىنىڭ 1 - ايدىڭ 23 - كۇنى بەيجيڭنەن بەرگەن حابارى. 1 - ايدىڭ 23 - كۇنى جۇڭگو كوممۋنيستىك پارتياسى ورتالىق كوميتەتىنىڭ باس شۋجيى شي جينپيڭ سۋلينگە تەلەگرامما جولداپ، ونىڭ ۆيەتنام كوممۋنيستىك پارتياسى ورتالىق كوميتەتىنىڭ باس شۋجيى بولىپ سايلانعاندىعىن قۇتتىقتادى.

شي جينپيڭ قۇتتىقتاۋ تەلەگرامماسىندا بىلاي دەدى: ۆيەتنام كوممۋنيستىك پارتياسىنىڭ 13 - قۇرىلتايىنان بەرى، ۆيەتنام كوممۋنيستىك پارتياسى ۆيەتنامنىڭ مەملەكەت جاعدايىنا ۇيلەسەتىن سوتسياليستىك وسىزامانداندىرۋ جولىمەن باتىل ءجۇرىپ، پارتيانىڭ جالپى بەتتىك باسشىلىعىنا تاباندى بولىپ جانە ونى كۇشەيتىپ، ۆيەتنام حالقىن ىنتىماقتاستىرىپ جانە باستاپ، سوتسياليستىك قۇرىلىس پەن جاڭارتۋ ىستەرىندە كورنەكتى تابىستارعا قول جەتكىزدى، ۆيەتنامنىڭ حالىقاراداعى ورنى مەن ىقپالى ۇزدىكسىز جوعارىلادى. ۆيەتنام كوممۋنيستىك پارتياسى 14 - قۇرىلتايىنىڭ ءساتتى اشىلۋى ۆيەتنامنىڭ ۇلت دامۋىنىڭ جاڭا ءداۋىرىن اشتى، بۇل دۇنيە ءجۇزى سوتسياليزم قوزعالىسىنىڭ دامۋىنا دەم بەرەدى جانە ونى جەبەيدى. باس شۋجي جولداس باس بولعان جاڭا كەزەكتى ۆيەتنام كوممۋنيستىك پارتياسى ورتالىق كوميتەتىنىڭ باسشىلىعىندا ۆيەتنام كوممۋنيستىك پارتياسىنىڭ، ءسوز جوق، ۆيەتنام حالقىن باستاپ، ءبىر نيەتپەن ىنتىماقتاسىپ، ۇدەرە العا تارتىپ، ۆيەتنامنىڭ پارتيا مەن مەملەكەت ىستەرىندە تىڭ دا اناعۇرلىم زور تابىستارعا قول جەتكىزۋىن ىلگەرىلەتىپ، ۆيەتنام كوممۋنيستىك پارتياسى 14 - قۇرىلتايىندا بەلگىلەنگەن ءتۇرلى نىسانا - مىندەتتەردى جەڭىسپەن ورىندايتىندىعىنا سەنەمىن.

جۇڭگو مەن ۆيەتنام سوتسياليستىك دوس كورشى ەل، ستراتەگيالىق مانگە يە تاعدىرلاس ورتاق تۇلعا. مەن جۇڭگو − ۆيەتنام ەكى پارتيا، ەكى مەملەكەت قارىم - قاتىناسىن ايرىقشا قاستەرلەيمىن، باس شۋجي جولداسپەن بىرگە ستراتەگيالىق بايلانىستى كۇشەيتىپ، ءداستۇرلى دوستىقتى اسقاقتاتىپ، سوتسياليزم ىستەرىن تاباندىلىقپەن ىلگەرىلەتىپ، جۇڭگو مەن ۆيەتنامنىڭ جان - جاقتى ستراتەگيالىق سەلبەستىگى مەن تاعدىرلاس ورتاق تۇلعا قۇرىلىسىنىڭ ۇزدىكسىز سۇبەلى تابىستارعا قول جەتكىزۋىنە جەتەكشىلىك ەتىپ، ەكى ەل حالقىنا اناعۇرلىم كوپ قۇت - ىرىس اكەلىپ، ءوڭىردىڭ جانە دۇنيە ءجۇزىنىڭ بەيبىتشىلىگىنە، ورنىقتىلىعىنا، دامۋىنا، گۇلدەنۋىنە بەلسەندى ۇلەس قوسۋدى قالايمىن.