سىرتقى ىستەر مينيسترلىگى: جۇڭگو ا ق ش – ىن يادرو سىناعىن قايتا باستاۋعا سىلتاۋ ىزدەۋدى توقتاتۋعا قۋزايدى

شينحۋا اگەنتتىگىنىڭ 2 – ايدىڭ 25 - كۇنى بەيجيڭنەن بەرگەن حابارى. ا ق ش – نىڭ تاياۋدا جۇڭگونى يادرولىق جارىلىس سىناعىن جۇرگىزدى دەپ جازعىرعاندىعى جونىندە سىرتقى ىستەر مينيسترلىگىنىڭ مالىمدەمەشىسى ماۋ نيڭ 2 – ايدىڭ 25 - كۇنى بىلاي دەدى: ا ق ش – نىڭ قيسىنسىز جازعىرۋى، شىندىقتى بۇركەمەلەۋى مۇلدە تابان تىرەپ تۇرا المايدى. جۇڭگو ا ق ش – ىن ”يادرو سىناعىن ۋاقىتشا توقتاتۋ“ ۋادەسىنە بويسۇنىپ، يادرو سىناعىن قايتا باستاۋعا سىلتاۋ ىزدەۋدى توقتاتۋعا قۋزايدى.

سول كۇنگى كەزەكتى تىلشىلەر جينالىسىندا ءبىر ءتىلشى بىلاي دەپ سۇرادى: حابارعا قاراعاندا، تاياۋدا ا ق ش – نىڭ اسكەري ازىرلىكتى تىزگىندەۋ ىستەرىنە جاۋاپتى كومەكشى مەملەكەت حاتشىسى جۇڭگونىڭ كەزىندە يادرولىق جارىلىس سىناعىن جۇرگىزگەندىگىن جازعىرىپ، ا ق ش – نىڭ ”تەڭ بولۋ پرينسيبىنە“ ساي يادرولىق سىناقتى قالپىنا كەلتىرەتىندىگىن ايتقان. «يادرولىق سىناققا جاپپاي تيىم سالۋ شارتى» ۇيىمىنىڭ تورابى جاريالاعان حاباردا بىلاي دەلىنگەن: 2020 – جىلى 6 – ايدىڭ 22 – كۇنى جۇڭگو شەكاراسى ىشىندە ەكى رەت وتە شاعىن جەر سىلكىنىسى وقيعاسى تۋىلعان، تەك قاتىستى ساندى مالىمەتتەرگە سۇيەنىپ وقيعانىڭ سەبەبىن سەنىمدى باعالاۋعا بولمايدى. جۇڭگو بۇعان قالاي باعا بەرەدى؟

”ا ق ش – نىڭ قيسىنسىز جازعىرۋى، شىندىقتى بۇركەمەلەۋى مۇلدە تابان تىرەپ تۇرا المايدى.“ ماۋ نيڭ بىلاي دەدى: جۇڭگو تالاي رەت مىنانى قايتالاي دارىپتەدى: جۇڭگو «يادرولىق سىناققا جاپپاي تيىم سالۋ شارتىنىڭ» ماقساتى مەن نىساناسىن باستان - اياق باتىل قولداپ، 5 يادرولى ەلدىڭ «يادرولىق سىناقتى ۋاقىتشا توقتاتۋ» ۋادەسىنە باستان - اياق قاتاڭ بويسۇنۋدا. ول بىلاي دەدى: ا ق ش حالىقارالىق اسكەري ازىرلىكتى تىزگىندەۋ بورىشىنان قاشقالاقتاۋ ءۇشىن باسقا ەلدەرگە پالە جابۋدان تايىنبايدى، مۇنداي ارەكەت ءوزىنىڭ حالىقارالىق سەنىمدىلىگىنە اۋىر زيان جەتكىزەدى. ”جۇڭگو ا ق ش – ىن ’يادرو سىناعىن ۋاقىتشا توقتاتۋ‘ ۋادەسىنە بويسۇنىپ، حالىقارالىق يادرو سىناعىنا تيىم سالۋ ورتاق تانىمىن قورعاپ، يادرو سىناعىن قايتا باستاۋعا سىلتاۋ ىزدەۋدى توقتاتۋعا قۋزايدى.“

كەلۋ قاينارى: حالىق تورابى