شي جينپيڭ جۇڭگو − امەريكا ”ۇستەل دوپ ديپلوماتياسىنىڭ“ 55 جىلدىعىن ەسكە ءتۇسىرۋ جينالىسىنا جانە جۇڭگو − امەريكا جاستار مەن ورەندەر دەنە تاربيە اۋىس ـ كۇيىس جەلىلەس قيمىلىنىڭ باستالۋ سالتىنا قۇتتىقتاۋ حاتىن جولدادى

شينحۋا اگەنتتىگىنىڭ 4 ـ ايدىڭ 10 ـ كۇنى بەيجيڭنەن بەرگەن حابارى. 4 ـ ايدىڭ 10 ـ كۇنى مەملەكەت ءتوراعاسى شي جينپيڭ جۇڭگو − امەريكا ”ۇستەل دوپ ديپلوماتياسىنىڭ“ 55 جىلدىعىن ەسكە ءتۇسىرۋ جينالىسىنا جانە جۇڭگو − امەريكا جاستار مەن ورەندەر دەنە تاربيە اۋىس ـ كۇيىس جەلىلەس قيمىلىنىڭ باستالۋ سالتىنا قۇتتىقتاۋ حاتىن جولدادى.

شي جينپيڭ بىلاي دەپ اتاپ كورسەتتى: 55 جىلدىڭ الدىندا جۇڭگو مەن امەريكانىڭ اعا بۋىن باسشىلارى كورنەكتى ساياسي اقىل ـ پاراساتپەن جانە ستراتەگيالىق كورەگەندىكپەن ەكى ەل حالقى دوستىق بارىس ـ كەلىسىنىڭ قاقپاسىن قايتا اشىپ، ”كىشكەنە دوپ ۇلكەن دوپتى اينالدىرۋ“ سىندى تاريحي تاماشا اڭگىمەنى جارىققا شىعاردى. بۇگىن ەكى ەل جاستارى مەن ورەندەرىنىڭ ”ۇستەل دوپ سۇيىسپەنشىلىگىن“ تاعى جالعاستىرىپ، دەنە تاربيە اۋىس ـ كۇيىس جەلىلەس قيمىلدارىن ورىستەتۋى جۇڭگو مەن امەريكانىڭ دوستىق ىستەرىن ىلگەرىلەتۋدە ەرەكشە مانگە يە.

شي جينپيڭ بىلاي دەپ باسا دارىپتەدى: جۇڭگو − امەريكا قارىم ـ قاتىناسىنىڭ نەگىزىن حالىق قالاعان، بولاشاعىن جاستار جاراتادى. ەكى ەلدەگى ءار سالا قايراتكەرلەرىنىڭ، اسىرەسە، جاس ۇرپاقتاردىڭ تاريحتان اقىل ـ پاراسات جانە كۇش ـ قۋات قابىلداپ، اۋىس ـ كۇيىس، سەلبەستىك بارىسىندا ءوزارا ءتۇسىنىسىپ، ءوزارا ەتەنە بولىپ، ءوزارا ۇيرەنۋ، ءوزارا ۇلگى الۋ بارىسىندا قول ۇستاسا العا ىلگەرىلەپ، دوستىق دانەكەردى بىرگە بەكەمدەپ، جۇڭگو − امەريكا قارىم ـ قاتىناسىنىڭ ورنىقتى، اقاۋسىز، باياندى دامۋىن ىلگەرىلەتۋگە تىڭ ۇلەس قوسۋىن ءۇمىت ەتەمىن.

جۇڭگو − امەريكا ”ۇستەل دوپ ديپلوماتياسىنىڭ“ 55 جىلدىعىن ەسكە ءتۇسىرۋ جينالىسى جانە جۇڭگو − امەريكا جاستار مەن ورەندەر دەنە تاربيە اۋىس ـ كۇيىس جەلىلەس قيمىلدارىنىڭ باستالۋ سالتى سول كۇنى بەيجيڭدە وتكىزىلدى، جۇڭگو حالىق شەتەلدەرمەن دوستىق قوعامى، مەملەكەتتىك دەنە تاربيە باس مەكەمەسى جانە ورتالىق راديو ـ تەلەۆيزيا باس ستانسياسى بىرگە وتكىزدى.